Haala Bildat artiika: ina haani Ayuuba tuuba
8
1 Ndeen Bildat Suhankeejo jaabii wi'i:2 — Faa ndeye accataa iri ɗi haalaaji?
Ko mbi'ataa fuu wo henndu mawndu tan.
3 Aɗa miilii Laamɗo oonyan sariya naa?
Yalla Jom Baawɗe oonyan ko dartii naa?
4 Si ɓiɓɓe maaɗa luttii mo fu,
wooɗi, o waɗii lutti maɓɓe nanngii ɓe joonin.
5 Ammaa aan si a wattii ɓernde maa e filaade Laamɗo,
a nyaagake Jom Baawɗe moƴƴere,
6 si aɗa woodi laaɓal, si aɗa fonnditii fu,
ndeen kaa o segiloto faa o walle,
o wartire nokkuure maa dartiinde ndeen.
7 Fay si puɗɗirɗaa seeɗa du,
timmoode ndeen ɗuuɗan sanne.
8 Wooɗi, ƴamu jamaanuuji arandeeji,
taykoɗaa paamal ngal maamiraaɓe keɓunoo.
9 Sabo enen kaa wo en ɓiɓɓe keeŋan tan, walaa ko annduɗen,
nyalakoy meeɗen ina paltoo hono ɗoyki laasara.
10 Kamɓe kaa ɓe ekintinte,
ɓe paaminte kulle feere feere e paamal maɓɓe.
11 Yalla ciidi na njuuta to beeli ngalaa naa?
Si ndiyam walaa iɗi mawna naa?
12 Ay, ɗi njooran gilla nde ɗi ngaɗi pinndi, ɗi kewtaay itteede,
ɗi njooran law law gilla huɗooji goɗɗi njooraay.
13 Noon woni laawol mono fuu si hiisaaki Laamɗo,
jikke mo hulataa Laamɗo oon ɓeeɓan lay!
14 O kooliiɗo gaarawol,
o jowuɗo jikke makko dow suudu cancanƴowal.
15 Imo ɓaaroo ndu, ammaa ndu darnataa mo,
imo nannga ndu, de ndu teeŋaa.
16 Imo wa'i hono huɗo haaruko ndiyam e naange,
ko lanyan ko heewa ngesa.
17 Ɗaɗi makko na carkondiri ley joorde kaaƴe,
iɗi nanngi kaaƴe ɗeen.
18 Ammaa si ko ɗoofaama e nokkuure ndeen fu,
nde yeddan ɗum, nde wi'a, «Mi yi'aay ma abada.»
19 Wooɗi, noon du laawol makko belngol ngool timmirta.
E leydi ɗo o wonnoo ɗoon wokko du fuɗitan.
20 Tannyoraa! Laamɗo salataako laaɓuɗo,
wooɗi bammbataa bonɓe du.
21 O hebbinante hunnduko maa jaleeɗe,
ɗemngal maa du feekoto peekaali seyo,
22 de wayɓe maa kaa, semteende suddan ɗum'en kip,
cuuɗi bonɓe du kalkan lay.