No Elisey huywiniri jammbere dow ndiyam
6
1 Nyannde gomma taalibaaɓe annabaaɓe mbi'i Elisey:— Nokkuure nde min njooɗotoo yeeso maaɗa ndee na famɗani min sanne. 2 Accaa min njaha faa Urdun, min coppanowa ko'e amin leɗɗe, mono fuu gootal de min nyiɓa toon, min njooɗoo.
Elisey jaabii ɓe wi'i:
— Njehee.
3 Gooto maɓɓe wi'i:
— Miɗen ŋaare, accaa njaaden.
O jaabii ɓe o wi'i:
— Wooɗi, en njaadan.
4 Noon ɓe ndillidiri, ɓe njehi maayo Urdun, ɓe coppowi leɗɗe. 5 Nde gooto maɓɓe soppanno ndeen, jammbere muuɗum sentii saami ley ndiyam. O feekii o wi'i:
— Wayyoo joomam! Mi jeyaa jammbere ndeen, wo mi wuƴi!
6 Nelaaɗo Laamɗo oon wi'i mo:
— Faro toy nde saamiri?
O holli nokkuure ndeen. Elisey sehi leggal de faɗɗi ngal faro ɗoon. Ndeen njamndi ndiin huywi dow ndiyam. 7 O wi'i gorko oon hooƴa ndi, de foorti junngo muuɗum hooƴi njamndi ndiin.
No konunkooɓe Siiriya naatiri e junngo Elisey
8 Kaananke Siiriya na haɓdannoo e Israa'iila. O hawrondini yimɓe makko de ɓe ndabi toy e toy ɓe njoƴƴinta sordaasiiɓe maɓɓe.
9 Elisey du neli kaananke Israa'iila wi'ee:
— Kakkilaa, taa ndewaa nokkuure nde sabo toon sordaasiiɓe Siiriya ponndii.
10 Kaananke Israa'iila neli woɓɓe njaha ndaarowa nokkuure ndeen. Wakkati fuu Elisey na sappanannoo mo dow majjum, kanko du, imo hakkilana ɗum.
11 Ɗum metti kaananke Siiriya sanne. O noddi yimɓe makko o wi'i ɗum'en:
— Yalla oɗon mbaawi hollude kam moy suuɗii na gollida e kaananke Israa'iila hakkunde meeɗen naa?
12 Gooto maɓɓe jaabii mo wi'i:
— Fay gooto gollidataa e makko, joomam. Wo annabi Elisey mo Israa'iila oon woodi baawɗe hollude kaananke muɓɓen ko ndabata fuu fay ley suudu ɗo mbaalata.
13 O wi'i ɓe:
— Ndelle, njehee pilowee mo de ngaron kaalanon kam to o woni faa mi nela o nanngee.
Caggal ɗuum ɓe kumpiti mo ɓe mbi'i:
— Ley galluure Dotan o woni.
14 Kaananke oon neli konunkooɓe ɗuuɗɓe e pucci e torkooji njehi piilowi galluure ndeen ley jemma. 15 Jaangoore majjum, golloowo Elisey hejji wurtii de yi'i konunkooɓe waɗɗiiɓe pucci e torkooji na piilii galluure ndeen fuu. Ndeen o wi'i Elisey:
— Joomam en mboni! Noy ngaɗeten?
16 Elisey jaabii mo wi'i:
— Taa hulu. Wallooɓe en ɓeen na ɓuri ɓe ɗuuɗude.
17 Elisey waɗi du'aare wi'i:
— Yaa Joomiraaɗo, feertu gite makko faa o yi'a.
Noon Joomiraaɗo feertiri gite makko de o yi'i pucci e torkooji yiite ɗuuɗɗi dow waamnde na piilii Elisey. 18 Siiriyankooɓe ɓeen na ngara na ponndii mo. Ndeen Elisey ŋaari Joomiraaɗo wi'i:
— Piiraa ɓe fuu mbumndam.
Joomiraaɗo wumni ɓe, hono no Elisey ŋaarorii noon.
19 Ndeen Elisey wi'i ɓe:
— Ɗo wanaa laawol. Wooɗi wanaa galluure ndeen du. Njokkee kam faa mi holla on gorko mo kaajaɗon oon.
Ndeen o ɗowi ɓe faa e ley galluure Samariya.
20 Nde ɓe njottinoo Samariya fu, Elisey waɗi du'aare wi'i:
— Yaa Joomiraaɗo, feertu gite maɓɓe.
Joomiraaɗo feerti gite maɓɓe, ɓe tawi faa hakkunde galluure Samariya ɓe ngoni. 21 Nde kaananke Israa'iila yi'unoo ɓe fu, wi'i Elisey:
— Yaa joomam, yalla mi waran ɓe fuu naa?
22 Elisey jaabii mo wi'i:
— A'aa, taa waru ɓe. Yalla aɗa woowi warude mo nanngirɗaa kaafaahi maa kure maaɗa naa? Taa waɗu noon. Hokku ɓe ko ɓe nyaama e ko ɓe njara de accaa ɓe koota to joomiiɓe.
23 Kaananke waɗani ɓe nyaamduuji belɗi feere-feere ɗuuɗɗi, ɓe nyaami ɓe njari. Caggal ɗuum o hokki ɓe laawol ɓe njeccii to kaananke maɓɓe. Noon Siiriyankooɓe accitiri konu Israa'iila nguun.
No rafo manngo waɗiri ley Galluure Samariya
24 Caggal ɗuum Ben-Hadad kaananke Siiriya hawrondini konunkooɓe muuɗum fuu de njehi faa kippowoo galluure Samariya. Ɓe piilii nde taa fay gooto naata maa wurtoo.
25 Ndeen rafo manngo waɗi ley galluure ndeen faa hoore araawa sonnaa buuɗi cardi 80, etirgel cuule buugaali du, buuɗi cardi joy. 26 Nyannde gomma kaananke Israa'iila na yiilto dow kokuwol galluure ndeen, de debbo gomma hucci to makko na wi'a mo:
— Wallam, joomam kaananke, wallam!
27 Kaananke oon wi'i mo:
— Si Joomiraaɗo wallaay ma, ɗume mballirammaami? Yalla nyaamri ngoodumi naa njaram?
28 O ɓeydi o wi'i:
— Ɗume hewtii ma?
Debbo oon wi'i:
— Inan debbo ooɗo wi'i kam mi wadda ɓiyam hannden faa min nyaama, de kam du wadda ɓiyum jaango. 29 Ngaddumi ɓiyam oon min njonngi ɗum min nyaami, ammaa jaangoore majjum kanko kaa o suuɗi ɓiyiiko.
30 Nde kaananke nannoo haala kaan fu, seeki kaddule muuɗum, heddii na yaha dow kokuwol ngool. Nde o yahannoo dow maggol ndeen, yimɓe taykii wo bootooru o ɓornii ley kaddule makko. 31 Imo feeko imo wi'a:
— Laamɗo jukkoroo kam ni e ni si hoore Elisey ɓii Safat jippaaki dow balaaje muuɗum hannden!
32 Tawi Elisey na jooɗii ley ɓaade muuɗum, mawɓe galluure ndeen na piili ɗum. Ndeen kaananke neli golloowo muuɗum gooto to Elisey. Fadde nelaaɗo oon e yottaade, Elisey wi'i mawɓe jooɗodiiɓe e muuɗum ɓeen:
— On nji'ii ɓii war-hooreejo o nelii goɗɗo faa wara itta hoore am! Nde nelaaɗo oon yottii fu, ommbon dammbugal taa accon o naata. Wanaa oɗon nana sawtu koyɗe kaananke na njokkii mo warde naa?
33 Elisey yottinaay haala kaan de nelaaɗo oon yottii. Kaananke wi'i Elisey:
— Torra kaa, to Joomiraaɗo ƴuuri. Ɗume keɗortoomi Joomiraaɗo katin?