No yimɓe mballiri nyiɓgal suudu Laamɗo nduun.
29
1 Kaananke Daawda wi'i jamaare Israa'iila fuu:— Ɓiyam Suleymaana, mo Laamɗo suɓii oon na sunɗi, wooɗi du na lokkiɗi tafon. Ammaa gollal ngaal na mawni sanne sabo suudu nduun wanaa suudu ɓii Aadama, ammaa wo suudu Laamɗo Joomiraaɗo. 2 Mi segilorake nyiɓugol suudu Laamɗo am e baawɗe am fuu. Mi hawrondinii:
Kaŋŋe keƴoowo ko waɗirtee kaŋŋe fuu e cardi keƴoori ko waɗirtee cardi fuu e njamndi mboɗeeri keƴoori ko waɗirtee njamndi mboɗeeri fuu e njamndi ɓaleeri keƴoori ko waɗirtee njamndi ɓaleeri fuu e leɗɗe keƴooje ko waɗirtee leɗɗe fuu e kaaƴe dime bi'eteeɗe Onikis e kaaƴe daɗɗeteeɗe e takketeeɗe, tawti kaaƴe ɗelkooje ɗe siyiiji feere feere e kaaƴe dime korsuɗe e kaaƴe daneeje takketeeɗe ɗuuɗɗe.
3 Wooɗi du, baka ko kawrondinmi saabe nyiɓugol suudu Laamɗo am nduun ɗuum walaa, mi hokkii kaŋŋe am e cardi am fuu saabe no korsinirmi suudu Laamɗo nduun. 4 Mi hokkii kaŋŋe Ofir tonniiji 100 e cardi laaɓundi tonniiji 240 faa ŋarɗiniree maadiiji galle ɗeen. 5 Moy e mooɗon haajaa hokkude goɗɗum hannden saabe Joomiraaɗo faa walla bangal ko waɗirtee kaŋŋe e cardi e huunde fuu ko waɗirtee juuɗe?
6 Ndeen ardiiɓe cuuɗi e mawɓe lenyi Israa'iila e ardiiɓe sordaasiiɓe 1 000 e ɓe 100 e ardiiɓe gollanooɓe kaananke fuu mbi'i na njardii wallirde jawdi muɓɓen. 7 Ɓe kokki kaŋŋe tonniiji 170 e buuɗi kaŋŋe 10 000 e cardi tonniiji 340 e njamndi mboɗeeri tonniiji 600 e njamndi ɓaleeri tonniiji 3 400 saabe nyiɓgal suudu Laamɗo nduun. 8 Tawranooɓe kaaƴe dime korsuɗe fuu kokki ɗe Yehiyel, Gersoninke faa watta ɗe ley suudu jawdi Joomiraaɗo. 9 Yimɓe fuu ceyii saabe dokke yardamuye ɗe kokki ɗeen sabo ɓe kokkirii ɗe e ɓerɗe maɓɓe fuu saabe Joomiraaɗo. Kaananke Daawda du, seyii sanne.
No Daawda yettiri Joomiraaɗo
10 Daawda yetti Joomiraaɗo yeeso jamaare Israa'iila fuu, wi'i:
— Mi yettii ma, aan Joomiraaɗo, Laamɗo Israa'iila, laatiiɗo baaba amin faa abada . 11 Manngu e baawɗe e teddeengal e darja e annoora ngoodanii ma. Sabo ko woni dow kammu e ko woni e leydi fuu wo aan jeyi. Laamu wo aan woodani, Joomiraaɗo, aan toowɗo ɓuri huunde fuu oon. 12 Jawdi e teddeengal fuu to maaɗa ƴuurata. Wo aan laamii dow huunde fuu. Semmbe e baawɗe fuu e junngo maaɗa ngoni. Wo aan hokkata manngu e semmbe fuu.
13 Joonin, Joomiraaɗo, Laamɗo amin, miɗen teddine, miɗen mana innde maaɗa mawnde ndeen. 14 Miin wo mi moy? Yimɓe am ɓee wo ɗumeeɓe de min mbaawi hokkude dokke yardamuye hono ɗee? Ɗum fuu wo to maaɗa ɗum ƴuuri. Ko min kokkete ɗuum wo e junngo maaɗa ƴuuri. 15 Miɗen laatii weerɓe maa hoɗuɓe wakkati seeɗa tan yeeso maaɗa hono no maamiraaɓe amin ngorrunoo noon. Nguurndam amin ley adunaaru ndu na faltoo hono ɗoogi wooɗi jikke walaa. 16 Joomiraaɗo, Laamɗo amin, jawdi ɗuuɗundi ndi min kawrondini faa nyiɓaneɗaa suudu saabe innde maaɗa seniinde ndiin fuu wo e junngo maaɗa ƴuuri. Ɗum fuu wo aan jeyi.
17 Laamɗo am, miɗo anndi aɗa hiinya miilooji ɓernde neɗɗo fuu. Aɗa yiɗi dartaare. Mi hokkii ma dokke yardamuye ɗee fuu e ɓernde laaɓunde. Ɓernde am na seyii sanne ko yimɓe maaɗa wonɓe ɗo joonin ɓee fuu kokkata dokke muɓɓen yardamuye ɗuum. 18 Joomiraaɗo, Laamɗo maamiraaɓe amin Ibrahiima e Isiyaaka e Israa'iila, waɗu miilooji lobbi ɗiin keddoo ley ɓerɗe yimɓe maaɗa de kuccintinaa hakkillooji maɓɓe to maaɗa. 19 Hokku ɓiyam Suleymaana oon ɓernde dartiinde faa jogitoo jamirooje e sariyaaji e ekintinooje maaɗa. O ɗowtanoo ɗe de o nyiɓa suudu mawndu ndu cegilaniimi nduun.
No Suleymaana laatorii kaananke
20 Daawda wi'i jamaare Israa'iila fuu:
— Njettee Joomiraaɗo, Laamɗo mooɗon!
Jamaare ndeen fuu yetti Joomiraaɗo, Laamɗo maamiraaɓe muɓɓen. Ndeen ɓe leeƴinii, ɓe kippii yeeso Joomiraaɗo e yeeso kaananke.
21 Jaangoore majjum, ɓe ngaɗani Joomiraaɗo sadakaaji. Ɓe ngaɗani ɗum sadakaaji buleteeɗi: ga'i 1 000 e jawɗi 1 000 e njawkoy 1 000, tawti sadakaaji njaram ko ɗowtata kirsamaaji ɗiin. Ɓe ngaɗani Israa'iila fuu sadakaaji ɗuuɗɗi. 22 Nyannde ndeen, ɓe nyaami, ɓe njari yeeso Joomiraaɗo ley seyo manngo. Caggal ɗuum ɓe ngaɗi Suleymaana, ɓii Daawda oon kaananke ɗiɗaɓerde. Ɓe njoori nebbam dow hoore makko de ɓe ngaɗi o kaananke yeeso Joomiraaɗo. Ɓe njoori nebbam dow Sadok du, ɓe ngaɗi ɗum almaami.
23 Suleymaana jooɗii dow jooɗorgal laamu Joomiraaɗo, laatii kaananke, loomti bammum Daawda. O barkinaa de Israa'iila fuu na tokki ko o yamirta. 24 Ardiiɓe cuuɗi e mawɓe e hooreeɓe sordaasiiɓe, tawti ɓiɓɓe kaananke Daawda fuu na ɗowtanoo ko kaananke Suleymaana yamirta. 25 Joomiraaɗo mawnini Suleymaana yeeso Israa'iilankooɓe fuu. O teddini laamu muuɗum faa ɓuri kaanankooɓe artinooɓe ɗum fuu.
Haala maayde Daawda
26 Daawda ɓii Yesa laamii Israa'iila fuu. 27 O laamorii Israa'iila duuɓi 40, duuɓi jeɗɗi ley Heberon, ley Urusaliima du, duuɓi 33. 28 O maayi nder naywaaku makko, o kaarɗo duuɓi, o jom jawdi e teddeengal. Ɓiyiiko Suleymaana loomti mo laamii. 29 Kabaaru kaananke Daawda gilla puɗɗam laamu muuɗum faa e timmoodem fuu na winndaa ley dewtere annabi Samuwiila e nde annabi Natan e nde annabi Gad fuu. 30 Kabaaru ko o waɗi wakkati laamu makko e cuusal makko e ko hewtii o kanko e Israa'iila e laamuuji leyɗe fuu na winndaa ley dewte ɗeen.