No Amasiya laamorii Yahuuda
(2 Kabaaruuji 25)
14
1 Ley hitaande ɗiɗaɓerde laamu Yowas ɓii Yowakas kaananke Israa'iila, Amasiya ɓii Yehowas laamii Yahuuda. 2 Nde o laamotonoo ndeen duuɓi makko wo 25. O laamorii duuɓi 29 ley Urusaliima. Inniiko na wi'ee Jehowaddan, jeyaaɗo Urusaliima.3 O waɗi ko wooɗi yeeso Joomiraaɗo, ammaa o hewtaay maamiiko Daawda. O waɗi huunde fuu hono no baabiiko Yowas waɗirnoo. 4 Fay e noon nokkuuje cakkirɗe pusaaka. Ndelle yimɓe na keddii na mbula ure, na ngaɗa sadakaaji dow majje.
5 Nde laamu makko semmbiɗinno fu, o wari jambinooɓe baabiiko mbari ɗum ɓeen. 6 Ammaa o waraay ɓiɓɓe maɓɓe fodde ko Joomiraaɗo wi'unoo ley Tawreeta Muusaa:
— Saaraaɓe mbarataake saabe hakkeeji ɓiɓɓe muɓɓen. Ɓiɓɓe du, mbarataake saabe hakkeeji saaraaɓe muɓɓen. Ammaa mono fuu warete saabe hakke muuɗum.*
7 Caggal ɗuum Amasiya hawri e Edominkooɓe de wari worɓe 10 000 ley Naɗɗol Lamɗam. O teeti galluure Sela, o inndiri nde Yokteyel. Noon galluure ndeen wi'etee faa warde hannden.
8 Amasiya kaananke Yahuuda oon neli Yehowas, kaananke Israa'iila, wi'ee:
— Accu kawren de kaɓen!
9 Ndeen Yehowas nelitii, o wi'ee:
— Lekki ngi'eehi Liban ɓoli neli lekki seddere Liban wi'ee: «Kokkaa kam ɓiya debbo faa mi ɓaŋana ɓiyam gorko.» Ammaa huunde ladde wari dampi ki faa ki ɗiggi. 10 Wo goonga a jaalakeno Edominkooɓe, de a toowni hoore maaɗa saabe majjum. Ceyoɗaa ley wuro maaɗa de kaaɗaa toon. Ko saabii de parritinɗaa naatude wolde halkoore ma aan e Yahuuda fuu?
11 Ammaa Amasiya hettindanaaki mo. Ndeen Yehowas wari, ɓe kawri ɗakkol galluure Bayti-Semes leydi Yahuuda. 12 Sordaasiiɓe Israa'iila njaali ɓe Yahuuda de jaalaaɓe ɓeen ndoggiri gure muɓɓen. 13 Yehowas kaananke Israa'iila nanngi Amasiya ɓii Yowas taan Ahajiya kaananke Yahuuda ley wuro Bayti-Semes. Caggal ɗuum o yottii galluure Urusaliima de o heli kokuwol piiliingol galluure ngool gilla dammbugal Efrayim faa yottii dammbugal Soɓɓundu. Njuuteefi majjum wo piyanɗe 400. 14 O ɓoɓti kaŋŋe e cardi e huunde fuu ko tawanoo ley suudu Joomiraaɗo e jawdi ndesanoondi ley laamordu. O nanngi Yahuudiyankooɓe o yeccodii Samariya.
15 Kabaaru Yehowas keddiiɗo e semmbe laamu muuɗum e bolwole ɗe waddi e Amasiya kaananke Yahuuda e ko waɗi fuu na winndaa ley Dewtere Kabaaruuji Kaanankooɓe Israa'iila. 16 Ndeen Yehowas maayi hawritowi e maamiraaɓe muuɗum. O uwaa ley Samariya hakkunde kaanankooɓe Israa'iila. Ɓiyiiko Yerobo'am loomti mo laamii.
17 Amasiya ɓii Yowas kaananke Yahuuda du, wuuri duuɓi 15 caggal maayde Yehowas ɓii Yowakas kaananke Israa'iila. 18 Kabaaru Amasiya keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda.
19 Yimɓe makko paamiri de muurtani mo ley Urusaliima. Ndeen o doggiri Lakis. Ɓe neli woɓɓe faa Lakis toon mbarowi mo. 20 Ɓe ngartiri ɓanndu makko dow pucci. O uwaa Urusaliima hakkunde maamiraaɓe makko ley Galluure Daawda.
21 Yahuudiyankooɓe fuu kawriti ngaɗi ɓiyiiko Ajariya, suka mo duuɓi 16 loomti mo laamii. 22 Wo Ajariya oon yeccini galluure Eylat e jeyal Yahuuda de nyiɓitii nde caggal maayde bammum.
No Yerobo'am ɗiɗaɓo laamorii Israa'iila
23 Hitaande sappo e joyaɓerde laamu Amasiya ɓii Yowas kaananke Yahuuda, Yerobo'am ɓii Yehowas kaananke Israa'iila laamii ley galluure Samariya. O laamorii duuɓi 41. 24 O waɗi ko boni yeeso Joomiraaɗo. O seedaay e hakkeeji ɗi Yerobo'am ɓii Nebat wattunoo Israa'iilankooɓe ɗiin.
25 Wo kanko wartiri leyɗe ɗe Israa'iila jeynoo gilla Lebo-Hamat faa yottii maayo Araba e jeyal Israa'iila fodde no Joomiraaɗo, Laamɗo Israa'iila, wiirunoo e hunnduko maccuɗo muuɗum, annabi Yuunusa ɓii Amitay jeyaaɗo wuro Gat-Hefer. 26 Joomiraaɗo yi'iino torra cattuka ka Israa'iilankooɓe njarata. Wakkati oon walaano dimo maa maccuɗo baawɗo wurtinde ɓe ley torra kaan. 27 Ammaa Joomiraaɗo wi'aay ittan Israa'iila e adunaaru. Ndelle o hisinirii ɓe e junngo Yerobo'am ɓii Yehowas.
28 Kabaaru Yerobo'am keddiiɗo e semmbe laamu muuɗum e konuuji ɗi waɗani Israa'iila e no yecciniri galluuje Damas e Hamat ɗe Yahuuda teetunoo leydi Israa'iila e ko waɗi fuu na winndaa ley Dewtere Kabaaruuji Kaanankooɓe Israa'iila. 29 O maayi o hawritowi e maamiraaɓe makko kaanankooɓe Israa'iila. Ɓiyiiko Jakariya loomti mo laamii.