No Yowas laamorii dow Yahuuda
(2 Kabaaruuji 24:1-3)
12
1 Nde Yowas laamotonoo ndeen duuɓi muuɗum wo jeɗɗi. 2 O laamii ley hitaande jeɗɗaɓerde laamu Yehu kaananke Israa'iila. O laamorii duuɓi 40 ley Urusaliima. Inniiko na wi'ee Siwiya jeyaaɗo Beerseba. 3 Yowas waɗi ko darti yeeso Joomiraaɗo sabo imo jokkunoo tindinooje almaami Yehoyada. 4 Ammaa nokkuuje cakkirɗe pusaaka. Ndelle yimɓe na keddii na mbula ure, na ngaɗa sadakaaji dow majje.No suudu Joomiraaɗo moƴƴintiniraa
(2 Kabaaruuji 24:4-14)
5 Kaananke Yowas wi'i almaami'en:
— Kawrondinon ceede ceniiɗe gaddeteeɗe ley suudu Joomiraaɗo, ɗe yimɓe kokkirta yardamuye e ɗe yimɓe njeyi yoɓude fuu. 6 Njaɓon ɗe e juuɗe resooɓe ceede de moƴƴintinoɗon nokkuuje suudu Joomiraaɗo ɗe tawuɗon na mboni fuu.
7 Ammaa ɓe moƴƴinaay suudu nduun faa yottii hitaande noogay e tataɓerde laamu makko. 8 Ndeen o noddi almaami Yehoyada e almaami'en heddiiɓe fuu de o wi'i ɗum'en:
— Saabe ɗume de on moƴƴinaay ko boni ley suudu Joomiraaɗo nduun? Ndelle on keɓataa ceede kokketeeɗe ɗeen katin. Ɗe kokkete saabe moƴƴintingol suudu Joomiraaɗo.
9 Almaami'en ɓeen celi jaɓude ceede ɗeen, ɓe njaɓi du itteede e gollal moƴƴintingol suudu Joomiraaɗo ngaal. 10 Ndeen almaami Yehoyada hooƴi keesuwal, de waɗani ngal wudde, joƴƴini ngal gere nyaamo naatooɓe suudu Joomiraaɗo ɗakkol sakkirde. Almaami'en doomooɓe dammbugal ɓeen na ngatta ceede ɗe yimɓe ngaddata suudu Joomiraaɗo fuu ley maggal. 11 Si ɓe tawii ceede ɗeen ɗuuɗi fu, ɓe ngaɗa binndanoowo laamiiɗo warda e almaami mawɗo mburtina ceede ɗeen de ɓe kawrita ɓe lima ɗe. 12-13 Si ɓe limii ɗe fu, ɓe kokka ɗe ndaaranooɓe moƴƴintingol suudu ɓeen. Kamɓe njoɓata sehooɓe kaaƴe e leɗɗe e mahooɓe e gollooɓe gollal moƴƴintingol suudu nduun fuu. Ɓe cooda leɗɗe e kaaƴe mawɗe moƴƴinirɗe suudu nduun wooɗi du, ɓe cooda kujje feere feere tilsanɗe gollal ngaal fuu. 14 Ammaa ceede ɗeen ciiwataake mbaylitee taasaaje biccirɗe e taƴirkoy e taasahoy e luwe puufeteeɗe. Ɗe mbaylitataake ko waɗirtee kaŋŋe e cardi fuu fay gootum. 15 Ceede ɗeen fuu kokkee ndaaranooɓe gollal moƴƴintingol suudu ɓeen faa nawtoroo ɗe.
16 Fay nde wootere ɓe ƴamaay foti ɓe kokki ndaaranooɓe gollal ɓeen sabo wo ɓe gollooɓe hoolniiɓe.
17 Ammaa ceede sadakaaji njobdi hakke e sadakaaji yaafeede ɗeen kawtaay e ceede moƴƴintingol suudu Joomiraaɗo sabo ɗeen wo almaami'en njeyi.
No Yowas Wariraa
(2 Kabaaruuji 24:23-27)
18 Wakkati oon, Hajayel kaananke Siiriya wari haɓdi e galluure Gat de jaalii nde. Caggal ɗuum o anniyii haɓdude e Urusaliima.
19 Ndeen Yowas kaananke Yahuuda adi kujje ceniiɗe ɗe maamiraaɓe muuɗum kaanankooɓe Yahuuda ceninnoo. Ɗum woni Yehosafat e Yoram e Ahajiya. O ɓeydi ko kanko e hoore makko o seninnoo tawti kaŋŋe gonnooɗo ley keesuwal suudu Joomiraaɗo e ley galle laamordu fuu de o hokki ɗum Hajayel kaananke Siiriya. Ndeen Hajayel acci Urusaliima.
20 Kabaaru Yowas keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda. 21-22 Gollooɓe makko kaɓɓi dabare warude mo. Ɓeen ngoni Yoojabad ɓii Sime'at e Yehojabad ɓii Somer. Ɓe mbari mo Bayti-Millo dow laawol jipportoongol wuro Sila. O uwaa hakkunde maamiraaɓe makko ley Galluure Daawda.
Ndeen ɓiyiiko Amasiya loomti mo laamii.