No Yowas kaananke Yahuuda hisiniraa
(2 Kabaaruuji 22:10–23:21)
11
1 Nde Ataliya inna kaananke Ahajiya faamunoo ɓiyum waraama fu, anniyii warude ɓiɓɓe laamu Yahuuda fuu. 2 Ammaa Yehoseba ɓii kaananke Yoram debbo sakiike Ahajiya oon itti ɓinngel Ahajiya hakkunde ɓiɓɓe kaananke ɓeen, hooƴi ngel kanngel e muynoowo ngel suuɗowi ley suudu fukkordu. Ɗum saabii de Ataliya heɓaay warude ngel. Ingel wi'ee Yowas. 3 Duuɓi jeegom ngel waddi e Yehoseba ley suudu Joomiraaɗo. Wakkati oon tawi Ataliya laamii leydi ndiin.4 Ley hitaande jeɗɗaɓerde almaami Yehoyada nelani hooreeɓe sordaasiiɓe reenooɓe kaananke e doomooɓe dammbugal laamordu ngari suudu Joomiraaɗo de o haɓɓidi e maɓɓen amaana wo cukalel ngeel woni kaananke. Ndeen o hunini ɓe ley taliyaare suudu nduun de sakitii o holli ɓe ngel. 5 O yamiri ɓe o wi'i:
— Inan no ngaɗoton: Onon pecce tati puɗɗooɓe gollude nyannde fowteteende ɗeen, wootere dooma suudu kaananke. 6 Feccere ɗiɗaɓerde du daroo dammbugal bi'eteengal Suur. Feccere heddiinde du wona caggal reenooɓe dammbugal kaananke faa ndaarana naatooɓe e wurtotooɓe. Pecce tati ɗeen fuu ndeenira suudu Joomiraaɗo nyalaande nyalaande. 7 Pecce ɗiɗi powtunooɗe nyannde fowteteende ɗeen du, ndooma suudu Joomiraaɗo faa kaybana kaananke. 8 Onon pecce tati puɗɗooɓe gollude nyannde fowteteende ɗeen, wootere dooma suudu kaananke.
9 Mawɓe sordaasiiɓe ɓeen ngaɗi ko almaami Yehoyada yamiri ɗum'en fuu. Mono fuu hooƴi worɓe muuɗum doomooɓe nyannde fowteteende e jippinooɓe gollal muɓɓen nyannde ndeen de ɓe kawriti to Yehoyada. 10 Ndeen o hokki ɓe labbe e bawaaɗe kaananke Daawda desanooɗe ley suudu Joomiraaɗo. 11 Reenooɓe kaananke na tiigii kaɓitirɗe ɗeen na ndarii na piilii gilla nano faa nyaamo suudu nduun ɗakkol sakkirde iɓe ndeeni kaananke.
12 Ndeen Yehoyada wurtini ɓinngel kaananke ngeel, hippi ngel kufune laamu de watti ɗerewol amaana e junngo maggel. Nebbam jooraa dow hoore maggel de ngel waɗaa kaananke. Yimɓe na kella na mbi'a:
— Kaananke, njuutaa balɗe!
13 Ataliya nani olko reenooɓe ɓeen e jamaare ndeen de yehi tawoy ɓe suudu Joomiraaɗo toon. 14 O ndaari o tawi kaananke na darii dow bimmbeere to kaanankooɓe mboowi daraade. Hooreeɓe sordaasiiɓe e mawɓe leydi e fuufooɓe luwe na ndarii ɗakkol muuɗum. Yimɓe fuu na ceyoo de yimooɓe na puufa luwe. Ndeen Ataliya seeki kaddule muuɗum de ƴeewni wi'i:
— On jambake kam! On jambake kam!
15 Almaami Yehoyada wi'i hooreeɓe sordaasiiɓe ɓeen:
— Njaltinee mo! Wooɗi jokkuɗo mo du fuu wo bardeteeɗo kaafaahi.
Ko almaami yamirii o wurtinee ɗuum wo saabe taa ƴiiƴam makko rufa ley suudu Joomiraaɗo ɗoon. 16 Ɓe nanngi Ataliya ɓe ndewni ɗum dammbugal pucci ɓe njaari ɗum suudu laamordu de ɓe mbari ɗum toon.
17 Ndeen Yehoyada waɗi amaana hakkunde Joomiraaɗo e kaananke e yimɓe faa lenyol ngool fuu laatoo ɗowtantoongol Joomiraaɗo. Katin du, o waɗi amaana hakkunde kaananke e yimɓe ɓeen. 18 Caggal ɗuum yimɓe ɓeen njehi suudu Ba'al toon de pusi ɗum. Ɓe keli cakkirɗe mayru e tooruuji tawaaɗi ley mayru fuu de ɓe mbari almaami Ba'al bi'eteeɗo Mattan ɗakkol cakkirɗe ɗeen.
Ndeen Yehoyada waɗani suudu Joomiraaɗo nduun doomooɓe. 19 Katin o hooƴi hooreeɓe sordaasiiɓe doomooɓe kaananke e reenooɓe dammbugal laamordu e yimɓe heddiiɓe fuu ɓe mburtini kaananke oon ley suudu Joomiraaɗo. Ɓe ndewi dammbugal reenooɓe, ɓe nanni mo ley laamordu de ɓe njoƴƴini mo dow jooɗorgal laamu. 20 Yimɓe leydi ndiin fuu ceyii, galluure ndeen heɓi jam. Ammaa Ataliya kaa, ɗum tawii wardaama kaafaahi ley galle laamordu.