No Daawda halfiniri Suleymaana nyiɓugol Suudu Laamɗo
28
1 Daawda hawrondini mawɓe Israa'iila fuu ley Urusaliima. Ɗum woni mawɓe lenyi e ardiiɓe geɓe gollanooɓe kaananke e mawɓe sordaasiiɓe 1 000 e ɓe 100 e ndaaranooɓe jawdi kaananke e cogge muuɗum e ɓiɓɓe muuɗum e winndooɓe e tinndinooɓe e konunkooɓe semmbiɗinɓe fuu. 2 Kaananke Daawda ummii darii de wi'i ɓe:— Sakiraaɓe am, lenyol am, kettindanee kam! Miɗo wondunoo anniya nyiɓande keesuwal Amaana Joomiraaɗo suudu, nokkuure fowtinorde, ɗo Laamɗo yaaɓa koyngal muuɗum. Mi waɗii segilgo nyiɓugol ngool. 3 Ammaa Laamɗo wi'ii kam: «Wanaa aan njeyi nyiɓande innde am suudu sabo a waɗii konuuji, a rufii ƴiiƴam.»
4 De e noon fuu, Joomiraaɗo, Laamɗo Israa'iila oon suɓake kam hakkunde suudu baaba am faa waɗa kam kaananke Israa'iila de ƴuwdi am laamoo faa abada. O suɓake Yahuuda laatoo ardiiɗo. O suɓake suudu baaba am hakkunde cuuɗi Yahuuda fuu. Hakkunde ɓiɓɓe baaba am du, wo miin o suɓii faa o waɗa kam laamiiɗo dow Israa'iila fuu. 5 Wooɗi Joomiraaɗo barkinirii kam ɓiɓɓe worɓe ɗuuɗɓe, de hakkunde ɓiɓɓe am ɓeen du, o suɓake Suleymaana faa jooɗoo dow jooɗorgal laamu makko, laamoo dow Israa'iila. 6 O wi'ii kam: «Wo ɓiya Suleymaana nyibata suudu am e galleeji am sabo mi suɓake ɗum faa laatanoo kam ɓiɗɗo gorko, miin du, mi laatanoo ɗum baabiiwo. 7 Mi tabintinan laamu muuɗum faa abada si heddodake e ɗowtanaade jamirooje am e sariyaaji am hono no worri hannden noon.»
8 Joonin oo, onon Israa'iilankooɓe, jamaare Joomiraaɗo, hawritinɓe yeeso Laamɗo meeɗen ɓee, ɗowtanee jamirooje Laamɗo. Ngaɗon ko Joomiraaɗo, Laamɗo mooɗon wi'i ɗuum pay, faa njeyton leydi lobbiri ndi. Gaɗa mooɗon du, ndi laatoo ndongu ɓiɓɓe mon faa abada.
9 Aan Suleymaana, suka am, anndaa Laamɗo am miin baaba maaɗa, de ngolliranaa ɗum e ɓernde ma fuu, e yonki ma fuu sabo Joomiraaɗo na hiinya ɓerɗe fuu, na anndi miilooji fuu. Si a filake o fu, o accan njiitaa o. Si a tottitake o du, o faɗɗete faa abada. 10 Ndaar joonin kaa, Joomiraaɗo suɓake ma faa nyiɓaa suudu seniindu. Ndelle semmbinɗin ɓernde maaɗa, ngaɗaa gollal ngaal.
Ndeen Daawda holli Suleymaana no nyiɓirta suudu Joomiraaɗo nduun.
No Daawda hokkiri Suleymaana natal suudu Laamɗo nduun
11 Daawda hokki ɓiyum Suleymaana diidol naarude suudu nduun e cuuɗi piiliiɗi ɗum e cuuɗi desirɗi e cuuɗi dowuuji e cuuɗi leyiiji e suudu keesuwal Amaana. 12 O holli ɗum no o yiɗiri galleeji suudu nduun ngaɗiree fuu, tawti cuuɗi piiliiɗi ndu e desirɗi jawdi suudu Laamɗo e kujje ceniiɗe. 13 O hokki ɗum ɗerewol to geɓe inɗe Almaami'en e Lewinkooɓe e laabi no golleeji ley suudu Joomiraaɗo ngaɗirtee e ɗo sii kujje gollirteeɗi ley suudu nduun fuu mbinndaa. 14 O holli teddeefi kaŋŋe gaɗirteeɗo kujje kaŋŋe fuu. O holli teddeefi cardi ngaɗirteendi kujje cardi fuu. 15 O holli teddeefi fitillaaji kaŋŋe e joƴƴinirɗi muɓɓen gaɗiraaɗi kaŋŋe tawti ɗi cardi e joƴƴinirɗi muɓɓen gaɗiraaɗi cardi fodde ko ngollitortee. 16 O holli teddeefi kaŋŋe gaɗirteeɗo taabaaje buuru, tawti teddeefi cardi ngaɗirteendi taabaaje goɗɗe. 17 O hokki teddeefi kaŋŋe dimo gaɗirteeɗo juwirɗe teewu e jarduɗe e mbiccirkoy e payenkoy e jarduɗe gaɗiraaɗe kaŋŋe e cardi. 18 O hokki teddeefi kaŋŋe dimo gaɗirteeɗo sakkirde ure. O holli natal ko wa'i hono torkooru ni. O wi'i Keruba'en ngaɗiree kaŋŋe na peerti bippeele muɓɓen na kuuri keesuwal Amaana Joomiraaɗo ngaal. 19 Daawda wi'i:
— Ɗum fuu wo e binndi junngo Joomiraaɗo hokkiri kam de holli kam no haani waɗiree.
20 Ndelle Daawda wi'i ɓiyum Suleymaana:
— Semmbinɗin ɓernde maaɗa, laatoɗaa cuusuɗo de ngollaa. Taa kulaa, taa ɓernde maaɗa diwna sabo Laamɗo Joomiraaɗo, Laamɗo am oon wondan e maaɗa. O tottitataako ma, o yoppataa ma faa nde gollal suudu makko ngaal fuu timmi. 21 Inan geɓe Almaami'en e Lewinkooɓe ndaaranooɓe golle ley suudu Laamɗo ɓeen. Yimɓe woɓɓe waawuɓe golle, harwuɓe mballete e golle ɗeen. Ardiiɓe e yimɓe fuu ɗowtanto haala maaɗa.