Haala Lewinkooɓe doomooɓe
26
1 Inan geɓe doomooɓe dammbuɗe suudu Joomiraaɗo: Ɓiɓɓe Koora wo Meselemiya, gooto e ɓiɓɓe Asaf.2 Meselemiya oon heɓi ɓiɓɓe worɓe. Jakariya woni afo makko. Yedihayel woni ɗiɗaɓo. Jebadiya woni tataɓo. Yatniyel woni nayaɓo. 3 Elam woni njoyaɓo. Yohanan woni njeegaɓo. Eliyohenay woni njeɗɗaɓo.
4 Laamɗo barkinii Obed-Edom hokki ɗum ɓiɓɓe worɓe: Semaya woni afo makko. Yehojabad woni ɗiɗaɓo. Yowa woni tataɓo. Sakar woni nayaɓo. Netanel woni njoyaɓo. 5 Amiyel woni njeegaɓo. Isakar woni njeɗɗaɓo. Pehultay woni njeetataɓo. 6 Ɓiyiiko Semaya rimi ɓiɓɓe worɓe laatiiɓe mawɓe cuuɗi muɓɓen. Iɓe laatinoo worɓe tedduɓe. 7 Inɗe ɓiɓɓe Semaya ɓeen wo: Otini e Refayel e Obed e Eljabad e sakiraaɓe muuɗum doomooɓe semmbiɗinɓe Elihu e Semakiya. 8 Ɓee fuu wo ɓiɓɓe Obed-Edom. Kamɓe e ɓiɓɓe maɓɓe e sakiraaɓe maɓɓe fuu wo ɓe worɓe semmbiɗinɓe, waawɓe golle muɓɓen sanne. Ɓe fuu wo ɓe worɓe 62.
9 Meselemiya heɓi ɓiɓɓe worɓe e sakiraaɓe semmbiɗinɓe 18. 10 Hosa, mo suudu Merari heɓi ɓiɓɓe worɓe. Simri woni mo bammum waɗi laatii ardiiɗo maɓɓe fay si wanaa kam woni afo. 11 Hilkiya woni ɗiɗaɓo. Tebaliya woni tataɓo. Jakariya woni nayaɓo. Ɓiɓɓe Hosa e sakiraaɓe muuɗum fuu wo 13.
12 Geɓe doomooɓe dammbuɗe ɓeen, ardiiɓe muɓɓen e sakiraaɓe muɓɓen fuu na ngollannoo ley suudu Joomiraaɗo nduun. 13 Ɓe ngaɗi cumnal dow jokolɓe e mawɓe fodde cuuɗi muɓɓen faa cenndiree dammbuɗe doometeeɗe ɗeen.
14 Cumnal ngaal hokki Selemiya doomude faro lettugal. Ɓiyiiko Jakariya laatinooɗo tindinoowo caahiiɗo oon du, cumnal ngaal hokki ɗum doomude faro soɓɓirre. 15 Obed-Edom hokkaa faro horɗoore de ɓiɓɓe muuɗum kennaa cuuɗi desirɗi. 16 Suppim e Hosa ndoomnaa faro gorgal e dammbugal Salleket kuccondirgal e laawol ƴeencoowol faro baamle. Geɓe doomooɓe ɗeen fuu na kuccondirnoo.
17 Nyannde fuu, Lewinkooɓe njeegom na ndooma faro lettugal. Nayo faro soɓɓirre, nayo faro horɗoore. To cuuɗi desirɗi toon du, ɗiɗo ɗiɗo nokkuuje ɗiɗi. 18 Suudu famardu takkoriindu faro gorgal nduun du, doomooɓe nayo faro laawol, ɗiɗo faro suudu nduun.
19 Ɗee ngoni geɓe doomooɓe dammbuɗe suudu Joomiraaɗo ɓe ƴuwdi Koora e ndi Merari.
Golle Lewinkooɓe goɗɗe
20 Hakkunde Lewinkooɓe na woodi gorko bi'eteeɗo Ahiya ndaaranoowo jawdi suudu Laamɗo e kujje ceniiɗe. 21 Ɓiɓɓe Ladan, ƴuuruɗo e Gerson ɓeen laatinoo ardiiɓe cuuɗi Ladan. Wo ɓe Yehiyelinkooɓe. 22 Ɓii Yehiyel e Jetam e sakiike muuɗum Jowiila fuu na laatinoo ndaaranannooɓe cuuɗi desirɗi jawdi suudu Joomiraaɗo. 23 Ley Amraminkooɓe e Yitseharinkooɓe e Heberoninkooɓe e Ujjinkooɓe ɓeen kaa, 24 Sebuwel ɓii Gersom, Gersom ɓii Muusaa laatinoo mawɗo ndaaranooɓe cuuɗi desirɗi jawdi. 25 Sakiraaɓe makko ɓe suudu Eliyejer wo: Rehabiya ɓii Eliyejer, Rehabiya rimi Esaaya. Esaaya rimi Yoram. Yoram rimi Jikiri. Jikiri rimi Selomit.
26 Selomit oon e sakiraaɓe muuɗum ndaaranannoo cuuɗi desirɗi kujje ceniiɗe ɗe Daawda e ardiiɓe cuuɗi e mawɓe sordaasiiɓe 1 000 e ɓe 100 e ardiiɓe konunkooɓe ceninnoo fuu. 27 Wo e ley jawdi ndi ɓe keɓi nder konuuji ɓe cenini faa gollitoree ley suudu Joomiraaɗo. 28 Ko annabi Samuwiila e Sawulu ɓii Kis e Abneer ɓii Neer e Yo'ab ɓii Seruya ceninnoo e ko seninanoo fuu halfinaa Selomit e sakiraaɓe muuɗum.
29 Baka golleeji ley suudu Joomiraaɗo walaa, hakkunde Yitseharinkooɓe, wo Kenaniya e ɓiɓɓe muuɗum cuɓaa faa laatoo winndooɓe e sarotooɓe ley laamu Israa'iila. 30 Ley suudu Heberon, wo Hasabiya e sakiraaɓe muuɗum worɓe tedduɓe 1 700 cuɓaa. Ɓeen kennanoo e ndaarande Israa'iila faro gorgal Urdun bangal golle Joomiraaɗo e golle kaananke fuu. 31 Ley lenyol Heberon, wo Yeriya wonnoo ardiiɗo muɓɓen fodde ƴuwdi muɓɓen. Ɗum hawri e hitaande capanɗe nayaɓerde laamu Daawda. Filnde waɗaa de tawaa worɓe suusuɓe semmbiɗinɓe na ngoni Yajer ley leydi Galaad. 32 Sakiraaɓe makko, worɓe semmbiɗinɓe 2 700 laatinoo ardiiɓe cuuɗi. Kaananke Daawda waɗi ɓe mawɓe yimɓe Ruben e Gad e feccere yimɓe Manasa bangal golle Laamɗo e golle muuɗum kam kaananke oon.