24
1 Ley balɗe ɗeen Nebukanesar kaananke Baabiila haɓdi e Yahuuda de dawrani Yehoyakim duuɓi tati. Caggal ɗuum Yehoyakim muurtani mo. 2 Joomiraaɗo waɗi Baabiilankooɓe e Siiriyankooɓe e Mo'abinkooɓe e Amoninkooɓe koni Yahuuda faa kalka ɗum fodde konngol ngol haalirnoo e kunnduɗe annabaaɓe muuɗum. 3 Wo e yamiroore Joomiraaɗo ɗum fuu ɗum hewtorii Yahuuda faa ittee yeeso muuɗum. Ɗum fuu, ɗum waɗi saabe hakkeeji Manasa ɗiin. 4 Wooɗi du, wo saabe ƴiiƴam yimɓe laaɓuɓe faa heewi tatteeji Urusaliima fuu ɗaam waɗi de Joomiraaɗo salii yaafaade ɓe.5 Kabaaru kaananke Yehoyakim keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda. 6 O maayi, o hawritowi e maamiraaɓe makko. Ɓiyiiko Yehoyakin loomti mo laamii. 7 Kaananke Misira du wurtaaki leydi muuɗum katin sabo kaananke Baabiila oon teeti jeyal makko fuu gilla pogowol Misira faa yotti maayo Efrat.
No Yehoyakin laamorii Yahuuda
(2 Kabaaruuji 36:9-10)
8 Nde Yehoyakin laamotonoo ndeen duuɓi muuɗum wo 18. O laamorii lebbi tati ley Urusaliima. Inniiko na wi'ee Nehusita ɓii Elnatan jeyaaɗo Urusaliima. 9 O waɗi ko boni yeeso Joomiraaɗo hono no baabiiko waɗirnoo noon.
No Nebukanesar nanngiri yimɓe Urusaliima
10 Wakkati oon, konunkooɓe Nebukanesar, kaananke Baabiila, ngari piilii Urusaliima. 11 Nebukanesar e hoore muuɗum du yottii galluure ndeen. 12 Ndeen Yehoyakin e innam e gollooɓe ley laamordu e mawɓe laamu e gollooɓe muuɗum heddiiɓe mburtii faa kokkita ko'e muɓɓen kaananke Baabiila oon. Kaananke oon watti ɓe ley kasu hitaande jeetataɓerde laamu muuɗum 13 de hooƴi jawdi ngonnoondi ley suudu Joomiraaɗo e ley laamordu fuu fodde no Joomiraaɗo wiirunoo. O taƴi kujje ɗe kaananke Suleymaana waɗirnoo kaŋŋe gonnooɗe ley suudu Joomiraaɗo fuu.
14 O nanngi yimɓe Urusaliima ardiiɓe e sordaasiiɓe e tafooɓe jamɗe e sehooɓe leɗɗe fuu, o heddaay fay gooto si wanaa yimɓe lokkaaɓe ley leydi ndiin. 15 O yaari Yehoyakin Baabiila, kam e innam e deekiraaɓe muuɗum e gollooɓe ley laamordu e hooreeɓe leydi ndiin fuu. 16 Konunkooɓe semmbiɗinɓe 7 000, tawti tafooɓe jamɗe e sehooɓe leɗɗe 1 000, ɓe fuu wo ɓe waawuɓe konu, o nanngi ɓe fuu o yaari Baabiila. 17 Ndeen Nebukadenesar hooƴi bappaanyo Yehoyakin bi'eteeɗo Mattaniya waɗi ɗum kaananke loomti Yehoyakin de wayliti innde muuɗum wi'i ɗum Sedekiya.
No Sedekiya laamorii Yahuuda
(Yeremiya 52:1-3; 2 Kabaaruuji 36:11-12)
18 Nde Sedekiya laamotonoo ndeen duuɓi muuɗum wo 21. O laamorii duuɓi 11 ley Urusaliima. Inniiko na wi'ee Hamutal ɓii Yeremiya jeyaaɗo Libina. 19 O waɗi ko boni yeeso Joomiraaɗo, hono no baabiiko Yehoyakim waɗirnoo. 20 Ɗum fuu ɗum hewtake Urusaliima e Yahuuda saabe tikkere Joomiraaɗo. Joomiraaɗo riiwi ɓe yeeso muuɗum.
No konunkooɓe Baabiila piilorii Urusaliima ɗiɗaɓerde
(Yeremiya 39:1-7; 52:4-11)
Sedekiya muurtani kaananke Baabiila.