25
1 Nyannde sappo lewru sappoɓurdu hitaande jeenayaɓerde laamu Sedekiya, Nebukanesar, kaananke Baabiila, wardi e sordaasiiɓe muuɗum fuu dammbugal galluure Urusaliima, ɓe piilii kokuwol galluure ndeen, ɓe tili leydi ɓe piilni ngol.2 Noon galluure ndeen ommbiraa faa hewti hitaande sappo e go'aɓerde laamu Sedekiya.
3 Nyannde jeenay lewru nayaɓurdu tawi rafo torri yimɓe ley galluure ndeen fuu, ko nyaamee fuu walaa. 4 Konunkooɓe Baabiila ɓeen njuli kokuwol piiliingol Urusaliima ngool. Ndeen konunkooɓe Urusaliima fuu ndoggi ley jemma, mburtorii dammbugal gonngal soɓɓundu sardiŋe kaananke, ɓe adi laawol Araba. 5 Konunkooɓe Baabiila ɓeen ndiiwi kaananke Sedekiya faa nanngowi ɗum ley njaayri Yeriko. Konunkooɓe muuɗum fuu cankiti njoppi ɗum. 6 Ndeen ɓe nanngi mo ɓe njaari wuro Ribila to kaananke Baabiila de ɓe carii mo toon. 7 Ɓe kirsi ɓiɓɓe Sedekiya yeeso muuɗum de caggal ɗuum ɓe itti gite muuɗum, ɓe kaɓɓiri ɗum callali njamndi mboɗeeri, ɓe njaari ɗum Baabiila.
Nanngeede Urusaliima ɗiɗaɓerde
(Yeremiya 39:8-10; 52:12-27; 2 Kabaaruuji 36:17-21)
8 Nyannde jeɗɗi lewru joyaɓurdu hitaande sappo e jeenayaɓerde laamu Nebukanesar, Nebujaradan golloowo muuɗum, hooreejo doomooɓe ɗum, naati Urusaliima. 9 O wuli suudu Joomiraaɗo e laamordu e cuuɗi gonnooɗi ley Urusaliima fuu. O halki cuuɗi hooreeɓe fuu. 10 Sordaasiiɓe Baabiila ɗowtirɓe mo ɓeen kawriti liɓi kokuwol piiliingol Urusaliima ngool.
11 Nebujaradan nanngi yimɓe heddinooɓe ley galluure e doggunooɓe tuubanowi kaananke Baabiila e yimɓe heddiiɓe fuu yaari ɗum'en Baabiila. 12 Ammaa o heddi yimɓe talkaaɓe faa ndema gese leydi ndiin wooɗi du ndooma leɗɗe mayri cabiije.
13 Baabiilankooɓe liɓi bimmbeeje njamndi mboɗeeri gonnooɗe ley suudu Joomiraaɗo de taƴi ɗe. Ɓe taƴi tallirkoy e taasawal manngal gaɗiraangal njamndi mboɗeeri bi'eteengal Maayo ngaal de ɓe njaari njamndi ndiin fuu Baabiila. 14 Ɓe kooƴi taasaaje e pelliiji e taƴirkoy e jarduɗe e ko waɗiraa njamndi mboɗeeri ko gollirtee ley suudu Joomiraaɗo fuu. 15 Ɓe kooƴi ɓoɓtirɗe ndoondi e taasahoy gaɗiraakoy kaŋŋe dimo e cardi ndimri fuu. 16 Bimmbeeje ɗiɗi ɗeen e taasawal manngal ngaal e tallirkoy kooy fuu Suleymaana waɗannoo ɗum suudu Joomiraaɗo. Teddeefi majjum waawaaka fonndeede. 17 Tooweefi bimmbeere arandeere ndeen wo piyanɗe 18. Kufune njamndi mboɗeeri mo piyanɗe tati na hippii dow mayre. Inde fiiliranoo callali e alhaali ɓiɓɓe rummaneeje gaɗiraaɗe njamndi mboɗeeri. Bimmbeere ɗiɗaɓerde ndeen du, wo noon pay waɗiraa.
18 Nebujaradan nanngi almaami mawɗo bi'eteeɗo Seraya tawti almaami ɗiɗaɓo bi'eteeɗo Sefaniya e reenooɓe dammbugal tato. 19 O nanngi gooto e mawɓe sordaasiiɓe e tindinooɓe kaananke njoyo tawanooɓe ley galluure ndeen. Katin o nanngi ardiiɗo konunkooɓe kalfinaaɗo limgal muɓɓen tawti woɓɓe 60 wonnooɓe ley galluure ndeen. 20 O waɗi ɓe kasunkooɓe de o yaari ɓe Ribila leydi Hamat to kaananke Baabiila toon. 21 Kaananke oon wari ɓe ley wuro Ribila toon. Noon Yahuudiyankooɓe nanngiraa njaaraa to woɗɗi e leydi muɓɓen.
No Gedaliya halfiniraa Yahuuda
(Yeremiya 40:1–41:18)
22 Nebukanesar waɗi Gedaliya ɓii Ahikam taan Safan laatii goforneer yimɓe heddiiɓe leydi Yahuuda ɓeen. 23 Nde hooreeɓe sordaasiiɓe e yimɓe muɓɓen nannoo ɗum fu, ngari to Gedaliya ley wuro Mispa. Inan inɗe maɓɓe: Ismaa'iila ɓii Netaniya e Yohanan ɓii Kareya e Seraya ɓii Tanhumet jeyaaɗo Netoofa Yaajaniya ɓii Maakatiyanke e yimɓe maɓɓe. 24 Gedaliya hunanii ɓe kamɓe e yimɓe maɓɓe fuu, wi'i ɓe:
— Taa kulee hooreeɓe Baabiila. Njooɗee ley leydi ndi, tokkon jamirooje kaananke Baabiila faa keɓon jam.
25 Ammaa Ismaa'iila ɓii Netaniya taan Elisama mo lenyol kaananke ummanii Gedaliya oon. Ley lewru jeɗɗaɓurdu, o wardi e worɓe sappo, ɓe mbari ɗum kam e Yahuudiyankooɓe e Baabiilankooɓe wondunooɓe e muuɗum Mispa fuu. 26 Ndeen yimɓe Yahuuda suka e mawɗo, fay hooreeɓe sordaasiiɓe fuu ndoggiri leydi Misira saabe kulol Baabiilankooɓe.
No Yehoyakin yaltiniraa kasu
(Yeremiya 52:31-34)
27 Hitaande capanɗe tati e jeɗɗaɓerde yaareede Yehoyakin kaananke Yahuuda oon Baabiila, Ewil-Merodak hooƴi laamu Baabiila. Nyannde noogay e jeɗɗi lewru sappo e ɗiɗaɓurdu, ley hitaande ndeen o yurmii Yehoyakin, o wurtini ɗum kasu. 28 O haaldiri e muuɗum yurmeende de o teddini ɗum faa ɓuri kaanankooɓe ommbidanooɓe e muuɗum ley Baabiila ɓeen fuu. 29 O ɓorti ɗum kaddule kasu de o waɗi ɗum nyaamdoowo e makko haddi ko heddi e nguurndam muuɗum fuu. 30 Kaananke oon na woodani mo ngeɗu nyannde fuu, faa haddi balɗe makko.