No Hoseya laamorii Israa'iila
17
1 Hitaande sappo e ɗiɗaɓerde laamu Ahas kaananke Yahuuda, Hoseya ɓii Ela laamii Israa'iila ley Samariya. O laamorii duuɓi jeenay. 2 O waɗi ko boni yeeso Joomiraaɗo, ammaa ko o waɗi ɗuum hewtaay ko kaanankooɓe Israa'iila artiiɓe mo ɓeen bonde.3 Salmanasar kaananke Asuura wari haɓdi e makko, jaalii mo, dawrani leydi makko de tilsinani mo yoɓude lampo. 4 Ammaa o faami Hoseya na segilanoo muurtande mo, sabo nelii woɓɓe njaha to Sow kaananke Misira, wooɗi du, neldaay mo lampo ngo jeynoo yoɓude mo hitaande fuu ngoon. Ɗum saabi de o nanngi ɗum, o watti ley kasu.
Timmoode laamu Israa'iila
5 Ndeen kaananke Asuura hippii leydi ndiin fuu, sordaasiiɓe muuɗum piilii galluure Samariya ndeen faa waɗi duuɓi tati. 6 Hitaande jeenayaɓerde laamu Hoseya, kaananke Asuura jaalii nde de nanngi Israa'iilankooɓe wonnooɓe toon fuu yaari leydi muuɗum. O joƴƴini woɓɓe maɓɓe ley wuro Hala, woɓɓe du daande gooruwol Habor ɗakkol galluure Gojan, heddiiɓe ɓeen du, ley galluuje Mediyankooɓe.
7 Ɗum fuu ɗum hewtake Israa'iilankooɓe saabe hakkeeji muɓɓen ɗi ngaɗi yeeso Joomiraaɗo, Laamɗo muɓɓen, burtinnooɗo ɗum'en leydi Misira e juuɗe kaananke Fira'awna. Ammaa ɓe mbosake laawol muuɗum de iɓe teddina allaaji goɗɗi. 8 Iɓe njokkii al'aadaaji lenyi ɗi Joomiraaɗo riiwunoo yeeso maɓɓe, wooɗi du, iɓe ndewi ko kaanankooɓe Israa'iila ngaɗata. 9 E ley cuccukka, ɓe ngaɗi Joomiraaɗo, Laamɗo maɓɓe ko haanaa waɗeede. Katin du, ɓe ngaɗani ko'e maɓɓe nokkuuje cakkirɗe ley galluuje maɓɓe e nder cuuɗi deenirɗi galluuje maɓɓe e nokkuuje maɓɓe mawɗe fuu. 10 Ɓe ndarnanii ko'e maɓɓe bimmbeeje tooruuji e leɗɗe tooru Asera dow tile toowɗe e ley leɗɗe bilitinɗe fuu. 11 Iɓe mbula ure dow nokkuuje maɓɓe cakkirɗe ɗeen, iɓe nyemmita lenyi ɗi Joomiraaɗo riiwunoo yeeso maɓɓe ɗiin. Noon ɓe keddorii iɓe ngaɗa ko boni ɗuum faa ɓe ummini tikkere Joomiraaɗo. 12 Ɓe ɗowtanii tooruuji de tawi Joomiraaɗo haɗiino ɓe waɗude ɗum. 13 Joomiraaɗo sappaniino Israa'iila e Yahuuda e kunnduɗe annabaaɓe muuɗum fuu imo wi'annoo ɓe:
— Njoppee laabi mooɗon bonɗi ɗi de njeccoɗon e jamirooje ɗe kokkumi maamiraaɓe mooɗon, ɗowtanoɗon ko nelumi maccuɓe am annabaaɓe kolla on ɗuum.
14 Ammaa ɓe kettindaaki, ɓe njoorni ko'e maɓɓe hono no maamiraaɓe maɓɓe calorinoo ngoonɗinde Joomiraaɗo, Laamɗo muɓɓen noon. 15 Ɓe paɗɗii jamirooje makko e amaana mo o waddunoo e baabiraaɓe maɓɓe oon, e huunde fuu ko o sappannoo ɓe de iɓe ndoggana tooruuji ɓoli faa kamɓe du, ɓe laati ɓolɓe. Ɓe njokki lenyi piiliiɗi ɓe, ɗi Joomiraaɗo wi'unoo taa ɓe nyemmita golle muɓɓen ɗiin. 16 Ɓe njoppi jamirooje Joomiraaɗo, Laamɗo maɓɓe ɗeen fuu de ɓe ngaɗani ko'e maɓɓe nga'oy kaŋŋe ɗiɗoy. Katin ɓe ndarni leɗɗe tooru Asera, ɓe kofii yeeso annooraaji kammu fuu de ɓe ɗowtanii tooru Ba'al. 17 Ɓe ngaɗi ɓiɓɓe maɓɓe worɓe e rewɓe sadaka buleteeɗo, iɓe ngaɗa ndaggadaaku e tiimngal. Ɓe cuɓii waɗude ko boni yeeso Joomiraaɗo, faa ɓe tikkini ɗum.
18 Joomiraaɗo ɓernani ɓe sanne de riiwi ɓe yeeso muuɗum. Lenyol Yahuuda tan o acci. 19 Ammaa fay kam'en duu ndeenaay jamirooje Joomiraaɗo, Laamɗo muɓɓen. Ɓe njokkii laabi Israa'iilankooɓe bonɗi ɗiin. 20 Joomiraaɗo tottii yimɓe Israa'iila fuu de torri ɗum'en. O wattii ɓe e juuɗe fiya-teeta'en faa o riiwi ɓe yeeso makko.
21 Nde Joomiraaɗo senndunnoo Israa'iila e suudu Daawda, de ɓe ngaɗi Yerobo'am ɓii Nebat laamiiɗo fu, Yerobo'am oon muurtini Israa'iilankooɓe tokkude Joomiraaɗo de watti ɗum'en e hakke mawɗo. 22 Gilla ndeen Israa'iilankooɓe ceedaay e hakkeeji ɗi Yerobo'am wattunoo ɗum'en ɗiin. Iɓe keddii e waɗude hakkeeji ɗiin, 23 faa nyannde Joomiraaɗo riiwi ɓe woɗɗini yeeso muuɗum hono no sapporinoo ɓe e kunnduɗe annabaaɓe muuɗum fuu noon. Wo noon Israa'iilankooɓe ndiiwiraa leydi muɓɓen njaaraa leydi Asuura. Toon ɓe keddii faa warde hannden.
No kaananke Asuura yaariri lenyi janani leydi Israa'iila
24 Kaananke Asuura waddoy yimɓe Baabiila e Kuta e Awa e Hamat e Sefarwayim, joƴƴini ɗum'en ley galluuje leydi Samariya faa loomta Israa'iilankooɓe. Ɓeen njeyti galluuje ɗeen ngaɗi toon joonnde muɓɓen.
25 Nde ɓe njottinoo nokkuure ndeen de ɓe ɗowtanaaki innde Joomiraaɗo fu, neldi ɓe dawaaɗi ladde mbari keewal maɓɓe. 26 Ɓe mbi'i kaananke Asuura:
— Yimɓe ɓe njoƴƴinoyɗaa ley galluuje Samariya ɓeen anndaa no alla leydi ndiin teddinirtee. Saabe ɗuum de alla oon neldi ɓe dawaaɗi ladde na mbara ɓe, sabo ɓe anndanaa diina muuɗum.
27 Ndeen kaananke Asuura wi'i:
— Ndelle, njaaree gooto e almaami'en nanngowanooɓe toon ɓeen jooɗodoo e mooɗon de janngina on no alla leydi ndiin teddinirtee.
28 Ndeen gooto hakkunde almaami'en jeyanooɓe Samariya ɓeen wartiraa jooɗii ley galluure Baytila. Imo janngina ɓe no ɓe teddinirta Joomiraaɗo.
29 Ammaa lenyol fuu waɗi alla muuɗum, ɓe ndarni ɗi ley nokkuuje cakkirɗe ɗe yimɓe Samariya njoppunoo. Lenyi ɗiin fuu ngaɗiri noon ley galluuje ɗe njooɗii ɗeen. 30 Yimɓe Baabiila ngaɗi tooru wi'eteendu Sukkot-Benot, ɓe Kuta ngaɗi tooru Nergal, ɓe Hamat du tooru Asima. 31 Yimɓe Awa ngaɗi tooru Nibihaja e ndu Tartak. Ɓe Sefarwayim du keddii na ada ɓiɓɓe muɓɓen na mbulana allaaji muɓɓen Adiramelek e Anamelek. 32 Iɓe kula Joomiraaɗo ammaa ɓe cuɓanake ko'e maɓɓe almaami'en faa ngaɗana ɓe sadakaaji ley nokkuuje cakkirɗe ɗeen. 33 Ndelle fay ko ɓe kulata Joomiraaɗo ɗuum fu, wo allaaji maɓɓe ni ɓe keddii iɓe ɗowtanoo, hono no al'aadaaji leyɗe maɓɓe noon.
34 Faa warde hannden iɓe tokki diinaaji maɓɓe arandeeji ɗiin. Ɓe kulataa Joomiraaɗo, ɓe tokkataa jamirooje e sariyaaji ɗi Joomiraaɗo yamiri ɓiɓɓe Yaakuuba mo inndiri Israa'iila. 35 Joomiraaɗo waɗidiinoo e maɓɓe amaana, yamiri ɓe, wi'i:
— Taa kulon allaaji goɗɗi, taa kofoɗon yeeso majji, taa ɗowtanoɗon ɗi, taa kirsanon ɗi. 36 Wo Joomiraaɗo burtinirɗo on leydi Misira e semmbe e baawɗe mawɗe, oon tan haani kulon. Wo kam tan njeyɗon hofaade yeeso muuɗum, wooɗi du, wo oon tan kaanɗon waɗande kirsamaaji. 37 Ndelle tinnee kaybanee tindinooje e sariyaaji e jamirooje ɗe o winndani on ɗeen wakkati fuu. Wooɗi du taa kulon allaaji goɗɗi. 38 Taa njeggiton amaana mo ngaddunoomi e mooɗon, wooɗi du taa kulon allaaji goɗɗi. 39 Joomiraaɗo, Laamɗo mooɗon kam tan haani kulon. Wo kanko hisinta on e juuɗe wayɓe on fuu.
40 Ammaa ɓe kettindaaki. Ɓe keddake e waɗude al'aadaaji maɓɓe arandeeji.
41 Noon lenyi ɗiin kulirannoo Joomiraaɗo ammaa na keddii e ɗowtanaade tooruuji muɓɓen. Noon du ɓiɓɓe maɓɓe e taaniraaɓe maɓɓe keddorii faa warde hannden.