Haala Ayuuba artiika kuɗooha nyalaande nde rimaa
3 — Waɗu nyalaande nde ndimaami ndeen halka,
e jemmaare wi'unde «ɓinngel gorel reedaama!» ndeen.
4 Accu nyalaande ndeen laatoo nimre,
Laamɗo dow kammu du taa miccoo nde katin,
sakko jayngol yaynana nde.
5 Accu nimre niɓɓunde ɓaleere kurum jeyta nde,
accu duule tekkuɗe ommba nde,
accu ko niɓɓinta nyalooma hulɓina nde.
6 Jemmaare ndeen, accu nimre tekkunde teeta nde,
taa nde limee ley nyalaaɗe hitaande,
taa nde yi'ee ley balɗe lewru.
7 Accu jemmaare ndeen laatoo ɓolde,
taa ilinaali seyo nanee ley mayre.
8 Huɗooɓe nyalaaɗe du,
accu ɗum'en kuɗa nde,
waawuɓe umminde fay kuungal maayo kulɓiniingal ɓeen.
9 Accu koode jaynooje fajiri mayre mbaasa jayngol,
accu nde heɗoo yaynaneede, de nde waasa heɓde,
taa nde yi'a pooyngol,
10 sabo jemmaare ndeen haɗaay inna am heɓude reedu,
sakko nde haɗa gite am yi'ude torraaji.
11 Ɗume saabii mi maayaayno gilla nder reedu inna am?
Ko waɗi mburtodiimi e yonki?
12 Ko saabii tawaama hakkunde koppi inna am?
Ko waɗi enɗi kokki kam mi musina?
13 Sabo ndeen tawanno miɗo fukkinoo miɗo deƴƴinii,
ndeen tawan miɗo ɗaaninoo, miɗo fowti.
14 Ndeen tawan miɗo wondunoo e laamiiɓe e ardiiɓe laaminooɓe adunaaru,
mahannooɓe ko'e muɓɓen caabeeje,
15 naa du e ardiiɓe jom'en kaŋŋe,
hebbinnooɓe gure muɓɓen cardi.
16 Taweno mi uwanooɗo hono ɓinngel ngel wardaay e yonki,
hono ɓikkoy koy nji'aay jayngol abada.
17 Toon bonɓe celata bonandaaji muɓɓen,
toon tampuɓe keɓata powtiri.
18 Toon du kasunkooɓe njooɗorii ɓerɗe baaltiiɗe,
ɓe nanataa katin daaɗe doolɗunooɓe ɓe.
19 Mawɗo e pamaro fuu na toon,
maccuɗo wo kewtuɗo hoorem.
20 Wooɗi, ko saabii torriiɓe kokkaa juutal balɗe?*
Dume saabii de wonɓe ley kaaɗeefi kokkee yonki?
21 Jikke maɓɓe wo maayde ammaa nde waraay,
iɓe piloroo nde faa ɓuri no ɓe pilortoo jawdi cuuɗiindi.
22 Ɓe keewan weltaare e seyo si ɓe maayii,
ɓe kuyan si ɓe keɓii caabeeje.
23 Saabe ɗume neɗɗo hokkantee juutal balɗe,
neɗɗo mo laawol muuɗum faddaa,
ngol Laamɗo ommbi?
24 Uumaali am laatanake kam nyaamdu,
Gonɗi bullaali am na mbubbira hono gooruwol.
25 Sabo ko kulannoomi ɗuum hewtii kam,
Ko ndoggannoomi ɗuum saami dow am.
26 Ɓernde am fukkaaki,
hakkillo am waaltaaki,
fowtere walaa, torraaji tan ukkantoo kam.