Haala Elifas artiika: Bonɓe tan torretee
4
1 Wooɗi, Elifas Teemankeejo jaabii wi'i:2 — Si neɗɗo tefunoo haaldude e maaɗa,
ɗum mettinan ɓernde maa naa?
Ammaa moy waawata deƴƴinaade?
3 Si goonga, a ekintinii ɗuuɗɓe,
a semmbinɗinii ɓe ngalaa semmbe.
4 Haalaaji maaɗa ɓantii pergiiɗo,
a semmbinɗinii mo koppi muuɗum lokkiɗi.
5 De joonin kaa torra o warii e maaɗa,
iɗum metti ma.
O hewtii to maaɗa, de mbemmbiɗaa.
6 Wanaa kulol maa Laamɗo woni ko tuugiɗaa naa?
Wanaa laaɓal maa du woni jikke maa naa?
7 Miccita joonin! Yalla a meeɗiino yi'ude mo waɗaay ko boni na halkee naa?
Toy nji'uɗaa dartiiɓe kalkaa?
8 Miin le inan ko nji'umi:
remuɓe bonandaaji de aawi bone ɓeen,
wo kam'en peccantee ɗum.
9 Laamɗo foofan dow maɓɓe de ɓe lalla.
E puufuki tikkere muuɗum ɓe kalkirta.
10 Fay si laddeeru na woyra semmbe,
ɓinngel mayru du na ubba,
nyiiƴe majji kaa wo keleteeɗe.
11 Mawndu jaaliindu waasan ko nyaama de waata,
ɓikkoy rewru nduun du cankitoo.
12 Wooɗi, miin, haala nyuɗake wari to am,
nyoore yottake noppi am.
13 Ka warii hono koyɗol kulɓiniingol hakkunde jemma,
wakkati mo ɗoyngol teddungol nanngata yimɓe.
14 Kulol nanngi kam, miɗo dimmboo,
faa ƴi'e ɓanndu am fuu na ndiwna karkar!
15 Maatumi mbeelu ƴaɓɓii yeeso am,
de wakkati gooto curwol nanngi kam.
16 Nji'umi goɗɗum ina darii yeeso am,
ndaarumi de mi faamaay wo ɗum ɗume.
Fuu na deƴƴinii, de nanumi daande na wi'a:
17 «Yalla neɗɗo laatoto dartiiɗo yeeso Laamɗo naa?
Yalla tagaaɗo na laatoo laaɓuɗo yeeso taguɗo ɗum naa?
18 Ndaar, fay maccuɓe makko o hoolaaki,
maleyka'en e ko'e muɓɓen imo tawra ɗum'en rafi goonga,
19 sakko tagiraaɓe leydi,
fuɗɗiraaɓe sollaare,
dampeteeɓe hono gilɗi!
20 Fajiri iɓe ngondi e yonki,
de gilla futuro hewtaay ɓe niisete hono conndi,
ɓe kalkee faa abada,
walaa du taykiiɗo.
21 Yonkiiji maɓɓe taƴaa wakkati gooto,
hono hukum mo tiigorɗe mum ittaa,
ɓe maayii, ɓe keɓaay hakkillo.»