No Ayuuba jaaborii wi'i sey yigiraaɓe paama goonga
6
1 Ayuuba jaabii wi'i:2 — Taweno teddeefi mettorgal am fonndaama,
taweno bone kewtuɗo kam fuu etaama!
3 Tawan iɗum ɓuri njaareendi maayo teddude,
kanjum waɗi miɗo rufa haalaaji ɗuuɗɗi ɗiin.
4 Sabo kure Jom Baawɗe naatii kam,
yonki am musinii tooke majje.
Laamɗo darnii masibaaji kulɓiniiɗi na piilii kam hono honooɓe.
5 Wanaa araawa ladde hiikan si heɓii huɗo naa?
Wanaa ngaari du huunan si heɓii layndi naa?
Miin, mi jeyaa uumude naa?
6 Nyaamdu ndu walaa ndakam na nyaamoo si lamɗam walaa naa?
Yalla ndakam na maatee e ndiyam haako uulo naa?
7 De ko mbanyunoomi fay meemude ɗuum,
kanjum laatii nyaamdu am nefiniindu joonin.
8 Taweno ŋaarnde am na nanee!
Taweno Laamɗo hokkan kam ko keɗiimi!
9 Taweno Laamɗo jaɓan niisude kam!
Taweno o foortan junngo makko o itta yonki am!
10 Fay si wo noon ɓernde am waaltoto,
faa mi weltoo fay ley naawalla mo feewataa o,
sabo mi meeɗaay yeddude haala Ceniiɗo.
11 Yalla miɗo woodi semmbe sakko mi heɗoo goɗɗum katin naa?
Ɗume woni battane am, sakko mi munya?
12 Yalla semmbe am na laatii hono semmbe hayre naa?
Yalla ɓanndu am na teeŋi hono njamndi mboɗeeri naa?
13 Si goonga mi waawataa wallude hoore am,
dabare am fuu riiwaama.
14 Torreteeɗo na haani yigoo mum holla ɗum hinney,
si waɗaay noon fu na holla yoppii kulol Jom Baawɗe.
15 Ammaa banndiraaɓe am koolnaaki hono gooruwol ɓadiingol re'ude,
hono naɗɗol ndiyam paltotooɗam law.
16 Iɓe laatii hono gooruuji ilooji cuddoriiɗi marmalluuje,
hono ɗi kodde marmalluuje suddi.
17 Si ɗi naangaama, ɗi majja,
si nguli waɗii fu, ɗi ɓeeɓan faa ɗi njoora koloŋ.
18 Si ɗi njokkii laawol majji,
ɗi naatii ladde yoornde fu, ɗi timman.*
19 Luumotooɓe wuro Teema ina miilii keɓan ndiyam ɗaam,
ƴuurooɓe leydi Seba du ina keɗii ɗam.
20 Ammaa jikke maɓɓe teeŋuɗo faa ɓe keɓa ɗam waati,
ɓe ngari ɓe tawi ɗam walaa, de ɓerɗe maɓɓe mbaati.
21 Wooɗi, joonin onon laatanii kam hono gooruuji ɗiin,
on nji'ii torraaji am de kulɗon.
22 Yalla na woodi nde mbiimi on kokkon kam moƴƴere naa?
Naa du mballiron kam jawdi mon faa mi daɗa baasi naa?
23 Yalla mi wi'ii on kisinon kam e junngo wayɓe kam,
naa du njoɓon ceede faa nyannguɓe njoppa kam naa?
24 Kollee kam ko ngaɗumi, de mi deƴƴinoo,
si mi woofii fu, paaminon kam ngol.
25 Konngol goongawol ina naawi koy,
ammaa ɗume pelooje mon ɗe pelata?
26 On ndartinan ko mbiimi naa?
Oɗon paɗɗa haala am ley henndu, miin mursuɗo jikke.
27 On ngaɗan cumnal fay dow atiime,
oɗon taƴa coggu faa connon yigoo mooɗon.
28 De joonin miɗo ŋaaroo on, ndaaree kam,
yalla mi fewanan on yitere e yitere naa?
29 Kay! Ngartee e goonga! Accon pelooje mon oonyiiɗe.
Ngartee! Annditon wo miin nii jeyi goonga.
30 Na woodi ko oonyii e haala am naa?
Oɗon miilii du mi waawaa maatude bone kewtuɗo kam o naa?