No Ayuuba jaaborii wi'i noy neɗɗo yeddondirta e Laamɗo?
9
1 Ayuuba jaabii wi'i:2 — Goonga nii, miɗo anndi wo hono noon,
de neɗɗo wo ɗume faa wi'a kam jeyi goonga yeeso Laamɗo?
3 Si goɗɗo wullowake mo fu,
waawataa jaabaade fay nde wootere e ley ƴamɗe makko 1 000.
4 O jom hakkillo, o jom baawɗe,
moy meeɗi hollude mo sattere de waali e jam?
5 Imo dirna baamle tawa kabaaru majjum fuu maataaka,
ley tikkere makko imo hippa ɗe.
6 Imo dimmba adunaaru gilla to ndu joƴƴinaa,
bimmbeeje mayru na ndiwna.
7 Imo yamira naange de nge fuɗataa,
imo sudda koode.
8 E muuyo makko tan o weƴƴitiri kammu,
imo dampa bempeƴƴe maayo.
9 Kanko ɓili koode dow kammu,
Ɗaccuki e Neɗɗooje,
e kawrite koode horɗoore e soɓɓirre fuu.
10 Moy waawata fonndude kujje mawɗe ɗe o waɗata,
sakko lima kaayeefiiji makko kaayniiɗi?
11 Ndaar, fay si o rewi ɗakkol am, mi yi'ataa mo,
o faltoroo yeeso, mi maatantaa mo.
12 Si o teetii, moy haɗata mo?
Moy ƴamata mo, «Ɗume ngaɗataa?»
13 Laamɗo surataa tikkere muuɗum,
fay wallooɓe Rahab, kuunga ndiyam ngaan,
o dampii ɗum'en.
14 Sakko miin! Noy njeddirammi mo?
Haalaaji ɗiye cuɓotoomi faa mi haalana mo?
15 Fay ko njeymi goonga
mi fotaay jaabaade mo,
sanaa mi nyaagoo kiitotooɗo oon yurmoo kam.
16 Si mi wullitake mo de o nootii kam fu,
mi miilaaki yalla o hettindoto haala am.
17 Kanko le, imo nelda kenhenam faa niisa kam,
o hebbini ɓanndu am barme ɓolum.
18 O accataa kam mi foofa,
sey kaaɗeefi tan o yarnata kam.
19 Si wo haala semmbe,
moy jogii semmbe makko?
Si wo haala sariya du,
moy foti wullanaade mo?
20 Fay si wo miin jeyi goonga, hunnduko am felan kam.
Fay ko laatiimi laaɓuɗo, o wi'an mi oonyiiɗo.
21 Wooɗi mi laaɓuɗo,
de mi taykataako hoore am,
mi nefii nguurndam am.
22 Ɗum fuu wo gootum,
sabo noon mbiimi imo halka laaɓuɗo e bonɗo fuu.
23 Si bone ukkake wakkati gooto wuuwirii yimɓe to maayde,
Laamɗo na jala ko hewtii ɓe ngalaa feloore ɗuum.
24 Leydi wattaama e juuɗe bonɓe,
Laamɗo du uddii gite hiitotooɓe.
Si wanaa kanko waɗi noon, wo moy ndelle?
25 Nyalakoy am ina paltoo law hono doggoowo,
koy ndogga koy maataay fuu weltaare.
26 Ikoy paltoo law hono laanawal ɓurngal yaawude,
naa du hono no ciilal hawtoranto ko nyaamata.
27 Si mi wi'ii mi yeggitan mettorgal am,
mi fiirta yeeso am, mi moosa,
28 miɗo hula torraaji am naawɗi ɗi fuu,
yaa Laamɗo, sabo miɗo anndi a wi'ataa mi walaa feloore.
29 Si goonga, mi hooƴiraama wo mi bonɗo,
ndelle ɗume torranmi hoore am ɓolum?
30 Si mi lootorake ndiyam marmalluure,
fay si lootirmi juuɗe am saabunnde,
31 e noon fuu Laamɗo faɗɗan kam ley ngayka,
de fay kaddule ɗe ɓorniimi du nefan ɓanndu am.
32 Sabo kanko o wanaa neɗɗo hono am,
sakko mi jaaboo mo,
naa du min njaada yeeso sariya.
33 Tawee ina wooduno dewrintinoowo hakkunde amin,
faa nannga juuɗe amin de saroo hakkunde amin!
34 Ndeen o ittan sawru makko dow am,
taa nesi am taƴira kulol makko.
35 Ndeen tawete mi haalan mi diwnirtaa kulol,
ammaa wanaa hono noon, wo miin e hoore am tan.