No Hesekiya danniraa nyawu maayde
(Esaaya 38:1-8)
20
1 Ley balɗe ɗeen, Hesekiya nyawi nyawu saate. Annabi Esaaya ɓii Amos wari faa ndaara mo de wi'i:— Inan ko Joomiraaɗo wi'i: Cegilanoɗaa koreeji maaɗa, sabo nyawu ngu yoppataa ma.
2 Ndeen Hesekiya waylitii hippii e wecco suudu de nyaagii Joomiraaɗo wi'i:
— 3 Yaa Joomiraaɗo, miɗo ŋaare miccitoɗaa no mbuurdunoomi yeeso maaɗa e hoolnaare e ɓernde wootere. Mi waɗii ko wooɗi yeeso maaɗa.
Ndeen o wulli bojji cattuɗi.
4 Tawi Esaaya faltaaki suudu hakkundeeru de Joomiraaɗo haaldi e muuɗum wi'i:
— 5 Yecca de mbi'aa Hesekiya ardiiɗo yimɓe am oon: Inan ko Joomiraaɗo Laamɗo maammaa Daawda wi'i. Mi nani du'aare maaɗa, mi yi'i gonɗi maaɗa du. Ndelle mi dannete. Ley balɗe tati a waawan hewtoyde suudu Joomiraaɗo. 6 Wooɗi du mi ɓeydante duuɓi 15. Mi hisinte aan e galluure ndee fuu e junngo kaananke Asuura. Mi reenan galluure ndee saabe am e saabe maccuɗo am Daawda.
7 Esaaya wi'i:
— Ngaddee tamre ƴibbe.
Tamre ndeen waddaa de woggaa e ɓuuye kaananke ɗeen de daɗi.
8 Hesekiya ƴami Esaaya wi'i:
— Noy paamirammi Joomiraaɗo dannii kam, wooɗi du, ley balɗe tati mi waawan yahude suudu Joomiraaɗo?
9 Esaaya jaabii mo wi'i:
— Inan no paamirtaa konngol Joomiraaɗo ngool tabitan: toy njiɗɗaa ɗoogi ki yaha? Ki ɓeydoroo yeeso jaaɓanɗe sappo naa ki soƴƴoroo gaɗa jaaɓanɗe sappo?
10 Hesekiya jaabii wi'i:
— Ɗoogi ɓeydoroo yeeso ka tiiɗaa, ki soƴƴoroo gaɗa ni tiiɗi. Ndelle ki soƴƴoroo gaɗa njiɗumi.
11 Ndeen Annabi Esaaya ŋaarii Joomiraaɗo soƴƴina ki caggal de soƴƴini ki jaaɓanɗe sappo ɗeen dow jaaɓirɗe ɗe Ahas waɗunoo.
Timmoode laamu Hesekiya
(Esaaya 39:1-8)
12 Wakkati oon, Merodak-Baladan ɓii Baladan kaananke Baabiila neldi Hesekiya ɓataakiiji jowtiiru e dokkal ngam o nanii rafi cellal muuɗum. 13 Hesekiya huyani nelaaɓe ɓeen sanne de holli ɓe jawdi ndesaandi ley laamordu muuɗum fuu. Ɗum woni kaŋŋe e cardi e ure e nebbeele lobbe e kaɓitirɗe e ko resaa ley cuuɗi makko fuu. Walaa fuu ko o hollaay ɓe e ley laamordu e ko laatii jeyal laamu makko.
14 Ndeen Annabi Esaaya wari to Hesekiya wi'i ɗum:
— Toy yimɓe ɓee ƴuuri, ɗume ɓe mbi'i ma?
Hesekiya jaabii wi'i:
— Ɓe ƴuurii to woɗɗi sanne, faa leydi Baabiila.
15 Esaaya ƴami o wi'i:
— Ɗume kolluɗaa ɓe ley suudu maaɗa?
Hesekiya jaabii wi'i:
— Mi hollii ɓe huunde fuu ko woni ley suudu am. Walaa fuu ko cuuɗumi ɓe ley jawdi am.
16 Ndeen Esaaya wi'i mo:
— Hettina ko Joomiraaɗo wi'i: 17 Nyalaande warowan nde jawdi ngondi ley suudu maaɗa fuu ɓoɓtetee yaaree Baabiila, gilla ndi maamiraaɓe maaɗa pagginoo faa warde hannden. Fay gootum heddataako. Noon Joomiraaɗo wi'i. 18 Ɓiɓɓe maaɗa woɓɓe, ƴuuruɓe e maaɗa nanngete njaaree ley laamordu Baabiila. Toon ɓe coortetee de ɓe ngollana kaananke Baabiila.
19 Ndeen Hesekiya jaabii Esaaya wi'i:
— Konngol Joomiraaɗo ngool na wooɗi.
O rewti o wi'i ɗum saabanto kam jam e ndeenaagu haddi balɗe am fuu.