Haala Sofar artiika: ina haani tawee Ayuuba saraama ko ɓuri noon
11
1 Ndeen Sofar Naamankeejo jaabii wi'i:2 — Haalaaji ɗuuɗuɗi ɗi ngalaa jaabotooɗo ɗi naa?
Waawude haala na hokka neɗɗo goonga naa?
3 Haala maa ɓola ka haɗan woɓɓe haalude naa?
Ko ndufataa yawaara ɗuum, yalla fay gooto wo semtinire ɗum naa?
4 Aɗa wi'a ekintinol ngol kooliɗaa ngool wo goonga,
a laaɓuɗo yeeso Laamɗo.
5 Yooyoy! Taweno Laamɗo haalan,
wi'a goɗɗum dow maaɗa.
6 Taweno o holle paamal cuuɗiingal,
sabo ngal makko waawaa fonndeede,
paamaa du sariya mo Laamɗo ittani ma hewtaay hakkeeji ɗi ngaɗɗaa.
7 Aɗa waawi faamude haddu kujje Laamɗo cuuɗiiɗe,
naa du annditaa haddu kabaaru Jom Baawɗe fuu naa?
8 Imo ɓuri njaayri kammu toowude.
Ɗume mbaawataa waɗude?
Imo ɓuri laakara luggude.
Ɗume anndataa e majjum?
9 Njuuteefi kiin na ɓuri keerol adunaaru,
njaajeefi kiin du na ɓuri maayo manngo.
10 Si o warii o nanngii neɗɗo o yaarii ɗum sariya,
moy waawi haɗude mo?
11 Ay, kanko koy imo anndi fewooɓe.
Si o yi'ii bonandaaji, o taykataako ɗi naa?
12 Araawa ladde kaa rimataa tomette,
sakko puuyɗo laatoo jom paamal.*
13 Si nii aan, Ayuuba, a waylitii ɓernde maaɗa,
peertaa juuɗe maa de nyaagoɗaa Laamɗo,
14 si juuɗe maa ina tammbi bonandaaji,
ceedaa e majji to woɗɗi,
taa accu oonyaare du tawee ley wuro maa.
15 Ndeen a ɓantan hoore maa tawee feloore fuu walaa,
walaa ko dimmbete, walaa du ko kulataa.
16 A yeggitan torraaji maaɗa,
a miccitoto ɗi hono ndiyam ndoggoojam na faltoo.
17 Nguurndam maa yaynan faa ɓura jayngol naange,
nimre laatiinde du fuu laatoto hono pooyngol.
18 Ɓernde maa waaltoto sabo aɗa woodi jikke,
a reenete, a waalan ley jam.
19 A fukkoto walaa ko kulataa,
ɗuuɗɓe piloto mballa to maaɗa.
20 Ammaa gite bonɓe mbaatan tak,
ɓe keɓataa fuu no ɓe ndaɗira.
Ɓe ngalaa fuu jikke si wanaa maayde tan.