Taaniraaɓe Yahuuda woɓɓe
4
1 Ɓiɓɓe Yahuuda wo: Peres e Hesron e Karmi e Hur e Sobal. 2 Rehaya ɓii Sobal rimi Yahat, Yahat rimi Ahumay e Lahad. Kamɓe ngoni cuuɗi Soreyatinkooɓe. 3 Inan ƴuwdi puɗɗuɗo wuro Etam: Yesre'el e Isma e Yibbas. Innde sakiike maɓɓe debbo wo Haselelponi. 4 Penuwel woni baaba Gedor, Eser du, kam woni baaba Husa. Ɓee ngoni ɓiɓɓe Hur, afo Efrata, puɗɗuɗo wuro Baytilaama. 5 Asur, puɗɗuɗo wuro Tekowa na woodunoo rewɓe ɗiɗo na mbi'ee Heleya e Naara. 6 Naara rimani o Ahujjam e Hefer e Temeni e Haacastari. Ɓee ngoni ɓiɓɓe Naara. 7 Ɓiɓɓe Heleya wo Seret e Sohar e Etnan. 8 Kos rimi Anub e Hatsobeba e cuuɗi Aharel ɓii Haarum. 9 Na woodunoo gorko bi'eteeɗo Yabes, teddinaaɗo faa ɓuri sakiraaɓe muuɗum fuu. Inniiko inndiri o Yabes sabo rimii o ley torra. 10 Yabes noddi Laamɗo Israa'iila wi'i:— Miɗo nyaage mbarkinaa kam, njaajinaa leydi am, de kisinaa kam torraaji e masiibaaji, si aɗa wondi e am. Laamɗo du jaabii ŋaarnde makko ndeen.
11 Keluba, sakiike Suha gorko rimi Mehir. Mehir oon wonnoo baaba Eston. 12 Eston rimi Bayti-Rafaa e Paseya e Tehina puɗɗuɗo wuro galluure Nahas. Ɓee ngoni worɓe wuro Reka.
13 Ɓiɓɓe Kenas wo Otniyel e Seraya. Otniyel rimi Hatat. 14 Mehonotay rimi Ofera. Seraya rimi Yo'ab puɗɗuɗo wuro wi'eteengo Naɗɗol nyeenyuɓe sabo wo ɓe gollooɓe golle juuɗe.
15 Ɓiɓɓe Kaalibu ɓii Yefune wo: Iru e Ela e Na'am. Ɓii Ela na wi'ee Kenas.
16 Ɓiɓɓe Yehaleleyel wo Sif e Sifa e Tiriya e Asareyel.
17-18 Ɓiɓɓe Esra wo: Yeter e Mered e Efer e Yalon. Mered ɓaŋi ɓii Fira'awna debbo na wi'ee Bitiya. Bitiya oon rimi Mariyama e Sammay e Yisiba, puɗɗuɗo wuro Estemowa. Mered oon na woodunoo debbo Yahuudiyanke. Oon rimani o Yered, puɗɗuɗo wuro* Gedor e Heber puɗɗuɗo wuro Soko e Yekutiyel, puɗɗuɗo wuro Sanoha. 19 Ɓiɓɓe dee Hodiya sakiike Naham debbo wo: puɗɗuɗo wuro Keyila, Garminke e Estemowa, Maakatiyanke.
20 Ɓiɓɓe Simon wo: Amnon e Rinna e Ben-Hanan e Tilon. Ɓiɓɓe Iseyi wo: Sohet e Ben-Sohet.
21 Ɓiɓɓe Sela ɓii Yahuuda wo: Er, puɗɗuɗo wuro Leka e Lada puɗɗuɗo wuro Maresa e yimɓe lenyol golloowol gollal leppi ɗaatuɗi ley wuro bayti-Asebeya. 22 Yokim e worɓe Koseba e Yo'as e Saraf ɓaŋi rewɓe leydi Mo'ab de ngarti Yasubi-Lehem. Ɗum wo ko waɗunoo gilla arane. 23 Wo ɓe mahooɓe looɗe. Iɓe njooɗonoo dammbuɗe galluuje e ley gese e hoggooji. Wo ɗakkol kaananke ɓe keddotonoo iɓe ngollana ɗum.
Ƴuwdi Simeyon
24 Ɓiɓɓe Simeyon wo: Nemuwel e Yamin e Yarib e Jerak e Sawulu. 25 Sawulu rimi Sallum, Sallum rimi Mibsam. Mibsam rimi Misma. 26 Misma rimi Hammuwel. Hammuwel rimi Jakuura. Jakuura Simey. 27 Simey rimi worɓe 16 e rewɓe 6. Sakiraaɓe makko keɓaay ɓiɓɓe worɓe sanne. Lenyol maɓɓe ɗuuɗiraay hono no ngol Yahuuda noon.
28 Iɓe njooɗinoo ley Beerseba e Molada e Hasaar-Suwal 29 e Bilha e Esem e Tolad 30 e Betuwel e Horma e Siklag 31 e Bayti-Markabot e Hasar-Susim e Bayti-Birey e Saarahim. Ɗee ngoni galluuje maɓɓe faa hewti laamu Daawda. 32 Tawti gure piiliiɗe ɗe, ɗum woni Etam e Eyin-Rimmon e Token e Asan, galluuje joy, 33 e durduɗe muɓɓen fuu faa hewti Ba'al. Fodde taariki maɓɓe, nii woni inɗe maɓɓe e inɗe nokkuuje ɗe ɓe njooɗinoo.
34 Mesobab e Yamlek e Yosa ɓii Amasiya 35 e Jowiila e Yehu ɓii Yosibiya, Yosibiya ɓii Seraya, Seraya ɓii Asiyel, 36 tawti Eliyohenay e Yakoba e Yesohaya e Asaya e Adiyel e Yesimiyel e Benaya, 37 e Jija ɓii Sifey, Sifey ɓii Allon, Allon ɓii Yedaya, Yedaya ɓii Simri, Simri ɓii Semaya. 38 Ɓe inɗe muɓɓen mbinndaa ɓeen fuu wo ardinooɓe lenyi muɓɓen. Cuuɗi muɓɓen na ɗuuɗi sanne. 39 Ɓe njehi naarude Gedor, faa hewti lettugal naɗɗol saabe durngol kujje maɓɓe. 40 Ɓe tawi durduɗe lobbe e leydi njaajundi lobbiri keewndi jam e deƴƴere. Jooɗinooɓe toon arane wo taaniraaɓe Haam. 41 Yimɓe ɓe inɗe muɓɓen mbinndaa ɓeen ngari wakkati laamu Hesekiya, kalki hukumuuji e nokkuuje cuuɗorɗe tawanooɗe toon fuu. Yimɓe nokkuure ndeen fuu kalkaa. Ndeen ɓe njooɗii lunnde muɓɓen sabo nokkuure ndeen na wooɗani durngol. 42 Worɓe lenyol Simeyon 500 njehi dow baamle Seyiir. Pelatiya e Nehariya e Refaya e Ujjiyel ɓiɓɓe Yisey laatinoo ardiiɓe maɓɓe. 43 Kamɓe kalki Amalekinkooɓe heddinooɓe ɓeen de ɓe njooɗii nokkuuje muɓɓen faa warde hannden.