5
1 Wooɗi jonle, noddu!Ina woodi jaabotooɗo ma naa?
E ley seniiɓe, ina woodi mo ponndotoɗaa faa walle naa?
2 Tikkere puuyɗo warata ɗum,
mo ƴoƴaa du kiram halkata ɗum.
3 Mi yi'ii puuyɗo na waɗi ɗaɗi,
ammaa wakkati gooto wuro mum huɗaa.
4 Ɓiɓɓe muuɗum ngalaa no ndaɗira.
Sariya niisan ɓe to sarordu,
ɓe keɓataa kisinoowo ɓe.
5 Rafaaɓe nyaaman ko o remi,
accataa fay cuɓeteendi ley gi'e,
suunaaɓe du moɗan jawdi makko.
6 Si goonga tiiɗallaaji puɗataa gilla ley leydi,
torra ɓanngirtaa noon tan,
7 ammaa neɗɗo rimaama faa habda e torra,
hono no pette yiite pittirta dow.
8 Ammaa si wo miin fu, mi tewtan Laamɗo,
to makko mbullitotoomi.
9 O gaɗoowo kujje mawɗe ɗe mbaawaa fonndeede,
sakko limude kayeefiiji ɗi o waɗata.
10 O tomnoowo ƴuwoonde dow leydi,
neldoowo ndiyam yarna ladde.
11 Imo toowna leeƴuɗo,
imo hisina mo ɓernde mettunde.
12 Imo sankita dabareeji jom'en ƴoyre,
faa ɓe ndonka heɓude jaalorgal.
13 Imo nanngira jogiiɓe paamal ɓeen ƴoyre muɓɓen,
imo sankita dabare jom'en ƴoyre wakkati gooto.
14 Iɓe kawra e nimre hakkunde nyalooma,
iɓe memmemta nyalooma hono wo jemma.
15 Ammaa imo hisina lo'uɓe
e haala maɓɓe njuwooha hono kural,
imo danna ɗum'en e junngo jom semmbe.
16 Saabe ɗuum talka na woodi jikke,
hunnduko oonyiiɗo du wo ommbeteeko.
17 Ndaar! Barke woodanii mo Laamɗo eelti.
Ndelle taa wanyu feloore Jom Baawɗe.
18 Kanko woni nawnoowo, ammaa imo sawra nawnanɗe ɗeen,
imo barmina, de o danna du.
19 O hisinte e torra fay si wo ɗi torraaji jeegom naa jeɗɗi,
no torraaji poti fuu
bonandaaji ɗiin kewtataako ma.
20 Wakkati weelo o hisinte e maayde,
wakkati konu du o hisinte e kaafaahi.
21 A hisan tooke hunnduko,
si masiiba warii du a maatataa kulol.
22 A jalan masiiba e rafo,
a maatataa kulol kujje ladde.
23 Kaaƴe mbonnataa ngesa maaɗa,
a wondan e kujje ladde e jam.
24 A tawan jam ley wuro maa,
Si a taykake daabaaji maa a tawataa fuu ko nyaki.
25 A yi'an du ɓiɓɓe maa na ɓeydoo faa ɗuuɗa,
ƴuwdi maa ɗuuɗan hono huɗo.
26 A maayan wo a jom duuɓi keewɗi,
hono no gawri hoorirtee wuro si ɓenndii ni.
27 Ndaar, min kiinyii ɗum, min tawii wo hono noon.
Hettina, paamaa de ngolliraa ɗum.