No Yehu laamorii Israa'iila
9
1 Annabi Elisey noddi gooto ley taalibaaɓe annabaaɓe, wi'i ɗum:— Kaɓɓinoɗaa kaɓɓorgol maaɗa, kooƴaa jolloyel nebbam ngel de njaha Ramot-Galaad. 2 Si a yottake fu, tinnoɗaa nji'a Yehu ɓii Yehosafat, taan Nimsi. Njaltinaa mo hakkunde yimɓe de naaton ley suudu longitiindu. 3 Adaa jolloyel nebbam ngeel njoora dow hoore makko de mbi'aa mo: «Inan ko Joomiraaɗo wi'i: Mi suɓake ma faa laatoɗaa kaananke Israa'iila.» Caggal ɗuum, omtaa dammbugal de ndoggaa, taa ndaroɗaa.
4 Noon annabaajo jokolle oon dilliri yehi Ramot-Galaad. 5 Nde o yottinoo fu, o tawi jamaare mawɓe konu Israa'iila na njooɗii. O wi'i:
— Na woodi ko njiɗumi haaldude e maaɗa, joomam.
Yehu jaabii mo wi'i:
— Moy kaajaɗaa hakkunde amin?
O wi'i:
— Wo aan kaajaami, joomam.
6 Ndeen Yehu ummii naati ley suudu nduun. Jokolle oon rufi nebbam dow hoore makko de wi'i mo:
— Inan ko Joomiraaɗo Laamɗo Israa'iila wi'i: Mi suɓake ma faa laatoɗaa kaananke yimɓe am Israa'iila. 7 A halkan wuro jooma Ahabi faa mi yomnitoo mo ƴiiƴam gollooɓe am annabaaɓe e ɗam yimɓe am heddiiɓe ɓe Yesabel wari fuu. 8 Suudu Ahabi fuu halkan. Mi fiɗɗan worɓe suudu makko rimɓe e maccuɓe fuu ley Israa'iila. 9 Mi waɗan suudu makko hono no ngaɗirmi suudu Yerobo'am ɓii Nebat e suudu Ba'asa ɓii Ahiya. 10 Yesabel du, dawaaɗi nyaaman ɗum ley ngesa wuro Yesre'el. Fay gooto uwataa ɗum.
Ndeen o omti dammbugal o wurtii o doggi.
11 Nde Yehu wurtinoo yeccii to hooreeɓe konu heddiiɓe ɓeen fu, ɓeen ƴami mo mbi'i:
— Kori wo jam? Ɗume waddi kaaŋaaɗo o to maaɗa?
Yehu jaabii ɓe wi'i:
— Oɗon anndi mo e sii haalaaji makko.
12 Ɓe mbi'i Yehu:
— A fenan! Hollu min ko waddi o.
O jaabii ɓe o wi'i:
— Nii e nii o wi'i kam: «Joomiraaɗo wi'i: Mi suɓake ma faa laatoɗaa kaananke Israa'iila.»
13 Nde ɓe nannoo haala kaan fu, ɓe karii ɓe mbeƴƴiti kaddule maɓɓe dow ƴeenyirɗe suudu ɗo o yaaɓata ɗoon. Ɓe puufi luwal ɓe mbi'i:
— Yehu woni kaananke!
No Yehu wariri Yoram e Ahajiya e Yesabel
14 Yehu ɓii Yehosafat taan Nimsi anniyii jambaade Yoram. Tawi Yoram e Israa'iilankooɓe fuu na paddinoo Ramot-Galaad faa kaɗa Hajayel kaananke Siiriya naatude galluure ndeen. 15 Wakkati oon Yoram yeccii galluure Yesre'el faa sawrowoo ko Siiriyankooɓe mbarminnoo ɗum ɗuum. Yehu haaldi e yimɓe muuɗum wi'i:
— Si oɗon njardi laamu am fu, mballon taa fay gooto wurtoo galluure ndee de humpitowa kabaaru o ley wuro Yesre'el.
16 Yehu ƴeenyi torkooru muuɗum de dilliri Yesre'el to Yoram fukkii toon. Tawi Ahajiya kaananke Yahuuda du wariino faa ndaara mo.
17 Doomoowo galluure Yesre'el na wonnoo dow suudu toowndu. Oon haccii jamaare yimɓe Yehu na ngara de wi'i:
— Miɗo haccoo jamaare mawnde na wara.
Yoram jaabii mo wi'i:
— Nelaa goɗɗo waɗɗo puccu hawrowa ɓe de ƴama ɓe yalla wo jam waddata ɓe naa?
18 Nelaaɗo oon hawrowi e maɓɓe de wi'i:
— Inan ko kaananke neli kam mi ƴama: yalla wo jam waddata on naa?
Yehu jaabii mo wi'i:
— Ɗume jam waanniri ma? Jokkam.
Ndeen doomoowo galluure oon wi'i:
— Nelaaɗo oon yottake to maɓɓe ammaa yeccaaki.
19 Kaananke neli goɗɗo katin ƴamowa ɓe yalla wo jam naa? Yehu jaabii oon du, wi'i:
— Ɗume jam waanniri ma? Jokkam.
20 Doomoowo galluure oon wi'i katin:
— Nelaaɗo ɗiɗaɓo oon du yottake to maɓɓe ammaa yeccaaki. Wooɗi du yaadu puccu ardiiɗo ɓe oon na nanndi e yaadu Yehu taan Nimsi sabo imo haro hono kaaŋaaɗo.
21 Yoram wi'i:
— Ceŋanee kam torkooru am!
Torkooru makko seŋaa. Ndeen Yoram kaananke Israa'iila e Ahajiya kaananke Yahuuda mburtii, mono fuu dow torkooru muuɗum. Ɓe kawrowi e Yehu ley ngesa Nabot jeyaaɗo Yesre'el*.
22 Nde Yoram yottinoo Yehu fu wi'i:
— Yehu, yalla wo jam naa?
Yehu jaabii mo wi'i:
— Yalla jam na waawi heddaade si inna ma Yesabel na heddi e jeenuuji e ndaggadaaku muuɗum naa?
23 Wakkati oon Yoram doggi de na wi'a Ahajiya:
— Ahajiya, wo jammba!
24 Yehu ɓanti kural muuɗum fiɗi Yoram hakkunde balaaje. Kural ngaal yuwi mo faa siiti e ɓernde makko. Ndeen o saami ley torkooru makko o maayi.
25 Yehu wi'i sordaasiijo ɓurɗo ɓattaade ɗum, na wi'ee Bidikar:
— Mburtinaa mo ley torkooru de paɗɗaa mo ley ngesa Nabot mo Yesre'el. Yalla aɗa miccito nyannde njaadannoɗen ley torkooru, eɗen njokkii baabiiko Ahabi, de Joomiraaɗo neldi mo annabaaku, wi'i:
— 26 Keeŋan mi yi'i ƴiiƴam Nabot e ɓiɓɓe muuɗum ɗam ndufuɗaa ley ngesa ɗaam. Ndelle tannyoraa mi yoɓtete ɗam ley magga pay. Nii woni no Joomiraaɗo wi'i. Saabe majjum kooƴaa ɓanndu makko, paɗɗaa ndu ley ngesa ngaan, fodde no Joomiraaɗo wiirunoo.
27 Nde Ahajiya kaananke Yahuuda yi'unoo ɗum fu, doggiri Bayti-Gaan. Yehu jokki mo de na feekoo na wi'a yaadiraaɓe muuɗum:
— Mbaree mo kanko du!
Ɓe piɗi mo kure ley torkooru makko to ƴeenyirde Guur ɗakkol galluure Yibileyam. O doggi faa o yottii galluure Megiddo de o maayi toon. 28 Gollooɓe makko ngatti mo ley torkooru njaari mo Urusaliima. Toon ɓe uwi mo ley yanaande hakkunde maamiraaɓe makko ley Galluure Daawda. 29 Laamu makko fuɗɗi dow Yahuuda gilla hitaande sappo e go'aɓerde laamu Yoram ɓii Ahabi kaananke Israa'iila.
No Yehu wariri Yesabel
30 Caggal ɗuum, Yehu naati galluure Yesre'el. Yesabel du nani kabaaru garol makko. Ndeen finii gite muuɗum, moƴƴini ngaasa muuɗum de darowii faro feneetere suudu muuɗum na yuurno. 31 Nde Yehu naatannoo dammbugal wuro ngoon fu, Yesabel wi'i:
— Similla Simri* barɗo joomum!
32 Yehu tiggitii feneetere de wi'i:
— Moy wondi e am?
— Paɗɗee mo e leydi.
Ɓe paɗɗi mo e leydi. Ƴiiƴam makko sankitii dow kokuwol ngool e dow pucci. Yehu yaaɓiri mo pucci muuɗum. 34 Caggal ɗuum, faltii naatowi ley laamordu, nyaami, yari de sakitii wi'i maccuɓe muuɗum:
— Kooƴee debbo kuɗaaɗo oon, mooɓowon ɗum sabo wo o ɓii kaananke.