Bojji Ayuuba
7
1 Wanaa gollal ɓii Aadama e adunaaru laatake dooleyal tiiɗungal naa?Balɗe makko wo hono adaaɗo na yoɓee.
2 Wo hono maccuɗo muuyɗo ɗoyki,
hono golloowo keɗiiɗo njoɓdi muuɗum.
3 Noon du wo ɓolum tan ndonumi, lebbi e lebbi,
jemma fuu bone woni ngeɗu am.
4 Nde pukkotoomi fuu miɗo ƴamitoo, «Ndeye ummotoomi?»
Jemmaaji fuu wo juutanɗi kam,
mi waalan miɗo waylitoo, ɗoyngol walaa faa weeta.
5 Ɓanndu am ina heewi gilɗi e ƴiiƴam njoorɗam,
nguru am feccake, mbordi ina ila.
6 Balɗe am ina ƴaɓɓoo law,
na ɓuri tonngorgel cannyoowo yaawude,
iɗe timma tawee jikke walaa.
7 Miccita yonki am wo henndu tan,
gite am nji'ataa ko wooɗi katin.
8 Gite jiiɗo kam joonin du nji'oytaa kam katin,
wakkati mo ndaarataa kam oon, majjanmi e gite maa.
9 No duule caayirta de lalla,
noon naatuɗo saabeere wa'i, yi'ataake katin.
10 O wanaa gartoowo wuro makko katin,
joonnde makko miccitortaake mo katin.
11 De miin du mi nanngataa hunnduko am,
mi haalan ley naawalla yonki am,
sey mi woytoroo kaaɗeefi ɓernde am.
12 Aɗa miilii wo mi maayo manngo naa?
Naa du mi kuunga mannga ley maggo,
faa ndoomiraa kam nii?
13 Nde miiliimi leeso feewnan kam ɓernde,
naa ɗoyngol am du ɓuytanan kam mettorgal,
14 ndeen kulɓinirtaa kam e koyɗi,
ngaɗaa faa mi hulɓiniree e holleede.
15 Ko ɓurani kam tawee mi ɗeɗɗee, mi maaya,
diina mi wuura e ley ƴi'e ɗe.
16 Mi sawtii! Mi yiɗaa wuurude faa abada.
Accam, sabo nyalakoy am wo henndu ɓoldu tan.
17 Ɓii Aadama wo ɗume de teddinirɗaa ɗum nii,
de ngattuɗaa hakkillo maa dow muuɗum?
18 Aɗa taykoo mo nde o fini fuu,
aɗa ndaartindoo mo wakkati fuu.
19 Faa ndey ittataa gite maa dow am,
kokkaa kam njaayriyel faa mi moɗa joodooli am?
20 Si mi waɗii hakke, ɗume ɗum waɗete?
Aan koroowo ɓii Aadama,
wo saabe ɗume de laatanimaami cappeteeɗo?
Ko waɗi laatanimaami donngal?
21 Saabe ɗume de a yaafantaako kam lutti am?
Ɗume haɗete mooytude hakkeeji am?
Ay, mi ɓadake wallineede nder leydi,
a filoto kam, de a yiitataa,
sabo mi tawataake.