No Yosiya waɗiri amaana to Joomiraaɗo
(2 Kabaaruuji 34:29-32)
23
1 Wakkati oon kaananke Yosiya nelani mawɓe Yahuuda e Urusaliima fuu kawrita. 2 Caggal ɗuum, o naatidi e Yahuudiyankooɓe e jooɗiiɓe ley Urusaliima fuu ley suudu Joomiraaɗo, tawti almaami'en e annabaaɓe e yimɓe heddiiɓe sukaaɓe e mawɓe fuu. O janngani ɓe ko winndaa ley dewtere Tawreeta yi'itaande ley suudu Joomiraaɗo ndeen. 3 O darii dow bimmbeere o waɗi amaana yeeso Joomiraaɗo faa o ɗowtanoo ɗum, o tiigoo jamirooje e seedaakuuji e sariyaaji muuɗum e ɓernde makko e hakkillo makko fuu, o jokka haalaaji mbinndaaɗi ley dewtere ndeen fuu. Yimɓe fuu anniyii ɗowtanaade amaana oon.(2 Kabaaruuji 34:3-5)
4 Ndeen kaananke yamiri Hilkiya almaami mawɗo e almaami'en heddiiɓe e reenooɓe dammbugal mburtina kujje gaɗanooɗe ley suudu Joomiraaɗo faa teddiniree tooru Ba'al e Asera e annooraaji kammu ɗiin fuu. Ɗe mbulaa yaasin galluure Urusaliima ley gese gonɗe gooruwol Kidiron de ndoondi majje yaaraa galluure Baytila.
5 O itti almaami'en fewreeɓe ɓe kaanankooɓe Yahuuda njoƴƴinnoo na mbulana tooruuji feere feere ure dow nokkuuje cakkirɗe gonɗe ley gure Yahuuda e gure piiliiɗe Urusaliima fuu. Iɓe kirsananno Ba'al e naange e lewru e koode e annooraaji kammu goɗɗi fuu, dow nokkuuje ɗeen. 6 O wurtini leggal tooru Asera ngaal du ley suudu Joomiraaɗo, o yaari ngal yaasin Urusaliima ɗakkol gooruwol Kidiron de o wuli ngal o niisi ƴulɓe maggal faa laatii conndi de o faɗɗi ndi dow caabeeje talkaaɓe.
7 Caggal ɗuum, o liɓi cuuɗi waɗooɓe woykuuru saabe tooruuji muɓɓen gonnooɗi ley taliyaare fiilinde suudu Joomiraaɗo ɗiin e cuuɗi rewɓe sannyooɓe gude cuddirteeɗe tooru Asera ɓeen fuu. 8 O yamiri almaami'en wulannooɓe ure dow nokkuuje cakkirɗe gonɗe ley galluuje Yahuuda fuu ngara Urusaliima. O tuunini nokkuuje ɗeen gilla Geba faa yotti Beerseba. O fusi nokkuure sakkirde wonnde gere nano dammbugal Yoosuwa, ardiiɗo galluure ndeen. 9 Almaami'en nokkuuje cakkirɗe ɓeen ngalaa laawol ɓadaade sakkirde Joomiraaɗo ley Urusaliima, ammaa iɓe mbaawi nyaamdude e almaami'en sakiraaɓe maɓɓe buuru.
10 Yosiya tuunini sakkirde wi'eteende Toofet wonnde ley naɗɗol Ɓii-Hinnom, taa neɗɗo fuu wulana tooru Molek nduun ɓiyum katin. 11 O itti pucci ɗi kaanankooɓe Yahuuda ndarnunoo faa teddiniree naange gonnooɗi dammbugal suudu Joomiraaɗo, ɗakkol suudu Natan-Melek golloowo laamordu, jooɗiiɗo ley cuuɗi seraaji. O wuli torkooji pucci teddinirteeɗi naange ɗiin. 12 O liɓi cakkirɗe gonnooɗe dow suudu Ahas dowuuru, ɗe kaanankooɓe Yahuuda ngaɗunoo, tawti cakkirɗe ɗe Manasa nyiɓunoo ley taliyaaje suudu Joomiraaɗo ɗiɗi ɗeen fuu. O fusi ɗe fuu de o ɓoɓti leydi majje o faɗɗowi faa naɗɗol Kidiron.
13 O tuunini nokkuuje cakkirɗe tawanooɗe lettugal Urusaliima, gonnooɗe horɗoore Waamnde Halkere*, ɗe Suleymaana nyiɓannoo tooruuji nyiddiniiɗi, ɗiin ngoni Astarot ndu Sidoninkooɓe e Kemos ndu Mo'abinkooɓe e Milkom ndu Amoninkooɓe. 14 O fusi bimmbeeje tooruuji, o soppi leɗɗe Asera de o hebbini luunɗe majje ƴi'e maayɓe.
15 Katin Yosiya fusi nokkuure sakkirde nde Yerobo'am ɓii Nebat nyiɓunoo wuro Baytila de wattiri Israa'iilankooɓe e hakke ndeen. O fusi nde kayre e ko woni e mayre fuu. O wuli nde, o niisi ƴulɓe mayre faa laatii conndi de o wuli leggal tooru Asera ngaal.
16 Ndeen Yosiya ɓanti gite muuɗum ndaari piilol muuɗum de haaynii caabeeje dow waamnde. O waɗi ƴi'e gonnooɗe ley caabeeje ɗeen fuu kawrondinaa de mbulaa dow sakkirde ɗoon. O tuunini nde fodde konngol Joomiraaɗo ngol haalunoo e hunnduko nelaaɗo muuɗum ngool. 17 Ndeen gite makko caami e nyimngo gomma de o wi'i:
— Nyimngo ɗume nji'ammi ni?
Yimɓe galluure ndeen njaabii mo mbi'i:
— Wo saabeere Nelaaɗo Laamɗo ƴuurunooɗo Yahuuda, wari waɗi annabaaku ko ngaɗuɗaa dow sakkirde Baytila joonin oon.*
18 Ndeen o wi'i:
— Ndelle accee nde. Taa fay gooto meema ƴi'e makko.
Noon ƴi'e makko ɗeen acciraa, kanko e annabaajo jeyanooɗo Samariya oon fuu. 19 O halki nokkuuje cakkirɗe gonnooɗe ley Samariya ɗe kaanankooɓe nyiɓunoo de tikkiniri Joomiraaɗo ɗeen fuu. O halki ɗe hono no o halkirnoo ɗe Baytila noon pay. 20 O hirsi almaami'en nokkuuje cakkirɗe ɗeen fuu dow cakkirɗe muɓɓen de o wuli ƴi'e maayɓe dow nokkuuje ɗeen. Caggal ɗuum o yeccii Urusaliima.
No Yoosiya fuɗɗitiri iidi Faltagol
(2 Kabaaruuji 35:1, 18-19)
21 Kaananke yamiri ɓe ngaɗana Joomiraaɗo, Laamɗo maɓɓe iidi Faltagol fodde no winndiraa ley Dewtere Amaana ndeen. 22 Iidi Faltagol hono oon e manngu waɗaakano gilla jamaanu mo sarotooɓe ardiino Israa'iila faa e kaanankooɓe Yahuuda e Israa'iila fuu. 23 Wo ley hitaande sappo e jeetataɓerde laamu Yosiya iidi teddinde Joomiraaɗo oon waɗaa ley Urusaliima.
Timmoode laamu Yosiya
24 Yosiya itti daggadaaɓe e tiimooɓe e sii tooruuji fuu. O halki kujje nyiddiniiɗe ji'etenooɗe leydi Yahuuda e Urusaliima fuu faa o ɗowtanoo ko winndaa ley dewtere Tawreeta nde almaami Hilkiya yiiti ley suudu Joomiraaɗo ndeen. 25 Kaananke hono makko e tuubude ɗowtanoo Joomiraaɗo waɗaay gaɗa makko e yeeso makko fuu. O teddiniri Joomiraaɗo e ɓernde makko fuu e hakkillo makko fuu e semmbe makko fuu fodde no Tawreeta Muusaa wi'iri noon. 26 Ammaa e ɗuum fuu, Joomiraaɗo na nyangani Yahuuda sanne saabe golle bonɗe ɗe Manasa tikkiniri ɗum ɗeen. 27 Joomiraaɗo wi'i mi riiwan Yahuuda yeeso am, hono no ndiiwirmi Israa'iila noon. Mi yoppan galluure Urusaliima nde cuɓiimi, kam e suudu ndu mbi'unoomi, innde am tabitan e muuɗum nduun.
28 Kabaaru Yosiya keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda. 29 Ley nguurndam makko Fira'awna Neko, kaananke Misira, na wallannoo kaananke Asuura e konu ɗakkol Maayo Efrat. Kaananke Yosiya yehi faa haɓda e Neko wuro Megiddo. Wakkati ɓe kawrunoo pay, Neko wari mo. 30 Nde Yosiya maaynoo fuu, gollooɓe muuɗum kooƴi ɓanndum ngatti ley torkooru de ngartiri ɗum Urusaliima. O uwaa ley saabeere makko. Caggal ɗuum yimɓe leydi ndiin njoori nebbam dow hoore ɓiyiiko Yehowakas ngaɗi ɗum kaananke, loomti mo laamii.
No Yehowakas laamorii Yahuuda
(2 Kabaaruuji 36:2-4)
31 Nde Yehowakas laamotonoo ndeen duuɓi muuɗum wo 23. O laamorii lebbi tati ley Urusaliima. Inniiko na wi'ee Hamutal ɓii Yeremiya jeyaaɗo Libina. 32 O waɗi ko boni yeeso Joomiraaɗo hono no maamiraaɓe makko ngaɗirnoo noon. 33 Fira'awna Neko hawri e makko ley wuro Ribila leydi Hamat de nanngi mo haɓɓi, taa o laamoo Urusaliima. Fira'awna oon jaaltii leydi ndiin fuu de tilsinani ɓe yoɓude lampo kilooji kaŋŋe 30 e kilooji cardi 3 000. 34 O waɗi Eliyakim ɓii Yosiya laamii lunnde bammum Yosiya de o wayliti innde muuɗum wi'aa Yehoyakim. O yaari Yehowakas leydi Misira. Toon heddi faa maayde muuɗum.
35 Yehoyakim hokki Fira'awna ko ƴami ɗuum fuu. Ɗuum saabi de o tilsinani yimɓe yoɓude lampo fodde jawdi muɓɓen, faa o hokka Fira'awna.
No Yehoyakim laamorii Yahuuda
(2 Kabaaruuji 36:5-8)