Dewtere
Ayuuba
Haala dartaare Ayuuba
1
1 Ina woodunoo gorko gomma jeyaaɗo leydi Us bi'eteeɗo Ayuuba. Wo laaɓuɗo, dartiiɗo, kulɗo Laamɗo, bosiiɗo ko boni fuu. 2 O rimii ɓiɓɓe worɓe njeɗɗo e ɓiɓɓe rewɓe tato. 3 Imo woodi baali e be'i 7 000 e geelooɗi 3 000 e na'i 1 000 e araaji debbi 500, e maccuɓe ɗuuɗɓe sanne. Wo o neɗɗo tedduɗo sanne mo hono muuɗum walaa ley leyɗe lettugal fuu.4 Wooɗi, ɓiɓɓe makko ina ngaɗannoo weltaareeji. No ɓe ngaɗirta hakkunde maɓɓe kamɓe jokolɓe njeɗɗo ɓeen dey, mono fuu hooƴan nyalaande ley jeɗɗiire fuu nde waɗee to wuro muuɗum. Ɓe kawritan to wuro neɗɗo oon, de ɓe mbaantoo sakiraaɓe maɓɓe rewɓe tato ɓeen, ɓe nyaama ɓe njara. 5 Nde ɓe timminta jeɗɗiire weltaareeji fuu, Ayuuba nelanan ɓe ɓe ngara faa sena ɓe. Ndeen o dawa, o sakkana mono e maɓɓe fuu sadaka buleteeɗo, o wiitoo:
— Hasii ɓiɓɓe am ngaɗii hakke, kuɗii Laamɗo ley ɓerɗe muɓɓen.
Noon Ayuuba waɗirta wakkati weltaare maɓɓe fuu.
Haala hakkunde Laamɗo e Ibiliisa dow Ayuuba
6 Wooɗi, nyannde gomma maleyka'en Laamɗo Joomiraaɗo kawriti yeeso muuɗum. Ibiliisa du wari ley kawrital ngaal.
7 De Joomiraaɗo ƴami ɗum, wi'i:
— Toy ƴuuruɗaa?
Ibiliisa jaabii, wi'i:
— Miɗo waancoo ley adunaaru, miɗo yaha nokkuuje fuu miɗo wara.
8 Joomiraaɗo ƴami mo, wi'i:
— Yalla a faamanii maccuɗo am Ayuuba naa? Si goonga hono muuɗum walaa ley adunaaru. Wo neɗɗo laaɓuɗo, dartiiɗo, kulɗo kam, bosiiɗo ko boni fuu.
9 Ndeen Ibiliisa wi'i:
— Aɗa miilii wo ɓolum tan waɗi de Ayuuba laatii kulɗo maa naa? 10 Wanaa wo aan reeni mo, aɗa fiilii mo hono hoggo, kanko e wuro makko e ko o jogii fuu? A barkinii golleeji juuɗe makko, a lanyini mardiiji makko faa keewi ley leydi ndiin. 11 Ammaa si a foortii junngo maa, a halkii ko o woodi ɗuum fuu, tannyoral o wurtoto e njaayri, o huɗe.
12 De Joomiraaɗo wi'i mo:
— Wooɗi ndelle, inan ko o woodi fuu ley junngo maa. Ngaɗaa ko njiɗɗaa, ammaa taa meemaa ɓanndu makko.
Ndeen Ibiliisa dilli yeeso Joomiraaɗo.
Haala dartaare Ayuuba ley torra
13 Ndelle nyannde gomma ɓiɓɓe Ayuuba worɓe e rewɓe kawriti, ina nyaama ina njara inaboojam* lamminaaɗam to wuro hammadiijo oon. 14 De goɗɗo wari to Ayuuba, waddani ɗum kabaaru wi'i:
— Miɗen ngonnoo miɗen ndemra na'i demooji, araaji debbi du ina ndura ɗakkol ɗoon, 15 de wakkati gooto Sabankooɓe ukkii e amin, mbardi gollooɓe ɓeen kaafaaje, mbuuwi na'i ɗiin e araaji ɗiin fuu, ndillidi. Miin tan daɗi, de ngarumi faa mi humpite ɗum fuu.
16 Nde oon darinoo na haala ndeen, inan goɗɗo du yottii, wi'i:
— Yiite mannge ƴuurii kammu fiyii baali e durooɓe majji, nge wuli baali ɗiin e durooɓe ɓeen fuu! Miin tan daɗi, de ngarumi faa mi humpite ɗum fuu.
17 Nde oon darinoo na haala ndeen, goɗɗo du yottii, wi'i:
— Miɗen ngonnoo miɗen ndura geelooɗi, de Kaldiyankooɓe peccitake pecce tati kippii min, mbardi durooɓe ɓeen fuu kaafaaje, mbuuwi geelooɗi ɗiin fuu ndillidi. Miin tan daɗi, de ngarumi faa mi humpite ɗum fuu.
18 Nde oon darinoo na haala ndeen, inan goɗɗo du yottii, wi'i:
— Ɓiɓɓe maaɗa worɓe e rewɓe ina ngonnoo wuro mawniraaɗo muɓɓen, ina mbeltoo, na nyaama na njara inaboojam lamminaaɗam 19 de wakkati gooto henndu semmbiɗinndu ƴuuri ladde yoornde, ndu fiyi suudu nduun becce nay de ndu boɓɓii dow muɓɓen, ndu wari ɗum'en. Miin tan daɗi, de ngarumi faa mi humpite ɗum fuu.
20 Caggal Ayuuba nanii ɗum fu, ummii seeki kaddule muuɗum, femmbi hoore muuɗum, de hippii e leydi, 21 wi'i:
— E ɓolum mburtinoomi reedu inna am,
e ɓolum du coƴƴotoomi.
Joomiraaɗo hokki, wooɗi kam du jaɓti.
Barke woodanii innde Joomiraaɗo.
22 E ley ɗuum fuu, Ayuuba waɗaay hakke, wi'aay du Laamɗo waɗii ko haanaa.