10
1 Mi nefii nguurndam am!Mi accan hunnduko am haala ko waanni kam,
mi haalan ley kaaɗeefi ɓernde ki maatammi.
2 Mi wi'an Laamɗo:
«Taa pelaa kam ɓolum,
paaminaa kam ko pelduɗaa kam.
3 Yalla e jiile maaɗa torrude na wooɗi,
mbanyaa ko taguɗaa,
de mbeltoroɗaa dabare bonɓe naa?
4 Yalla gite maaɗa wo hono ɗe neɗɗo naa?
Aɗa yiira kujje hono no ɓii Aadama yiirata naa?
5 Balɗe maaɗa wo hono ɗe neɗɗo naa?
Yalla duuɓi maaɗa wo hono ɗi ɓii Aadama?
6 Ɗuum waɗi de aɗa filoo lutti ɗi ngaɗumi naa?
Ɗuum waɗi de tefuɗaa tawrude kam hakke naa?
7 Aɗa waɗa noon fay ko annduɗaa mi walaa feloore,
wooɗi du fay gooto waawaa hisinde kam e junngo maa.
8 Wo juuɗe maa tami kam ngaɗi kam,
de joonin aɗa halka kam lay.
9 Miccita, e leydi ngaɗirɗaa kam!
Yalla a soƴƴan kam e sollaare naa?
10 Wanaa a waylii kam hono ɓiraaɗam ley reedu inna am,
tamuɗaa kam hono wulsere naa?
11 A sanyirii kam ƴi'e e ɗaɗi,
de ɓornuɗaa kam teewu e nguru.
12 A hokkii kam yonki, a hollii kam hinney,
ndeenaagu maa hinnake foofaango am.
13 Ammaa joonin miɗo anndi aɗa joginoo miilo wonngo,
a suuɗiino ngo ley ɓernde maa.
14 Aɗa heɗii faa mi waɗa hakke,
si mi waɗii du, a yaafantaako kam.
15 Si mi bonɗo, ay, bone woodanii kam,
si mi walaa feloore du,
mi waawataa ɓantude hoore am,
sabo semteende heewii kam,
torraaji du njoolii kam.
16 Si mi ɓantii hoore am du,
a tokkitan kam hono laddeeru,
aɗa waɗa kaayeefiiji kalkooji kam.
17 Aɗa heddii aɗa wadda seedeeɓe heyɓe dow am,
aɗa ɓeyda tikkere maaɗa dow am.
Aɗa nelda honooɓe ɗuuɗɓe dow am,
si ɓee tampii, woɓɓe njaɓɓoo.
18 Saabe ɗume mburtinɗaa kam e ley reedu inna am?
Ko ɓurannoo kam tawee mi maayiino gilla yitere fuu yi'aay kam.
19 Taweno mi laatakeno hono mo tagaakano,
taweno gilla e reedu inna am mi yehiino saabeere.
20 Wanaa nyalakoy seeɗa tan keddoriimi naa?
Accam, tottitoɗaa kam
faa mi weltoo seeɗakal,
21 gilla mi yahaay to mi wartoytaa,
ley leydi ndi nimre,
ndi nimre ɓaleere kurum,
22 leydi niɓɓirndi nimre ɓaleere tekkunde,
ndi njaayri ɓoldi,
to fay jayngol du nanndi e jemma.»