No Ahas laamorii Yahuuda
(2 Kabaaruuji 28)
16
1 Hitaande sappo e jeɗɗaɓerde laamu Peka ɓii Remaliya, Ahas ɓii Yotam kaananke Yahuuda laamii. 2 Nde o laamotonoo ndeen duuɓi makko wo 20. O laamorii duuɓi 16 ley Urusaliima.O waɗaay ko darti yeeso Joomiraaɗo, Laamɗo makko, hono no maamiiko Daawda noon. 3 O tokkii laabi kaanankooɓe Israa'iila. O adi ɓiyiiko o waɗani tooruuji sadaka buleteeɗo hono al'aada nyiddiniiɗo mo lenyi ɗi Joomiraaɗo riiwunoo yeeso Israa'iilankooɓe ɗiin. 4 Imo wula ure, wooɗi du, imo waɗa sadakaaji dow nokkuuje cakkirɗe e dow baamle e ley leɗɗe bilitinɗe.
5 Ndeen Resin kaananke Siiriya e Peka ɓii Remaliya kaananke Israa'iila ngari faa kaɓda e Urusaliima. Ɓe piili Ahas ley galluure ndeen ammaa ɓe njaalaaki mo. 6 Tawi wakkati oon Resin kaananke Siiriya teetiino galluure Eylat. O riiwi Yahuudiyankooɓe jooɗinooɓe ɗoon de Edominkooɓe naati nde njooɗii faa warde hannden.
7 Ahas waɗi nelaaɓe njaha to Tigilat-Pileser kaananke Asuura mbi'a ɗum:
— Miin wo mi ɓiya, wooɗi du wo mi maccuɗo maaɗa. Miɗo ŋaare ngaraa kisinaa kam e juuɗe kaananke Siiriya e mo Israa'iila ummaniiɓe kam ɓeen.
8 O hooƴi kaŋŋe e cardi gonnooɗo ley suudu Joomiraaɗo e jawdi ndesanoondi ley laamordu fuu o neldi kaananke Asuura.
9 Kaananke Asuura oon jaɓi ŋaarnde makko ndeen de yehi teetowi galluure Damas. Wooɗi du, nanngi yimɓe mayre fuu yaari ɗum'en leydi Kir de wari Resin kaananke Siiriya oon.
10 Kaananke Ahas yehi Damas faa hawrowa e Tigilat-Pileser kaananke Asuura de yi'i sakkirde Damas toon. O neldi almaami Uriya natal mayre faa nyiɓa hono mayre pay. 11 Uriya du tiimi natal ngaal de nyiɓi sakkirde hono mayre pay gilla o wartaay. 12 Nde o ƴuurunoo Damas o warti fuu, o yi'i sakkirde ndeen de o ɓattitii, o ƴeenyi nde. 13 O sakki sadaka buleteeɗo e sadaka conndi e sadaka njaram de sakitii o wisi ƴiiƴam sadakaaji jeɗeteeɗi dow mayre. 14 O ɗoofi sakkirde njamndi mboɗeeri ɗo wonnoo yeeso Joomiraaɗo hakkunde sakkirde heyre e suudu Seniindu ɗoon. O darnowi nde soɓɓirre sakkirde heyre ndeen. 15 O yamiri almaami Uriya, o wi'i:
— Dow sakkirde heyre ndee ngaɗataa sadakaaji buleteeɗi fajiri e sadaka conndi gaɗeteeɗo futuro fuu oon, tawti sadaka kaananke buleteeɗo e sadaka muuɗum conndi, e sadakaaji yimɓe buleteeɗi fuu e sadakaaji muɓɓen conndi e sadaka njaram de mbiccaa ƴiiƴam kirsamaaji ɗaam fuu dow mayre. Sakkirde njamndi mboɗeeri hiinnde ndeen du, mi ndaaran no ngaɗanmi ɗum.
16 Uriya waɗiri ɗum fuu no kaananke Ahas yamiri noon.
17 Katin kaananke senti alluuje gonnooɗe e tallirkoy, itti taasaaje makkoy. Wooɗi du, o yowti taasawal manngal bi'eteengal Maayo dekanoongal dow ga'i 12 gaɗiraaɗi njamndi mboɗeeri ngaal de o joƴƴini ngal dow samande kaaƴe. 18 O wayliti danki kuuraaki dow laawol kaananke naatirgol suudu Joomiraaɗo nyannde fowteteende faa o welna ɓernde kaananke Asuura.