No Hesekiya laamorii Yahuuda
(2 Kabaaruuji 29:1-2)
18
1 Hitaande tataɓerde laamu Hoseya ɓii Ela kaananke Israa'iila, Hesekiya ɓii Ahas kaananke Yahuuda laamii. 2 Nde o laamotonoo ndeen duuɓi makko wo 25. O laamorii duuɓi 29 ley Urusaliima. Inniiko na wi'ee Abii ɓii Jakariya.3 O waɗi ko darti yeeso Joomiraaɗo, hono no maamiiko Daawda noon. 4 Wo kanko halki nokkuuje cakkirɗe, o heli bimmbeeje tooruuji, o soppi leggal tooru Asera ngaal. Katin, o sankiti mboddi ndi Muusaa waɗirnoo njamndi mboɗeeri ndiin, sabo wakkati oon tawii Israa'iilankooɓe na mbulananno ndi ure. Innde mayri wo Nehusitan.
5 Hesekiya watti hoolaare muuɗum e Joomiraaɗo, Laamɗo Israa'iila. Hono makko fuu waɗayno ley kaanankooɓe Yahuuda artinooɓe mo e sakitiiɓe mo fuu. 6 O haɓɓondiri ɓernde makko e Joomiraaɗo, o tottitaaki ɗum. O jogitii jamirooje ɗe Joomiraaɗo hokkunoo Muusaa. 7 Joomiraaɗo du na wondi e makko. O heɓi barke golleeji makko fuu. O muurtani kaananke Asuura de seli dawrande mo. 8 O haɓdi e Filistiyankooɓe de o jaalii ɗum'en faa yottii Gaaja e leyɗe piiliiɗe ɗum. O teeti gilla gure pamare ɗe cuuɗi toowɗi deenirɗi faa yaade galluuje mawɗe cemmbiɗinɗe.
No kaananke Asuura anniyorii teetude Yahuuda
9 Hitaande nayaɓerde laamu Hesekiya, Salmanasar, kaananke Asuura ummanii galluure Samariya de wardi e sordaasiiɓe muuɗum piilii nde. Ɗum hawri e hitaande jeɗɗaɓerde laamu Hoseya ɓii Ela kaananke Israa'iila. 10 Ɓe piilii nde faa waɗi duuɓi tati, de ɓe teeti nde timmoode hitaande tataɓerde ndeen. Ndelle wo hitaande jeegoɓerde laamu Hesekiya wooɗi du wo jeenayaɓerde laamu Hoseya ndeen Samariya teetaa. 11 Caggal ɗuum kaananke Asuura oon nanngi Israa'iilankooɓe yaari leydi muuɗum. O joƴƴini woɓɓe maɓɓe ley wuro Hala, woɓɓe du daande gooruwol Habor ɗakkol galluure Gojan, heddiiɓe ɓeen du, ley galluuje Mediyankooɓe.
12 Tiiɗorma oon fuu hewtake ɓe saabe ɓe kettindanaaki Joomiraaɗo, Laamɗo maɓɓe. Ɓe njeebake amaana e jamirooje muuɗum ɗe hokkunoo maccuɗo muuɗum Muusaa. Ɓe kettindanaaki mo, ɓe ngaɗaay ko o yamiri ɓe.
13 Hitaande sappo e nayaɓerde laamu Hesekiya, Sennakerib kaananke Asuura wari haɓdi e Yahuuda de teeti galluuje muuɗum cemmbiɗinɗe fuu. 14 Ndeen Hesekiya kaananke Yahuuda waɗi nelaaɓe njaha Lakis mbi'owa kaananke Asuura oon:
— Mi woofii, njaafoɗaa kam. Ammaa cawroɗaa ni, mboɗɗoɗaa kam. Ko njamirɗaa kam fuu mi waɗan.
Caggal ɗuum o doolɗi Hesekiya yoɓude kilooji kaŋŋe 900 e kilooji cardi 9 000. 15 Hesekiya hokki mo cardi ngonnoondi ley suudu Joomiraaɗo e ley laamordu muuɗum fuu. 16 Wo wakkati oon o heefi kaŋŋe mo o mooytunoo e gampuuje suudu Joomiraaɗo e bimmbeeje muuɗum fuu de o hokki kaananke Asuura oon.
No kaananke Asuura hulɓiniri Urusaliima
(Esaaya 36:2-22; 2 Kabaaruuji 32:9-16)
17 Ndeen kaananke Asuura oon neli hooreejo sordaasiiɓe e mawɗo gollooɓe e dawranoowo laamordu muuɗum njaadi e fedde sordaasiiɓe mawnde to Hesekiya ley Urusaliima. Ɓe ƴuuri galluure Lakis ɓe njottii Urusaliima, ɓe ndarii to gaafol ndiyam manngol ƴuuroowol weendu dowuuru takkiindu laawol ngesa lonnooɓe. 18 Ɓe peekii, ɓe ƴamani kaananke. Eliyakim ɓii Hilkiya mawɗo laamordu e Sebna binndanoowo laamiiɗo e Yoha ɓii Asaf kokkoowo kabaaruuji mburtii kawri e maɓɓe.
19 Ndeen dawranoowo laamordu Asuura oon wi'i ɓe:
— Mbi'on kaananke Hesekiya inan ko kaananke Asuura mawɗo oon wi'i: Wo dow ɗume njowuɗaa hoolaare maaɗa? 20 Ndelle aɗa miila haala hunnduko ɓola tan na waawi hokkude ma daliili e jaalorgal ley konu naa? Ndelle moy woni mo kooliɗaa de kaandinɗaa muurtande kam? 21 Inan aɗa hooloo kuɗol kelngol, nawnoowol tugiiɗo ɗum. Ɗuum woni Misira! Wo goonga du, noon Fira'awna kaananke Misira oon waɗata hooliiɓe ɗum fuu. 22 Si on mbi'ii: «Wo Joomiraaɗo, Laamɗo amin min koolii,» wanaa kam woni mo Hesekiya fusi nokkuuje muuɗum cakkirɗe e kirsirɗe de yamiri yimɓe Yahuuda fuu ngara cujida yeeso sakkirde wonnde Urusaliima ndeen tan naa?
23 Ndelle joonin sey ngaɗidaa e joomi amin kaananke Asuura oon amaana joonde e jam. Ndeen mi hokkete pucci 2 000, si tawi aɗa waawi heɓande hoore maaɗa waɗɗotooɓe! 24 Noy mbaawirtaa sottinde ɓurɗo fuu famɗude e sordaasiiɓe amin, aan jowuɗo hoolaare muuɗum e Misira faa nelda ɗum torkooji e dorbotooɓe, aan ɓolo o?
25 Ndelle a sikkii wanaa muuyɗe Joomiraaɗo ngaddi kam faa mi halka leydi ndi naa? Sey paamaa wo Joomiraaɗo kam wi'i kam: «Njahaa kalkowaa leydi ndi.»
26 Ndeen Eliyakim ɓii Hilkiya oon e Sebna e Yowa njaabii dawranoowo laamordu Asuura oon mbi'i:
— Miɗen ŋaare, taa kaaldaa e amin Ibraninkoore sabo min njiɗaa jooɗiiɓe dow kokuwol galluure ɓee paama ko mbi'oton. Haaldu min Araminkoore sabo miɗen nana.
27 Mawɗo laamordu oon jaabii ɓe wi'i:
— Yalla wo onon e joomii'on tan joomam neldi haala kaan naa? Wanaa jooɗiiɓe dow kokuwol ɓeen du kalkete faa nyaama doodiiji muɓɓen de njara cille muɓɓen hono no mooɗon noon naa?
28 Ndeen gorko oon ummii darii de feeki e Ibraninkoore wi'i:
— Kettinee ko kaananke Asuura mawɗo oon wi'i: 29 Taa njaɓon Hesekiya hiila on, sabo waawataa hisinde on e junngo am. 30 Taa njaɓon Hesekiya tilsinana on hoolaade Joomiraaɗo, na hiila on na wi'a sikke walaa Joomiraaɗo hisinan on, galluure ndee naatataa e junngo kaananke Asuura.
31 Taa kettinoɗon haala Hesekiya sabo inan ko kaananke Asuura wi'i:
— Paamiree e am, de kokkon kam ko'e mooɗon. Noon waɗata de mono e mooɗon fuu nyaama ɓiɓɓe cabiihi e ƴibbi muuɗum de yara ndiyam luggere muuɗum e jam, 32 fadde am e warude mi hooƴa on mi yaara leydi nanndundi e leydi mooɗon, leydi alkama e cabijam kesam, leydi buuru e cabiije, leydi nebbam jaytun kesam e njuumndi, faa mbuuron toon, taa maayon. Taa kettindee ko Hesekiya wi'ata Joomiraaɗo hisinan on ɗuum sabo wo fenanan on. 33 Yalla allaaji leyɗe goɗɗe mbaawii hisinde yimɓe muɓɓen e junngo kaananke Asuura fay nde wootere naa? 34 Toy allaaji Hamat e ɗi Arpad ngoni? Toy ɗi Sefarwayim e Hena e Iwa ngoni? Yalla allaaji Samariya mbaawii hisinde ɗum e juuɗe amin naa? 35 Hakkunde allaaji leyɗe ɗeen fuu, wo alla oye waawi hisinde leydi muuɗum e junngo am sakko mbi'on Joomiraaɗo mooɗon na waawi hisinde Urusaliima?
36 Ammaa yimɓe ɓeen fuu na ndeƴƴinii siw. Fay gooto jaabaaki sabo kaananke haɗiino ɓe jaabaade.
37 Caggal ɗuum Eliyakim ɓii Hilkiya mawɗo laamordu e Sebna binndanoowo laamiiɗo e Yoha ɓii Asaf kokkoowo kabaaruuji njeccii to Hesekiya na ceeki kaddule muɓɓen. Ɓe kumpiti mo ko dawranoowo laamordu Asuura oon wi'i ɗuum.