No debbo mo ɓiyum iirtinaa oon hokkitiraa nokkuuje muuɗum
8
1 Nyannde gomma Elisey haaldi e debbo mo iirtinnoo ɓiyum oon wi'i ɗum:— Ummoɗaa aan e yimɓe maaɗa eggon njahon gere goɗɗo sabo Joomiraaɗo nelan rafo dow leydi ndi, wooɗi du ngo waɗan duuɓi jeɗɗi.
2 Debbo oon waɗi ko neɗɗo Laamɗo oon wi'i ɗum fuu. O eggi kanko e yimɓe makko, ɓe koɗowi leydi Filistiyankooɓe faa waɗi duuɓi jeɗɗi. 3 Caggal duuɓi ɗiin, o warti leydi makko de o yehi to kaananke faa walla mo o hewta suudu makko e gese makko. 4 Tawi kaananke na haaldannoo e Gehaaji, gollanannooɗo Nelaaɗo Laamɗo oon. Imo wi'a ɗum holla mo kujje mawɗe ɗe Elisey waɗi fuu.
5 Wakkati Gehaaji fillantonoo mo kabaaru no Elisey iirtiniri maayɗo ndeen, debbo mo ɓiyum iirtinaa oon yottii to maɓɓe faa ŋaaroo kaananke walla ɗum hewta suudu muuɗum e gese muuɗum.
Ndeen Gehaaji wi'i:
— Joomam kaananke, inani mo, kanko e ɓiyiiko mo Elisey iirtini oon!
6 Kaananke ƴami debbo oon kabaaru majjum de debbo oon fillanii mo kabaaru oon fuu. Caggal ɗuum kaananke yamiri gooto e yimɓe muuɗum mawɓe yaada e makko de waɗa o hokkitee ko o jeyi fuu e ko gese makko ndimunoo gilla nde o eggunoo faa warde nyannde ndeen.
No Hajayel heɓiri laamu Siiriya
7 Nyannde gomma, Elisey yehi Damas. Tawi Ben-Hadad kaananke Siiriya oon sellaa. Kaananke haalanaa wi'aa:
— Nelaaɗo Laamɗo oon warii faa ɗo.
8 Kaananke wi'i Hajayel:
— Kooƴaa moƴƴere, kokkowaa Nelaaɗo Laamɗo oon de o ƴamana kam Joomiraaɗo yalla mi daɗan nyawu am ngu naa mi daɗataa.
9 Hajayel hooƴi ko ɓuri wooɗude e Damas fuu, rimdi geeloobi 40, de yaari to Elisey. Nde o yottinoo Elisey fu, o darii yeeso muuɗum de o wi'i ɗum:
— Ɓiya Ben-Hadad kaananke Siiriya neli kam mi ƴame yalla daɗan nyawu muuɗum nguun naa daɗataa.
10 Elisey jaabii mo wi'i:
— Mbi'aa mo: «Sikke walaa o daɗan!» Ammaa si goonga Joomiraaɗo hollii kam o wuurataa katin.
11 Ndeen Elisey tukki gite muuɗum e Hajayel faa wemmbi ɗum de sakitii fuɗɗi na woya. 12 Ndeen Hajayel ƴami mo wi'i:
— Nelaaɗo Laamɗo, ɗume mboyataa?
Elisey jaabii mo wi'i:
— Bone mo ngaɗoyta Israa'iilankooɓe oon nji'umi. A wulan galluuje maɓɓe cemmbiɗinɗe, a wardan jokolɓe maɓɓe kaafaaje, a niisan ɓikkoy maɓɓe wooɗi du a seekan deedi rewɓe maɓɓe reeduɓe.
13 Hajayel wi'i mo:
— Miin suka maaɗa, ɓoosaaru ɓoldu ndu, noy mbaawirmi waɗude hono ɗum?
Elisey jaabii mo wi'i:
— Joomiraaɗo hollii kam a laamoto Siiriya.
14 Ndeen Hajayel dilli to Elisey, soƴƴii to joomum. Kaananke oon ƴami mo wi'i:
— Ɗume Elisey wi'i ma?
O jaabii o wi'i:
— Elisey wi'i sikke walaa a daɗan.
15 Jaangoore majjum, Hajayel hooƴi suddamaare sowni de suumiri kaananke faa maayi. Noon Hajayel loomtiri Ben-Hadad laamii.
No Yoram laamorii Yahuuda
(2 Kabaaruuji 21:5-20)
16 Ley hitaande joyaɓerde laamu Yoram ɓii Ahabi kaananke Israa'iila, Yoram ɓii Yehosafat fuɗɗi laamaade, o laamodii e baabiiko dow leydi Yahuuda ndiin. 17 Nde o laamotonoo ndeen duuɓi makko wo 32. O laamorii duuɓi jeetati ley Urusaliima. 18 O rewi laawol kaanankooɓe Israa'iila, o tokki suudu Ahabi, sabo o dewli ɓiyum. O waɗi ko boni yeeso Joomiraaɗo. 19 Ammaa Joomiraaɗo halkaay Yahuuda saabe Daawda golloowo muuɗum. Joomiraaɗo wi'iino Daawda: «Mi hokkete ƴuwdi njaynoori yeeso am faa abada.»
20 Wakkati laamu Yoram, Edominkooɓe muurtani Yahuuda de cuɓanii ko'e muɓɓen kaananke. 21 Yoram hooƴi torkooji muuɗum fuu dilliri Sa'ira. Edominkooɓe piilowii ɓe toon. Ndeen Yoram e yimɓe muuɗum ummii ley jemma, pecci hakkunde maɓɓe, kamɓe e hooreeɓe dorbotooɓe torkooji maɓɓe, de ɓe ndoggi ɓe kooti. 22 Gilla ndeen Edom muurtani Yahuuda faa warde hannden. Wakkati oon Libina du muurti.
23 Kabaaru Yoram keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda. 24 O maayi o hawritowi e maamiraaɓe makko, o uwaa hakkunde muɓɓen ley Galluure Daawda. Ɓiyiiko Ahajiya loomti mo laamii.
No Ahajiya laamorii Yahuuda
(2 Kabaaruuji 22:1-6)
25 Ley hitaande sappo e ɗiɗaɓerde laamu Yoram ɓii Ahabi kaananke Israa'iila, Ahajiya ɓii Yoram kaananke Yahuuda laamii. 26 Nde o laamotonoo ndeen duuɓi makko wo 22. O laamorii hitaande wootere ley Urusaliima. Inniiko na wi'ee Ataliya taan Omiri* laaminooɗo Israa'iila. 27 O rewi laawol suudu Ahabi, o waɗi ko boni yeeso Joomiraaɗo hono muɓɓen, sabo imo esondirnoo e muɓɓen.