No Yosiya laamorii Yahuuda
(2 Kabaaruuji 34:1-2, 8-28)
22
1 Nde Yosiya laamotonoo ndeen duuɓi muuɗum wo jeetati. O laamorii duuɓi 31 ley Urusaliima. Inniiko na wi'ee Yedida ɓii Adaya jeyaaɗo Boskat.2 O waɗi ko wooɗi yeeso Joomiraaɗo. O tokki laawol maamiiko Daawda. Fay nde wootere o seliraay nano maa nyaamo.
3 Hitaande sappo e jeetataɓerde laamu makko, o neli Safan binndanoowo mo, ɓii Asaliya, taan Mesullam, suudu Joomiraaɗo, o wi'i:
— 4 Njahaa to Hilkiya almaami mawɗo oon, faa o lima ceede gaddaaɗe ley suudu Joomiraaɗo, ɗe reenooɓe dammbugal njaɓata ɗeen fuu. 5 Ɓe kokka ɗe ardiiɓe golle moƴƴintingol suudu nduun faa njoɓa moƴƴintingol ko boni ley mayru fuu. 6 Ɓe njoɓa sehooɓe leɗɗe e nyiɓooɓe e mahooɓe de ɓe cooda leɗɗe e kaaƴe cehaaɗe, suudu nduun moƴƴintinee faa wooɗa. 7 Taa ɓe ƴama no ɓeen ngaɗi ceede ɗeen sabo wo ɓe gollooɓe hoolniiɓe.
8 Ndeen Hilkiya almaami mawɗo oon wi'i Safan:
— Mi tawii dewtere Tawreeta ley suudu Joomiraaɗo toon.
O hokki dewtere ndeen Safan janngi. 9 Nde janngunoo nde fu, yehi fillanowii kaananke kabaaru mayre wi'i:
— Gollooɓe maaɗa kawrondini ceede tawaaɗe ley suudu Joomiraaɗo ɗeen de ngatti ɗe e juuɗe ardiiɓe golle moƴƴintingol suudu ɓeen.
10 O ɓeydi o wi'i:
— Wooɗi du, Almaami Hilkiya hokkii kam dewtere.
O janngi nde yeeso kaananke. 11 Nde kaananke nannoo kabaaru binndaaɗo ley dewtere Tawreeta ndeen fuu, seeki kaddule muuɗum. 12 Wakkati oon o haaldi e Hilkiya e Ahikam ɓii Safan e Akibor ɓii Mikaya e Safan binndanoowo mo e Asaya balloowo kaananke, o wi'i ɗum'en:
— 13 Njehee ƴamowee Joomiraaɗo kabaaru am, miin e yimɓe Yahuuda fuu dow ko winndaa ley dewtere yiitaande ɗuum, sabo Joomiraaɗo tikkanii en sanne ko maamiraaɓe meeɗen kettindaaki haala mayre faa ɗowtanoo ko winndaa ley mayre ɗuum.
14 Ndeen almaami Hilkiya e Ahikam e Akibor e Safan e Asaya njehi to annabaajo debbo bi'eteeɗo Hulda, dee Sallum ɓii Tikeba taan Haras, deenoowo kaddule. Debbo oon na jooɗinoo Urusaliima, ley deende heyre. Ɓe pillanii mo haala kaan 15 de o wi'i ɓe:
— Mbi'on neluɗo on to am oon, inan ko Joomiraaɗo Laamɗo Israa'iila wi'i: 16 Mi waddan torra dow nokkuure ndeen e jooɗiiɓe e mayre fuu. Ko winndaa ley dewtere nde kaananke Yahuuda janngi ɗuum fuu laatoto. 17 Ɓe njoppii kam de ɓe mbulani allaaji goɗɗi ure faa ɓe mettinirii ɓernde am golleeji maɓɓe ɗiin. Saabe majjum tikkere am ummanake nokkuure ndeen hono yiite nge nyifataa.
18 Ammaa mbi'on kaananke Yahuuda neluɗo on oon: Inan ko Joomiraaɗo Laamɗo Israa'iila wi'i dow haalaaji ɗi nanuɗaa ɗiin. 19 Mi nani haala ma, sabo ɓernde ma hecciɗii de leeƴinɗaa hoore maaɗa, ceekuɗaa kaddule maaɗa mbulluɗaa yeeso am, nde mbi'unoomi mi waɗan nokkuure ndeen laatoo winnde huɗaande, kayre e jooɗiiɓe e mayre fuu. Nii Joomiraaɗo wi'i. 20 Saabe ɗuum mi waɗan kawritowaa e maamiraaɓe maaɗa ley saabeere e jam, taa nji'a bone oon.
Nelaaɓe ɓeen coƴƴii pillanowii ɗum kaananke.