No Esaaya semmbinɗiniri Hesekiya
(Esaaya 37:1-9)
19
1 Nde kaananke Hesekiya nannoo haala kaan fu, seeki kaddule muuɗum, ɓornii bootooji de yehi naatowi ley suudu Joomiraaɗo. 2 O neli Eliyakim dawranoowo laamordu e Sebna binndanoowo laamiiɗo e almaami'en mawɓe to annabi Esaaya ɓii Amos. Ɓe fuu ɓe njehi iɓe ɓornii bootooji, 3 ɓe mbi'i mo:— Inan ko Hesekiya wi'i: Hannden, wo nyalaande mettorgal, nde kuddi e semteende. Hannden eɗen nandi e debbo mo ŋatawere muuɗum fuɗɗi de walaa semmbe ndimu. 4 Na hasii Joomiraaɗo, Laamɗo maaɗa nanan haalaaji ɗi dawranoowo laamordu Asuura nelaa faa yenna Laamɗo Buurɗo ɗiin fuu. Na hasii Joomiraaɗo hiitoto mo dow haalaaji ɗiin. Saabe majjum, miɗo ŋaare ngaɗanaa yimɓe lenyol meeɗen heddiiɓe du'aare.
5 Nde yimɓe laamordu kaananke Hesekiya ɓeen njahunoo kaaldowi e annabi Esaaya oon fu, 6 Esaaya jaabii ɓe wi'i:
— Inan ko mbi'oyton joomii'on: Joomiraaɗo wi'i, taa kulaa mbonkaaji ɗi nelaaɓe kaananke Asuura bonki kam ɗiin. 7 Mi wattan miilo e ɓernde makko faa nde o nani kabaaru gomma fu, o yeccoo leydi makko. Ndeen mi waɗa o wardee kaafaahi.
No kaananke Asuura mbonkorii Joomiraaɗo
(Esaaya 37:8-13; 2 Kabaaruuji 32:16-19)
8 Ndeen dawranoowo laamordu Asuura oon nani kaananke muuɗum dillii Lakis yehi galluure Libina na haɓda e mayre. O yehi toon o tawoy ɗum. 9 Wakkati oon kaananke nani Tiraka kaananke Kuus na wondi anniya haɓdude e muuɗum. O waɗi nelaaɓe katin njahaa to Hesekiya kaananke Yahuuda 10 mbi'a ɗum:
— Taa accu Laamɗo mo kooliɗaa oon hiile wi'e Urusaliima naatataa junngo am. 11 Aan e hoore ma aɗa anndi no kaanankooɓe Asuura kalkiri leyɗe ɗeen fuu. Yalla aɗa miila aan tan aɗa waawi hisude naa? 12 Allaaji leyɗe ɗeen mbaawii hisinde ɗum'en e juuɗe maamiraaɓe am naa? Ndaaraa galluuje ɗe ɓe kalki: Gojan e Karan e Rejef e Edeninkooɓe wonnooɓe Telassar. 13 Toy kaanankooɓe Hamat e Arpad e Sefarwayim e Hena e Iwa fuu ngoni?
Du'aare Hesekiya
(Esaaya 37:14-20)
14 Hesekiya jaɓi ɓataaki kiin e juuɗe nelaaɓe ɓeen, o janngi ki de o naatowi suudu Joomiraaɗo. O weɗɗiti ki yeeso muuɗum, 15 o ŋaarii ɗum o wi'i:
— Yaa Joomiraaɗo, Laamɗo Israa'iila, aan jooɗiiɗo hakkunde keruba'en, aan tan woni Laamɗo dow laamuuji adunaaru fuu, sabo wo aan tagi kammuu e leydi. 16 Joomiraaɗo, omtu noppi ma kettinoɗaa! Peertaa gite ma ndaara! Nanaa jennooje ɗe Sennakerib neldi ma ɗeen, aan Laamɗo Buurɗo. 17 Joomiraaɗo, wo goonga, kaanankooɓe Asuura kalkii lenyi ɗuuɗɗi e leyɗe muɓɓen. 18 Ɓe mbulii allaaji ɓeen. Ammaa ɗiin nganaa goongaaji, wo ko junngo ɓii Aadama waɗi, wo ɗi leɗɗe e kaaƴe. Ɗuum saabii de ɓe mbaawi halkude ɗi. 19 De joonin aan, Joomiraaɗo, Laamɗo amin, miɗen ŋaare kisinaa min e juuɗe kaananke o, faa leyɗe duuniyaaru fuu paama wo aan Joomiraaɗo tan woni Laamɗo.
Annabaaku Esaaya dow saamugol Sennakerib
(Esaaya 37:21-32)
20 Wakkati oon Esaaya neli Hesekiya wi'ee:
— Inan ko Joomiraaɗo Laamɗo Israa'iila wi'i: Mi nani du'aare maaɗa dow Sennakerib kaananke Asuura.
21 Inan ko mbi'umi dow makko:
Siyona na yawi ma,
Surbaajo oon na jalnore,
Urusaliima na yiilane hoore.
22 Aɗa anndi mo njennuɗaa de mbonkiɗaa naa?
Aɗa anndi mo pelɓuɗaa de ndaarduɗaa yawaara naa?
Wo Ceniiɗo mo Israa'iila pay!
23 Nelaaɓe maaɗa njennii Joomiraaɗo.
Mbiiɗaa: «Miin Sennakerib, e torkooji am ɗuuɗɗi
ƴeenyirmi to ɓuri toowude e leydi Liban,
faa mi soppa leɗɗe seddere ɓurɗe toowude
e leɗɗe sipire ɓurɗe fuu wooɗude
faa mi yottoo nokkuure ɓurnde fuu longitaade
e ladde ɓurnde sukkude.
24 Mi wasii ɓulli leydi njanandi de njarumi ndiyam majji.
Mi yoorniri maayooji Misira e teppe am.»
25 A faamaay miin Joomiraaɗo mi fodake ɗum ko ɓooyi naa?
Mi segilanake ɗum gilla arande.
Wo wakkati oo tabintinmi ɗum,
aan fusata galluuje cemmbiɗinɗe ɗeen fuu faa laatoo tile.
26 Semmbe jooɗiiɓe ley majje timmii,
iɓe ngondi wemmbere e semteende,
iɓe nanndi e huɗo gese hecco,
maa huɗo fuɗuko dow kummbudi cuuɗi
ɗayluko gilla rimaay.
27 Miɗo anndi nde njooɗiɗaa
nde njahataa e nde ngartataa fuu.
Miɗo anndi nde tikkanɗaa kam.
28 Saabe mi nani aɗa ɓernani kam
mawninkinaare ma du naati noppi am,
Mi wattan jammbuure e hinere maaɗa,
de mi watta labangal e hunnduko maa,
Mi yeccinirte laawol ngol ngarduɗaa ngool.
29 Aan Hesekiya du, inan maande holloore ɗum tabitan:
Hikka on nyaaman ngariiri,
mawuuri on nyaaman sunuuri
ammaa mawtuuri on aawan, taƴon,
de tiiroɗon leɗɗe dimooje nyaamon ko ɗe ndimi.
30 Ndelle heddiiɓe ley suudu Yahuuda fuu
ngaɗan ɗaɗi lugguɗi,
de ndima faa ɗuuɗa.
31 Ayyo, seeɗa keddiiɗo oon layan wurtoo Urusaliima,
hisuɓe ɓeen ƴuuran waamnde Siyona.
Wo yidde Joomiraaɗo mawnde waɗata ɗum.
32 Saabe majjum inan ko Joomiraaɗo wi'i dow kaananke Asuura:
O naatataa ley galluure ndeen;
O fiɗataa kure dow mayre;
Bawaaɗe makko ɓadataako nde,
O ƴolataa leydi faa o ƴeenya kokuuji mayre o naata.
33 Laawol ngol o ƴuuri ngool o soƴƴorto.
O naatataa ley galluure ndee.
Noon Joomiraaɗo wi'i.
34 Mi reenan galluure ndee,
mi hisinan nde saabe am e saabe maccuɗo am Daawda.
35 Ley jemma majjum, maleyka Joomiraaɗo fanti hoɗorde Asuurankooɓe de wari konunkooɓe 185 000. Nde weetunoo fu, maayɓe tan tawaa. 36 Ndeen Sennakerib kaananke Asuura oon hooti galluure muuɗum Niniwe. 37 Nyannde gomma imo woni ley suudu alla makko bi'eteeɗo Nisirok, imo teddina ɗum de ɓiɓɓe makko Adiramelek e Sarejer kippii mo, mbardi mo kaafaaje de ndoggiri leydi Ararat. Ɓiyiiko Esara-Hadon loomti mo laamii.