7
1 Elisey jaabii wi'i:— Kettindee ko Joomiraaɗo wi'i: Jaango hono joonin, luumo naarude Samariya ɗo, kilooji 12 conndi ɗaatundi coodete mbuuɗu cardi ngootu, wooɗi kilooji sa'iiri 24 du, hono noon.
2 Mawɗo sordaasiiɓe ɓattiiɗo kaananke wi'i Elisey:
— Fay si Joomiraaɗo omti kammu, ko mbiiɗaa ɗuum na waawi laataade naa?
Elisey wi'i mo:
— A yi'iran ɗum gite maaɗa ammaa a meeɗataa fay seeɗa majjum.
No Siiriyankooɓe njoppiri ndaaka muɓɓen
3 Nyawraaɓe nguru nayo na ngonnoo yaasin dammbugal galluure Samariya ndeen. Ɓe kaaldi ɓe mbi'i:
— Ɗume saabii de eɗen njooɗii eɗen keɗii maayde meeɗen? 4 Si en naatii ley galluure nde kaa, rafo waran en. Wooɗi si en keddake ɗo du, ngo waran en. Ndelle, en njaha naatowen ley ndaaka Siiriyankooɓe. Si ɓe accidii en e yonkiiji kaa, en kisi. Si ɓe mbarii en du, timmii.
5 Ɓe ummii wakkati caamal naange, ɓe njehi ndaaka Siiriyankooɓe toon. Ammaa nde ɓe njottinoo hoɗorde ndeen fuu, ɓe tawaay fay gooto. 6 Tawi Joomiraaɗo waɗiino Siiriyankooɓe ɓeen nani duko nanduko e koyɗe pucci e torkooji e konunkooɓe heewɓe. Nde ɓe nannoo ɗum ndeen, ɓe mbi'i:
— En mboni! Kaananke Israa'iila yoɓii kaanankooɓe Hitiyankooɓe e Misirankooɓe faa ngara kippoo en!
7 Ndeen ɓe ummii caamal naange ɓe ndoggi ɓe njoppi hukumuuji e pucci e araaji maɓɓe. Ɓe njoppi ko ɓe ngoodunoo fuu ley hoɗorde ɗoon de ɓe ndoggi faa ɓe kisina yonkiiji maɓɓe.
8 Nde nyawraaɓe nguru ɓeen njottinoo ley hoɗorde ndeen fu, naati ley hukum nyaami, njari. Caggal ɗuum ɓe kooƴi kaŋŋe e cardi e kaddule ɓe cuuɗowi de ɓe njeccii katin, ɓe naati hukum goɗɗo ɓe kooƴi kujje feere-feere ley toon, ɓe cuuɗowi. 9 Ndeen ɓe mbi'ondiri:
— En ngaɗaay ko wooɗi. Hannden wo nyalaande seyo. Si en kaalowaay faa weeti fu, en kisataa jukkungo. Ndelle en njaha kumpitowen galle kaananke kabaaru o.
10 Ndeen ɓe njeccii galluure toon, ɓe noddi reenooɓe dammbuɗe de ɓe mbi'i:
— Min naatii ley hoɗorde Siiriyankooɓe ammaa min tawaay fay gooto, sawtu neɗɗo fuu nanataake. Min tawii pucci e araaji na kaɓɓii tawti hukumuuji maɓɓe ɗi ɓe njoppiri noon.
11 Reenooɓe dammbugal ɓeen njottini kabaaru oon ley galle kaananke. 12 Kaananke ummii ley jemma wi'i gollooɓe muuɗum:
— Keɗee faa mi haalana on ko Siiriyankooɓe podii waɗude en. Iɓe anndi hannden eɗen ndafaa. Ɗuum saabii de ɓe njalti hoɗorde maɓɓe, ɓe cuuɗowi gere goɗɗo faa mburtoɗen galluure men de ɓe nannga en en wuurɓe; ndeen ɓe naata galluure meeɗen.
13 Gooto maɓɓe jaabii wi'i:
— Ndelle en nela worɓe seeɗa kooƴa pucci joy, keddiiɗi ley galluure ɗiin, njaha ndaarowa. Walaa ko kulen katin sabo si yahooɓe ɓeen kalkii fu, ujunaaje Israa'iilankooɓe heddotooɓe ɓeen du kalkan. En nela ɓe ndaaren.
14 Ndeen ɓe kooƴi torkooji pucci ɗiɗi de kaananke wi'i ɓe:
— Njehee ndaarowee ndaaka Siiriyankooɓe kaan faa paamen ko ɗum laatii. 15 Ɓe njehi ɓe njokkii koyɗe sordaasiiɓe Siiriya ɓeen faa ɓe njottii Maayo Urdun. Ɓe tawi dow laawol ngool fuu wo kolte e kujje feere-feere ɗe Siiriyankooɓe paɗɗiri henyaare. Ɓe ngarti ɓe kaalani ɗum kaananke.
16 Ndeen yimɓe Samariya mburtii njehi hoɗorde Siiriyankooɓe toon kooƴowi jawdi njoppaandi ndiin fuu. Goonga wo noon du, ɓe coodiri kilooji 12 conndi ɗaatundi mbuuɗu cardi ngootu, kilooji 24 sa'iiri du hono noon fodde no Joomiraaɗo wiirunoo.
17 Kaananke doomniino mawɗo sordaasiiɓe oon dammbuɗe galluure ammaa yimɓe njaaɓi mo toon faa o maayi fodde no Elisey wiirunoo nde kaananke warunoo to muuɗum ndeen. 18 Tawi Elisey haalaniino kaananke wi'ii ɗum:
— Jaango hono joonin, luumo naarude Samariya ɗo, kilooji 12 conndi ɗaatundi coodete mbuuɗu cardi ngootu, wooɗi kilooji sa'iiri 24 du, hono noon.
19 Sordaasiijo oon du wi'iino:
— Fay si Joomiraaɗo omti kammu, ko mbiiɗaa ɗuum na waawi laataade naa?
Elisey du jaabakeno mo wi'i:
— A yi'iran ɗum gite maaɗa ammaa a meeɗataa fay seeɗa majjum.
20 Noon du ɗum hewtorii mo. Yimɓe njaaɓii mo dammbugal galluure toon faa o maayi.