No geɓe konunkooɓe ngollirta
27
1 Inan inɗe Israa'iilankooɓe gollanooɓe kaananke: Ardiiɓe cuuɗi muɓɓen e mawɓe sordaasiiɓe 1 000 e ɓe 100 e winndooɓe inɗe geɓe sordaasiiɓe. Ɓeen mbinndata yottagol e dillugol geɓe sordaasiiɓe lewru fuu faa hiɓɓa hitaande. Fedde fuu wo sordaasiiɓe 24 000.2 Fedde go'aɓerde jeyi doomude lewru go'aɓurdu. Yasobe'am ɓii Jabdiyel woni ardiiɗo maɓɓe. Worɓe makko wo 24 000. 3 Wo o gooto e ɓiɓɓe Peres. Wo kanko wonnoo hooreejo konunkooɓe lewru go'aɓurdu nduun fuu.
4 Fedde ɗiɗaɓerde nde lewru ɗiɗaɓurdu, wo Doday, ɓii Ahoha woni ardiiɗo. Miklot wonnoo ɗiɗaɓo makko, kam woni ardiiɗo sordaasiiɓe 24 000.
5 Fedde tataɓerde nde lewru tataɓurdu, wo Benaya ɓii almaami mawɗo Yehoyada, ardiiɗo almaami'en. Benaya oon wonnoo ardiiɗo sordaasiiɓe 24 000. 6 Benaya na laatinoo gorko cemmbiɗinɗo hakkunde ardiiɓe sordaasiiɓe 30 ɓeen. Kanko wonnoo ardiiɗo muɓɓen. Ɓiyiiko Amijabad na tawanoo ley fedde sordaasiiɓe nde o ardii ndeen.
7 Fedde nayaɓerde nde lewru nayaɓuru, Asahel sakiike Yo'ab woni ardiiɗo muɓɓen. Caggal makko, ɓiyiiko Jebadiya loomti o e ardaade sordaasiiɓe 24 000.
8 Fedde joyaɓerde nde lewru joyaɓurdu wo Samhut, Yisirahinke wonnoo ardiiɗo sordaasiiɓe 24 000.
9 Fedde jeegoɓerde nde lewru jeegaɓurdu, wo Ira ɓii Ikkes mo Tekowa wonnoo ardiiɗo sordaasiiɓe 24 000.
10 Fedde jeɗɗaɓerde nde lewru jeɗɗaɓurdu, wo Heles, Peloninke mo lenyol Efrayim wonnoo ardiiɗo sordaasiiɓe 24 000.
11 Fedde jeetataɓerde nde lewru jeetataɓurdu, wo Sibbekay mo Husa ley lenyol Jerakinkooɓe wonnoo ardiiɗo sordaasiiɓe 24 000.
12 Fedde jeenayaɓerde nde lewru jeenayaɓurdu wo Abiyejer mo Anatot ley lenyol Benyamin wonnoo ardiiɗo sordaasiiɓe 24 000.
13 Fedde sappoɓerde nde lewru sappoɓurdu wo Maharay mo Netofa ley lenyol Jerakinkooɓe wonnoo ardiiɗo sordaasiiɓe 24 000.
14 Fedde sappo e go'aɓerde nde lewru sappo e go'aɓurdu wo Benaya mo Piraton ley lenyol Efrayim wonnoo ardiiɗo sordaasiiɓe 24 000.
15 Fedde sappo e ɗiɗaɓerde nde lewru sappo e ɗiɗaɓurdu, wo Helday, mo Netofa ley lenyol Otniyel wonnoo ardiiɗo sordaasiiɓe 24 000.
No yimɓe leydi ndiin njooɗorii
Haala mawɓe leydi ndiin
16 Inan inɗe ardiiɓe lenyi Israa'iila:
Ley lenyol Ruben wo Eliyejer ɓii Jikiri.
Ley lenyol Simeyon wo Sefatiya ɓii Maaka.
17 Ley lenyol Lewi wo Hasabiya ɓii Kemuwel.
Ley lenyol Haaruuna wo Sadok.
18 Ley lenyol Yahuuda wo Elihu, mawno Daawda gorko.
Ley lenyol Isakar wo Omiri ɓii Mikayel.
19 Ley lenyol Jabulon wo Yisemaya ɓii Obadiya.
Ley lenyol Naftali wo Yerimot ɓii Asriyel.
20 Ley lenyol Efrayim wo Hoseya, ɓii Ajajiya.
ley feccere lenyol Manasa wootere wo Jowiila ɓii Pedaya.
21 Ley feccere lenyol Manasa nde leydi Galaad wo Iddo ɓii Jakariya.
Ley lenyol Benyamin wo Yaasiyel ɓii Abneer.
22 Ley lenyol Dan wo Ajarel ɓii Yeroham.
Ɓee ngoni ardiiɓe lenyi Israa'iila.
23 Daawda limaay worɓe ɓe kewtaay duuɓi 20 sabo Joomiraaɗo wi'iino ɗuuɗinan Israa'iilankooɓe hono no koode kammu ɗuuɗiri ni. 24 Yo'ab ɓii Seruya fuɗɗunoo limgal ngaal ammaa timminaay. Limoore ndeen waddiino tikkere Laamɗo mawnde dow Israa'iila. Limoore yimɓe halkuɓe ley tikkere ndeen winndaaka ley dewte kabaaruuji laamu kaananke Daawda.
Haala ndaaranooɓe jawdi laamu
25 Asmawet ɓii Adiyel ndaaranannoo cuuɗi desirɗi jawdi Kaananke.
Jonatan ɓii Ujjiya ndaaranannoo cuuɗi desirɗi jawdi ley gure e galluuje e kuɓeeje e cuuɗi toowɗi.
26 Eseri ɓii Kelub wonnoo mawɗo remooɓe.
27 Simey, mo Rama wonnoo mawɗo gollooɓe ley gese inabooje.
Jabdi mo Sefam wonnoo mawɗo ɓorooɓe inabooje e resooɓe inaboojam.
28 Ba'al-Hanaan mo Geder wonnoo mawɗo gollooɓe bangal leɗɗe jaytun e iri ƴibbe ley jaaye
Yohas wonnoo mawɗo gollooɓe ley cuuɗi desirɗi nebbam.
29 Sitiray mo Saron wonnoo mawɗo durannooɓe na'i ley durduɗe Saron.
Safat ɓii Adilay du, kam ndaaranannoo ɗi durduɗe naɗɗi.
30 Obil, Ismaa'iilanke halfinaa geeloobi.
Araaji du, Yediya, Meronotinke kalfinaa.
31 Baali e be'i kalfinaa Yajiiji, Hagarinke.
Ɓee fuu wo mawɓe ndaaranannooɓe jawdi kaananke Daawda.
Haala howruuɓe Daawda ɓurɓe ɓattaade ɗum
32 Jonatan bappaanyo Daawda laatinoo tindinoowo muuɗum. Imo laatinoo binndoowo jom anndal sanne. Yehiyel ɓii Akamoni ndaaranannoo ɓiɓɓe kaananke. 33 Ahitofel du, wo tindinoowo kaananke. Husay, Arkinke wonnoo yigoo kaananke. 34 Caggal Ahitofel, Yehoyada ɓii Benaya e Abiyatar loomti ɗum. Yo'ab wonnoo mawɗo konunkooɓe kaananke.