No Ajariya laamorii Yahuuda
(2 Kabaaruuji 26:3-4, 16-23)
15
1 Hitaande noogay e jeɗɗaɓerde laamu Yerobo'am ɗiɗaɓo kaananke Israa'iila, Ajariya ɓii Amasiya kaananke Yahuuda laamii. 2 Nde o laamotonoo ndeen duuɓi makko wo 16. O laamorii duuɓi 52 ley Urusaliima. Inniiko na wi'ee Yekoliya jeyaaɗo Urusaliima.3 O waɗi ko darti yeeso Joomiraaɗo hono no baabiiko Amasiya waɗirno noon. 4 Ammaa fay e noon, nokkuuje cakkirɗe pusaaka. Ndelle yimɓe na keddii na mbula ure, na ngaɗa sadakaaji dow majje.
5 Joomiraaɗo saamini nyawu nguru dow makko, o heddodii e majjum ley suudu feere faa o maayi. Ɓiyiiko Yotam dawranta laamu leydi ndiin wakkati oon.
6 Kabaaru Ajariya keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda. 7 O maayi, o hawritowi e maamiraaɓe makko. O uwaa ley Galluure Daawda. Ɓiyiiko Yotam loomti mo laamii.
No Jakariya laamorii Israa'iila
8 Hitaande capanɗe tati e jeetataɓerde laamu Ajariya kaananke Yahuuda, Jakariya ɓii Yerobo'am laamii Israa'iila ley galluure Samariya. O laamorii lebbi jeegom.
9 O waɗi ko boni yeeso Joomiraaɗo, hono no baabiraaɓe makko ngaɗirnoo noon. O seedaay e hakkeeji ɗi Yerobo'am ɓii Nebat wattunoo Israa'iilankooɓe ɗiin.
10 Ndeen Sallum ɓii Yabes jambii wari mo yeeso jamaare ndeen de loomti mo laamii.
11 Kabaaru Jakariya keddiiɗo na winndaa ley Dewtere Kabaaruuji Kaanankooɓe Israa'iila. 12 Noon konngol Joomiraaɗo ngol haaldunoo e Yehu ngool tabitiri nde wi'unoo ɗum:
— Ɓiɓɓe maaɗa njooɗoto dow jooɗorgal laamu Israa'iila faa yottoo taana tataɓo.
Goonga du, wo noon ɗum tabitiri.
No Sallum laamorii Israa'iila
13 Sallum ɓii Yabes laamii Israa'iila ley hitaande capanɗe tati e jeenayaɓerde laamu Ujjiya kaananke Yahuuda. O laamorii lewru wooturu ley Samariya. 14 Menahem ɓii Gadi ƴuuri Tirsa yottii Samariya, wari mo de loomti mo laamii.
15 Kabaaru Sallum keddiiɗo, e jammba mo waɗi fuu na winndaa ley Dewtere Kabaaruuji Kaanankooɓe Israa'iila.
16 Nde Menahem laaminoo fu, dilli Tirsa de halkowi galluure Tifsa e yimɓe mayre fuu tawti yimɓe leydi muuɗum, sabo ɓe njaɓaay omtande mo dammbugal mayre. O seeki deedi debereeduuɓe fuu.
No Menahem laamorii Israa'iila
17 Hitaande capanɗe tati e jeenayaɓerde laamu Ajariya kaananke Yahuuda, Menahem ɓii Gadi laamii Israa'iila ley Samariya. O laamorii duuɓi sappo.
18 O waɗi ko boni yeeso Joomiraaɗo. Haddi nguurndam makko fuu o seedaay e hakkeeji ɗi Yerobo'am ɓii Nebat wattunoo Israa'iilankooɓe ɗiin.
19 Pul kaananke Asuura umminani leydi Israa'iila fitina. Ndeen Menahem hokki mo kilooji cardi 34 000 faa o walla ɗum semmbinɗina laamu muuɗum. 20 Menahem doolɗi Israa'iilankooɓe jogiiɓe jawdi yoɓude lampo. Tilay neɗɗo fuu hokka buuɗi cardi 50. Cardi ndiin o hawrondini o hokki kaananke Asuura de yeccii leydi muuɗum acci mo.
21 Kabaaru Menahem keddiiɗo e ko waɗi fuu na winndaa ley Dewtere Kabaaruuji Kaanankooɓe Israa'iila. 22 O maayi o hawritowi e maamiraaɓe makko. Ɓiyiiko Pekahiya loomti mo laamii.
No Pekahiya laamorii Israa'iila
23 Hitaande capanɗe joyaɓerde laamu Ajariya kaananke Yahuuda, Pekahiya ɓii Menahem laamii Israa'iila ley Samariya. O laamorii duuɓi ɗiɗi.
24 O waɗi ko boni yeeso Joomiraaɗo. O seedaay e hakkeeji ɗi Yerobo'am ɓii Nebat wattunoo Israa'iilankooɓe ɗiin.
25 Hooreejo sordaasiiɓe makko gooto na wi'ee Peka ɓii Remaliya hawriti e Galaadinkooɓe 50 de njammbii mbari mo kanko e Arigob e Ariye ley laamordu Samariya. Ndeen Peka loomti mo laamii.
26 Kabaaru Pekahiya keddiiɗo e ko waɗi fuu na winndaa ley Dewtere Kabaaruuji Kaanankooɓe Israa'iila.
No Peka laamorii Israa'iila
27 Hitaande capanɗe joy e ɗiɗaɓerde laamu Ajariya kaananke Yahuuda, Peka ɓii Remaliya laamii Israa'iila ley Samariya. O laamorii duuɓi 20.
28 O waɗi ko boni yeeso Joomiraaɗo. O seedaay e hakkeeji ɗi Yerobo'am ɓii Nebat wattunoo Israa'iila ɗiin.
29 Ley laamu makko, Tigilat-Pileser kaananke Asuura wari honi galluure Iyon e Abel-Bayti-Ma'aka e Yanoha e Kedes e Hasor e leydi Galaad e ndi Galili e ndi Naftali fuu. O nanngi yimɓe ɓeen fuu o yaari ɗum'en leydi Asuura.
30 Caggal ɗuum Hoseya ɓii Ela jammbi Peka, wari ɗum de loomti ɗum laamii hitaande noogayaɓerde laamu Yotam ɓii Ujjiya.
31 Kabaaru Peka keddiiɗo e ko waɗi fuu na winndaa ley Dewtere Kabaaruuji Kaanankooɓe Israa'iila.
No Yotam laamorii Yahuuda
(2 Kabaaruuji 27:1-7)
32 Ley hitaande ɗiɗaɓerde laamu Peka ɓii Remaliya kaananke Israa'iila, Yotam ɓii Ujjiya kaananke Yahuuda laamii. 33 Nde o laamotonoo ndeen duuɓi makko wo 25. O laamorii duuɓi 16 ley Urusaliima. Inniiko na wi'ee Yerusa ɓii Sadok.
34 O waɗi ko darti yeeso Joomiraaɗo hono no baabiiko Ujjiya waɗirnoo noon. 35 Ammaa fay e noon, nokkuuje cakkirɗe ɗeen pusaaka. Ndelle yimɓe na keddii na mbula ure, na ngaɗa sadakaaji dow majje.
Wo kanko tafani dammbugal suudu Joomiraaɗo dowuwal ngaal ommboode.
36 Kabaaru Yotam keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda.
37 Ley balɗe ɗeen, Joomiraaɗo fuɗɗi na nelda Yahuuda fitina ƴuuruɗo e kaananke Siiriya bi'eteeɗo Resin e Peka ɓii Remaliya.
38 Yotam maayi hawritowi e maamiraaɓe muuɗum. O uwaa hakkunde muɓɓen ley Galluure Daawda, maamiiko. Ɓiyiiko Ahas loomti mo laamii.