Haala Laamɗo e Ibiliisa ɗiɗaɓa dow Ayuuba
2
1 Wooɗi, katin nyannde gomma du, maleyka'en Laamɗo Joomiraaɗo kawriti yeeso muuɗum, Ibiliisa du wari ley kawrital Joomiraaɗo ngaal. 2 De Joomiraaɗo ƴami Ibiliisa:— Toy ƴuuruɗaa?
Ibiliisa jaabii, wi'i:
— Miɗo waancoo ley adunaaru, miɗo yaha nokkuuje fuu miɗo wara.
3 Ndeen Joomiraaɗo ƴami mo, wi'i:
— Yalla a faamanii maccuɗo am Ayuuba naa? Mo hono muuɗum walaa ley adunaaru, wo neɗɗo laaɓuɗo, dartiiɗo, kulɗo kam, bosiiɗo ko boni fuu. Imo heddodii e laaɓal makko faa joonin, fay ko ngaɗɗaa mi halka mo ɓolum ɗuum fuu.
4 De Ibiliisa jaabii, wi'i:
— Ay! Yonki kam yoɓata yonki! Neɗɗo hokkan ko woodi fuu faa hisina yonki muuɗum. 5 Ammaa si a foortii junngo maa, a meemii ɓanndu makko fu, tannyoral o wurtoto e njaayri, o huɗe.
6 De Joomiraaɗo wi'i mo:
— Wooɗi ndelle, inani mo ley junngo maa. Ngaɗaa mo no njiɗɗaa, ammaa taa meemaa yonki makko.
7 Ndeen Ibiliisa dilli yeeso Joomiraaɗo, yehi wattowi nyawu ɓuuye mbonngu dow Ayuuba, ngu nanngi ɗum gilla njaaɓirdi koyɗe faa yottii hoore. 8 De Ayuuba hooƴi keltel heeɗoore, na nyaancoroo ɓanndu mum, ina jooɗii ley ndoondi.
9 Ndeen deekiiko wi'i mo:
— Faa joonin aɗa heddii e laaɓal maaɗa ngaal naa? Huɗu Laamɗo de maayaa.
10 Ammaa Ayuuba wi'i mo:
— Aɗa haalira hono debbo puuyɗo! Nde Laamɗo hokkunoo en ko wooɗi ndeen en njaɓii, de hokka en ko boni de caloɗen naa?
E ley ɗuum fuu, Ayuuba waɗaay hakke ley haala mum.
Garol yigiraaɓe Ayuuba
11 Ayuuba ina woodi yigiraaɓe tato, kam'en ngoni Elifas Teemankeejo e Bildat Suhankeejo e Sofar Naamankeejo. Nde ɓe nannoo kabaaru bone kewtuɗo Ayuuba ndeen, ɓe anniyii ɓe kawritan ɓe ngara faa ɓe njeewtida e muuɗum, ɓe mbaaltina ɓerndem. Ndeen mono e maɓɓe fuu ummii to woni. 12 Nde ɓe njottotonoo ndeen, ɓe kaynii mo to woɗɗi de ɓe annditaay mo. Ndeen ɓe ƴepti daaɗe maɓɓe ɓe mboyri semmbe, mono e maɓɓe fuu seeki kaddule muuɗum. Ɓe nokki leydi, ɓe paɗɗi dow, ndi saami dow ko'e maɓɓe. 13 Ɓe njooɗodii e makko e leydi jemma e nyalooma faa waɗi balɗe jeɗɗi. Fay gooto haaldaay e makko, sabo ɓe nji'ii naawalla makko oon no foti sattude.