No Na'aman danniraa
5
1 Hooreejo sordaasiiɓe kaananke Siiriya na wi'ee Na'aman, wo gorko mo joomum teddini sanne sabo e ballal makko Joomiraaɗo hokkirnoo ɗum jaalorgal. Gorko oon wo innde anndeejo, ammaa wo o nyawraaɗo nguru.2 Nde Siiriyankooɓe konoynoo Israa'iila ndeen, nanngiino cukalel dewel, ngartidi. Ngel laatii gollanoowo dee Na'aman. 3 Nyannde gomma cukalel ngeel haaldi e inna ɓaade ndeen, wi'i ɗum:
— Si joomam, jom ɓaade jaɓanno yaade to annabaajo gonɗo galluure Samariya oon fu, o dannan ɗum e nyawu muuɗum.
4 Nde Na'aman nannoo ɗum fu, yehi haalanowi kaananke Siiriya ko cukalel ngeel wi'i ɗuum. 5 Kaananke oon wi'i mo:
— Ndelle, yahu. Miin du, mi hokkete ɓataaki kaananke Israa'iila dow majjum.
Na'aman hooƴi laawol yehi. O yaadi e kilooji kaŋŋe 60 e cardi kilooji 300 e kolte sappo. 6 Nde o yottinoo to kaananke Israa'iila fu, o hokki ɗum ɓataaki kiin. Inan ko winndaa ley makki:
— Wakkati ɓataaki ki yottii ma fu, paamaa wo miin neli golloowo am Na'aman to maaɗa faa ndannaa ɗum e nyawu nguru tampinngu ɗum nguun.
7 Nde kaananke Israa'iila janngunoo ɓataaki kiin fu, seeki kaddule muuɗum de wi'i:
— Yalla wo miin woni Laamɗo baawɗo hokkude yonki maa ittude ɗum de o nela goɗɗo to am faa mi danna ɗum e nyawu muuɗum naa? Paamee wo fitina hakkunde amin o filoto!
8 Nde Elisey, Nelaaɗo Laamɗo oon nannoo kaananke Israa'iila seekii kaddule muuɗum fu, neli o wi'ee:
— Ko saabii de ceekuɗaa kaddule maaɗa? Mbi'ee gorko oon yottoo kam, ndeen faaman Israa'iila na woodi annabaajo.
9 Na'aman yottodii e torkooji e pucci muuɗum, darii dammbugal ɓaade Elisey na heɗii. 10 Elisey neli o wi'ee o yaha maayo Urdun o lootowo kile jeɗɗi de ɓanndu makko laaɓa, wooɗi du o daɗa.
11 Na'aman ɓerni sanne de dilli na wi'a:
— Mi sikkiinoo o wurtoto suudu makko, o wara o daroo o du'anoo kam e innde Joomiraaɗo, Laamɗo makko, o deka juuɗe makko dow am de mi daɗa. 12 Wanaa gooruuji meeɗen Abana e Parpar leydi Damas toon na ɓuri diyeele Israa'iila fuu naa? Ndelle mi yahataano toon ni, mi lootowo ley majji de mi daɗa naa?
O yeccii imo ɓerni sanne.
13 Maccuɓe makko ɓattii mo mbi'i:
— Joomii amin, si ko tiiɗi annabaajo oon wi'iino ngaɗaa, wanaa a waɗan naa? Sakko njahaa lootowoɗaa ley ndiyam tan faa ndaɗaa.
14 Ndeen o yehi maayo Urdun, o muti kile jeɗɗi hono no neɗɗo Laamɗo oon wiirunoo mo noon. Wakkati oon pay o daɗi nyawu makko nguun. Ɓanndu makko heyɗiti faa nanndi e ɓanndu suka pamaro. 15 O yeccii to neɗɗo Laamɗo oon, kanko e yaadiraaɓe makko. O naati o darii yeeso muuɗum, o wi'i:
— Joonin kaa mi faamii Laamɗo goɗɗo walaa ley adunaaru, si wanaa mo Israa'iila. Miɗo ŋaare njaɓaa moƴƴere nde miin, suka maaɗa ngaddammaami.
16 Elisey jaabii wi'i:
— Mi hunorake Joomiraaɗo buurɗo mo ngollanammi, mi jaɓataa faa'e e junngo maaɗa.
Na'aman heddii na ŋaaroo mo ammaa o jaɓaay.
17 Ndeen Na'aman wi'i:
— Ɓaawo a jaɓaay dokkal am ngaal, accaa miin, suka maaɗa mi ɓoɓta leydi Israa'iila haddi dimngal araaji baaneeji ɗiɗi faa mi teddinowa Joomiraaɗo dow mayri, sabo mi sakkantaa allaaji goɗɗi katin si wanaa Joomiraaɗo. 18 Miɗo ŋaaroo Joomiraaɗo yaafoo kam sabo nde joomam naatata ley suudu tooru Rimmon faa sujidana ndu fuu, na tiigo junngo am faa miin du, miɗo dikkinoo yeeso mayru. Ndelle miɗo ŋaaroo Joomiraaɗo yaafoo kam.
19 Elisey wi'i mo:
— Yahu e jam!
— Joomam accii Na'aman Siiriyanke o dilli yoɓaay fay huunde. Mi hunorake Joomiraaɗo buurɗo mi taaynan mo, danya ko njaɓumi to makko.
21 Gehaaji ummii taayni Na'aman. Nde Na'aman haccinoo imo dogga warde fu, jippii torkooru muuɗum puccu, hawri e makko de ƴami mo yalla wo jam naa.
22 Gehaaji jaabii mo wi'i:
— Jam tan! Wo joomam neli kam mi wi'ee, joonin worɓe ɗiɗo taalibaaɓe annabaaɓe ƴuuri baamle Efrayim, mbeerani ɗum. Saabe ɗuum de imo ŋaare kokkaa mo cardi kilooji 30 e kaddule yimɓe ɗiɗo faa o hokka ɓe.
23 Na'aman jaabii mo wi'i:
— Ndelle, jaɓu cardi kilooji 60.
O siini sanaa Gehaaji jaɓa, o ɗibbi cardi ndiin e kaddule ɗeen ley bootooji ɗiɗi de o ronndi ɗi maccuɓe makko ɗiɗo na ardii Gehaaji.
24 Nde ɓe njottinoo tilde gomma fu, Gehaaji jaɓi donle ɗeen nannowi ley suudu muuɗum de waynii ɓe. 25 Ndeen o wari to Elisey, o darii yeeso muuɗum. Elisey ƴami mo wi'i:
— Toy njaanoɗaa Gehaaji?
O jaabii ɗum o wi'i:
— Miin suka maaɗa, mi yahaayno faa'e.
26 Elisey wi'i mo:
— Yalla aɗa miila ruuhu am tawaaka nde gorko gomma jippinoo dow torkooru muuɗum puccu de hawri e maaɗa naa? Ndelle aɗa miila wo joonin woni wakkati jaɓude cardi e kaddule e leɗɗe jaytun e gese cabiije e na'i e baali e be'i e maccuɓe e horɓe? 27 Saabe ko ngaɗuɗaa ɗuum, nyawu Na'aman nguun wartan dow maaɗa aan e ƴuwdi ma faa abada.
Gehaaji dilli ɗo Elisey ɗoon wo nyawraaɗo nguru. Ɓanndu makko na rawni far hono haabu.