No Manasa laamorii Yahuuda
(2 Kabaaruuji 33:1-10, 18-20)
21
1 Nde Manasa laamotonoo ndeen duuɓi muuɗum wo 12. O laamorii duuɓi 55 ley Urusaliima. Inniiko na wi'ee Hefsiba.2 O waɗi ko boni yeeso Joomiraaɗo, o jokki golleeji nyiddiniiɗi ɗi lenyi janani ngaɗannoo de Joomiraaɗo riiwi ɗum'en yeeso Israa'iilankooɓe ɗiin. 3 O nyiɓitii nokkuuje cakkirɗe ɗe baabiiko Hesekiya fusunoo. O waɗani tooru Ba'al cakkirɗe, tawti leggal tooru Asera, hono no Ahabi kaananke Israa'iila waɗirnoo noon. O sujidani annooraaji kammu, o teddini ɗum'en. 4 O nyiɓi cakkirɗe janane nder suudu Joomiraaɗo ley Urusaliima ndu Joomiraaɗo wi'unoo joƴƴinan innde muuɗum. 5 O nyiɓani annooraaji kammu ɗiin cakkirɗe ley taliyaaje piiliiɗe suudu Joomiraaɗo ɗiɗi ɗeen. 6 O waɗi ɓiyiiko sadaka buleteeɗo, imo waɗa tiimngal e golle ginnaaji feere-feere. Imo gollida e daggadaaɓe e sukunyaaɓe. O mettiniri ɓernde Joomiraaɗo e bonandaaji makko ɗuuɗɗi. 7 O waɗi leggal tooru Asera de o darni ngal ley suudu Joomiraaɗo ndu wi'unoo Daawda e ɓiyum Suleymaana:
— Ley suudu ndu, nder galluure Urusaliima nde cuɓiimi hakkunde lenyi Israa'iila fuu, wo ɗoon tabintinanmi innde am faa abada. 8 Wooɗi du, si Israa'iilankooɓe tinnake e ɗowtanaade ko njamirmi ɗum'en e hunnduko maccuɗo am Muusaa ɗuum fuu, mi accataa ɓe ndiiwee leydi ndi kokkumi maamiraaɓe maɓɓe ndiin.
9 Ammaa ɓe kettindaaki. Manasa majjini ɓe de ɓe ngaɗi hakkeeji faa ɓuri ɗi lenyi ɗi Joomiraaɗo halkunoo yeeso maɓɓe ɗiin.
10 Ndeen Joomiraaɗo haaldi e kunnduɗe maccuɓe muuɗum annabaaɓe wi'i:
— 11 Manasa kaananke Yahuuda waɗii ko nyiddinii, ko boni faa ɓuri ko Amorinkooɓe ngaɗunoo fuu, o wattii Yahuudiyankooɓe ley hakke ɗowtanaade tooruuji, 12 saabe ɗuum inan ko miin Joomiraaɗo Laamɗo Israa'iila mbiimi:
Mi waddan torra mawɗo dow Urusaliima e Yahuuda faa nanuɗo kabaaru majjum fuu noppi muuɗum iida. 13 Mi waɗan Urusaliima ko ngaɗumi galluure Samariya e suudu Ahabi. Mi mooytan Urusaliima hono no neɗɗo mooytirta taasaal faa laaɓa de hippa noon. 14 Mi yoppan yimɓe heddiiɓe ley lenyol ngol cuɓinoomi ngool, mi wattan ɓe e juuɗe wayɓe maɓɓe de nannga ɓe ngaɗowa maccuɓe. 15 Mi waɗan noon saabe ɓe ngaɗii ko boni yeeso am, wooɗi du ɓe celaay mettinde ɓernde am gilla nde mburtinnoomi maamiraaɓe maɓɓe Misira faa warde hannden.
16 Manasa du, rufii ƴiiƴam yimɓe laaɓuɓe faa ɗam hewti tatteeji Urusaliima fuu, tawti ko o wattunoo Yahuudiyankooɓe e waɗude ko boni yeeso Joomiraaɗo ɗuum.
17 Kabaaru Manasa keddiiɗo e ko golli e hakkeeji ɗi waɗi fuu na winndaa ley Dewtere Kabaaruuji Kaanankooɓe Yahuuda. 18 O maayi, o hawritowi e maamiraaɓe makko, o uwaa ley sardiŋe ɓaade makko, sardiŋe Ujja. Ɓiyiiko Amon loomti mo laamii.
No Amon laamorii Yahuuda
(2 Kabaaruuji 33:21-25)
19 Nde Amon laamotonoo ndeen duuɓi muuɗum wo 22. O laamorii duuɓi ɗiɗi ley Urusaliima. Inniiko na wi'ee Mesulemet ɓii Harus jeyaaɗo Yotoba.
20 O waɗi ko boni yeeso Joomiraaɗo hono no baabiiko Manasa noon. 21 O jokkii laawol muuɗum e waɗude ko boni. O ɗowtanii tooruuji ɗi baabiiko ɗowtantonoo, o sujidani ɗi. 22 O seli ɗowtanaade Joomiraaɗo Laamɗo maamiraaɓe makko, o tokkaay laawol muuɗum.
23 Gollooɓe makko njammbii mbari mo ley suudu makko. 24 Ammaa yimɓe leydi ndiin kawriti mbari ɓe fuu de ngaɗi ɓiyiiko bi'eteeɗo Yosiya loomti mo laamii.