No Elisey walliri debbo mo gorum wuuraa
4
1 Nyannde gomma, dee gooto e taalibaaɓeno annabaaɓe ŋaari Elisey wi'i:— Taalibbo maa, jom suudu am wuuraa. Wooɗi du, aɗa anndi imo wuurdunoo e kulol Joomiraaɗo e ɓernde makko. Joonin le, gorko mo o joganinoo nyamaande warii faa nannga ɓiɓɓe amin worɓe ɗiɗo waɗowa maccuɓe.
2 Elisey jaabii mo wi'i:
— Ɗume njiɗɗaa mi waɗane? Hollam ko ngooduɗaa ley suudu maaɗa.
Debbo oon jaabii mo wi'i:
— Ɓiya debbo walaa faa'e si wanaa paalel nebbam gootel.
3 Elisey wi'i mo:
— Njahaa ŋaarowoɗaa wondiiɓe maaɗa paali ɓoli. Njaɓaa faa ɗuuɗa ngaddaa, 4 de aan e ɓiɓɓe maaɗa naaton suudu mooɗon, ommbon. Paccon nebbam ɗaam ley paali ɗiin. Faandu heewndu fuu, njoƴƴinon ɗum sera.
5 Debbo oon yehi waɗowi ko Elisey wi'i ɗuum. O naatidi e ɓiɓɓe makko ley suudu de o ommbi. Ɓiɓɓe ɓeen na kokka mo paali ɗiin imo hebbina ɗi nebbam.
6 Nde ɗi keewunoo fu, o wi'i gooto e ɓiɓɓe makko:
— Hokkam faandu wonndu katin.
Suka oon jaabii mo wi'i:
— Paali ɗiin fuu keewii.
Ndeen nebbam ɗaam seli jooraade.
7 Debbo oon yeccii haalani ɗum Elisey, Nelaaɗo Laamɗo oon, de jaabii mo wi'i:
— Njahaa connowaa nebbam ɗaam, ittaa njoɓaa nyamaande ndeen de mbuurdon ceede keddiiɗe, aan e ɓiɓɓe maaɗa.
No Elisey iirtiniri maayɗo
8 Nyannde gomma Elisey fanti galluure Sunem. Ley galluure ndeen, na woodi debbo jom jawdi gomma. Debbo oon baanti Elisey nyaama ley ɓaade muuɗum. Gilla ndeen, nde Elisey fanti galluure ndeen fu, to maɓɓe nyaamata.
9 Nyannde gomma debbo oon wi'i gorum:
— Miɗo anndi gorko garoo ɗo meeɗen wakkati fuu oon wo ceniiɗo, Nelaaɗo Laamɗo. 10 Ndelle en nyiɓana mo suudu famardu dow samannde suudu meeɗen dowuure de ngattanen mo leeso e taabawal e jooɗorgal e fitilla. Tawee nde o wari fu, o heɓa ɗo o waala.
11 Nyannde gomma Elisey wari wuro maɓɓe de waali ley cuurel ngel ɓe nyiɓani ɗum ngeel. 12 O haaldi e Gehaaji golloowo makko o wi'i ɗum:
— Noddanam debbo Sunaminke o wara.
— Mbi'aa mo: «A tampanii min sanne. Ɗume kaajaɗaa min ngaɗane? Yalla wo haaju ngooduɗaa to kaananke maa to hooreejo sordaasiiɓe de aɗa yiɗi walleede naa?»
Debbo oon jaabii wi'i:
— Mi haajaaka faa'e, e jam njooɗiimi hakkunde yimɓe am.
14 Elisey ƴami Gehaaji wi'i:
— Ndelle ɗume kaanuɗen waɗande mo?
Gehaaji jaabii mo wi'i:
— Inan o walaa ɓiɗɗo, wooɗi goriiko du naywi.
15 Elisey wi'i Gehaaji nodda mo katin. Gehaaji noddi mo. O wari o darii e dammbugal.
16 Elisey wi'i mo:
— Mawuuri hono wakkati o, tawan aɗa wuundi ɓiɗɗo gorko e junngo maaɗa.
Debbo oon jaabii mo wi'i:
— A'aa! Joomam Nelaaɗo Laamɗo, taa fenan ɓiya debbo!
17 Caggal ɗuum, debbo oon hooƴi reedu. Nde wakkati oon warunoo fu, rimi ɓiɗɗo gorko, hono no Elisey wiirunoo mo noon.
18 Cukalel ngeel mawni. Nyannde gomma ngel taayniti baabiigel ley ngesa to taƴooɓe gawri. 19 Wakkati oon ngel wi'i baabiigel:
— Hoore am na naawa! Hoore am na naawa!
Baabiigel oon wi'i maccuɗo muuɗum gooto:
— Ƴeptu mo njaaraa to inniiko.
20 Maccuɗo oon hooƴi ngel yaari to inniigel. Inniiwo oon yowi ngel dow koyɗe muuɗum faa hakkunde naange de ngel maayi. 21 Ndeen o ƴeenyidi e maggel suudu, o fukkinowi ngel dow leeso Elisey, o ommbi suudu nduun de o wurtii. 22 O nelani goriiko, o wi'i ɗum:
— Hokkam maccuɗo gooto e araawa, faa mi yaha law law to Nelaaɗo Laamɗo de mi wara.
23 Goriiko oon ƴami mo wi'i:
— Ɗume ngaɗoytaa to makko hannden de wanaa iidi darorɗe lewru wooɗi du, wanaa nyannde fowteteende?
Debbo oon jaabii mo wi'i:
— Baasi fuu walaa.
24 O hirkini araawa ngaan de o wi'i maccuɗo oon:
— En njaha. Taa kandaa kam dow laawol fay nokku gooto si wanaa nde mbiimi ndaroɗaa.
25 O adi laawol o yehi waamnde Karmel to Nelaaɗo Laamɗo oon jooɗii toon. Nde Elisey haccinoo imo wara fu, wi'i Gehaaji:
— Ndaar, wo debbo Sunaminke o warata. 26 Doggu kawra e makko njaɓɓoɗaa mo de ƴamaa mo yalla wo jam naa? Yalla goriiko e ɓiyiiko fuu na celli naa?
Debbo oon jaabii wi'i:
— Jam tan!
27 Nde o yottinoo to Nelaaɗo Laamɗo dow waamnde toon fu, o saami yeeso muuɗum de o tuggi koyɗe muuɗum. Gehaaji ɓattitii faa dunƴa mo, ammaa Elisey wi'i:
— Accu mo, sabo wo mettorgal ɓernde waddi mo, ammaa Joomiraaɗo suuɗii, ɓanginanaay kam ɗum.
28 Debbo oon wi'i:
— Yalla wo miin ŋaarii joomam ɓiɗɗo gorko naa? Yalla mi wi'aayno ma taa penanaa kam naa?
29 Ndeen Elisey wi'i Gehaaji:
— Kaɓɓinoɗaa kaɓɓorgol maaɗa, de kooƴaa sawru am njahaa. Taa njowtaa fay gooto, taa nootoɗaa fay gooto si jowtii ma. Ndekowaa sawru nduun e yeeso suka oon.
30 Inna suka oon wi'i:
— Mi hunorake Joomiraaɗo buurɗo, mi hunorake yonki ma aan du, mi dillataa ɗo maaɗa ɗoo.
Ndeen Elisey ummii yaadi e makko.
31 Gehaaji artii ɓe yottaade, yowi sawru nduun e yeeso cukalel ngeel, ammaa ngel sonnyaay ngel dimmbaaki. O yeccii o hawrowi Elisey, o wi'i ɗum:
— Suka oon fintaay.
32 Ndeen Elisey yottii wuro ngoon tawi cukalel maayngel ngeel na fukkinaa dow leeso muuɗum. 33 O naati ley suudu nduun, o ommbitii kanko e cukalel ngeel de o nyaagii Joomiraaɗo. 34 O fukkii dow maggel, o sukki hunnduko makko e hunnduko maggel, gite makko e gite maggel, juuɗe makko e juuɗe maggel. O heddorii noon dow maggel. Ɓanndu maggel fuɗɗi na foowa. 35 Elisey jippii dow leeso ngoon, na yaha na warta ley cuurel muuɗum toon de yeccii dow cukalel ngeel, o fukkii dow maggel katin. Ndeen ngel ɗiili kile jeɗɗi de ngel feerti gite maggel.
36 Elisey noddi Gehaaji wi'i ɗum:
— Noddu Sunaminke oon.
Gehaaji noddi mo, o wari. Ndeen Elisey wi'i mo:
— Jaɓu, ɓiya!
37 Debbo oon saami dow koyɗe makko, hofii de sakitii hooƴi cukalel muuɗum ngeel wurtodii.
No Elisey nyifiri tooke ley fayannde
38 Elisey yeccii galluure Gilgal. Tawi wakkati oon rafo na mawni e leydi ndiin sanne. Jamaare taalibaaɓe annabaaɓe ndeen na njooɗii yeeso makko. O wi'i golloowo makko:
— Ummoɗaa ndekaa fayannde mawnde de ngaɗanaa jamaare ndee ko nyaama.
39 Ndeen gooto maɓɓe ummii naatii ladde faa ittowa haako de yi'i layol paaloy koronti*. O ɓori paaloy kooy faa saayo makko heewi. Nde o wartunoo fu, ɗum taƴaa ɗum wattaa e fayannde de ɗum jonngaa, ammaa ɓe anndaano ko ɗum laatii.
40 Nde ɗum ɓenndunoo fu, o rottani jamaare ndeen ammaa meeɗuɗo ɗum fu, wo halɓan na wi'a:
— Nelaaɗo Laamɗo, ko wattaa ley fayannde ndee ɗuum wo baroojum!
— Ndottee kokkee ɓe nyaama.
Tooke fuu tawaaka ley fayannde ndeen katin.
No Elisey nyaamniri yimɓe hemre
42 Gorko gomma ƴuuri galluure Ba'al-Salisa, waddani Nelaaɗo Laamɗo oon buuru gaɗiraaɗo sa'iiri artundi ɓenndude ley ngesa muuɗum, e gawri keyri ley bootooru. Elisey wi'i golloowo muuɗum:
— Peccaa ɗum kokkaa yimɓe ɓee nyaama.
43 Golloowo makko oon jaabii mo wi'i:
— Noy pecciranammi ɗum yimɓe 100?
Elisey jaabii mo wi'i:
— Peccaa ɗum kokkaa ɓe nyaama sabo inan ko Joomiraaɗo wi'i: Ɓe fuu ɓe nyaaman faa ɓe kaara, wooɗi du, ɗum heddoto.
44 Ndeen o fecci ɗum de yimɓe tawaaɓe ɗoon fuu nyaami faa keddi fodde no Joomiraaɗo wiirunoo noon.