No Yoram laamorii Israa'iila
3
1 Yoram ɓii Ahabi jeyaaɗo Samariya laatii kaananke Israa'iila ley hitaande sappo e jeetataɓerde laamu Yehosafat kaananke Yahuuda. O laamorii duuɓi 12. 2 O waɗi ko boni yeeso Joomiraaɗo. Ammaa bone mo o waɗi oon hewtaay mo baabiiko e inniiko ngaɗunoo sabo o halkii bimmbeere tooru Ba'al nde baabiiko darnunoo ndeen. 3 Kaa o haɓɓondirii e hakkeeji ɗi Yerobo'am ɓii Nebat wattunoo Israa'iila ɗiin. O seedaay e majji.No kaanankooɓe tato kaɓdiri e Mo'ab
4 Mesa, kaananke Mo'ab na woodunoo cogge baali ɗuuɗɗe. Hitaande fuu, imo yoɓannoo kaananke Israa'iila ɓiɓɓe baali 100 000 wooɗi du imo yoɓannoo leeɓi ittaaɗi e jawɗi* 100 000. 5 Ammaa caggal maayde Ahabi, o muurtani Israa'iila.
6 Wakkati kaananke Yoram nannoo ɗum fu, dilli Samariya faa hawrondinowa sordaasiiɓe Israa'iila fuu. 7 O neli Yehosafat kaananke Yahuuda wi'ee:
— Kaananke Mo'ab muurtanii kam. Yalla a waran kaɓdowen e makko naa?
Yehosafat jaabii wi'i:
— Ayyo, mi waran, sabo en fuu en gootum. Sordaasiiɓe am wo sordaasiiɓe maaɗa, pucci am du wo pucci maaɗa.
8 O ɓeydi o wi'i:
— Laawol ngole ndeweten?
Yoram jaabii mo wi'i:
— En ndewan laawol ƴuuroowol ladde Edom.
9 Ndeen kaananke Israa'iila e mo Yahuuda e mo Edom fuu ndilliri Mo'ab. Ɓe ngaɗi nyalaaɗe jeɗɗi iɓe njaha dow laawol maɓɓe piiliingol. Caggal ɗuum, ɓe kunngii ndiyam ko ɓe njara, kamɓe e daabaaji maɓɓe.
10 Kaananke Israa'iila wi'i:
— Kaari! Sikke walaa Joomiraaɗo waddii en ɗo, enen kaanankooɓe tato ɓee, faa watta en e juuɗe Mo'abinkooɓe!
11 Yehosafat ƴami ɓe wi'i:
— Yalla en ngaldaa e annabaajo Joomiraaɗo fay gooto mo mbaawɗen lamndaade muuyɗe Joomiraaɗo naa?
Gooto e yimɓe kaananke Israa'iila jaabii wi'i:
— Eɗen ngondi e Elisey ɓii Safat, lootannooɗo juuɗe annabi Iliyaasa oon.
12 Yehosafat wi'i:
— Wo goonga, konngol Joomiraaɗo na wondi e makko.
Ndeen kaananke Israa'iila e Yehosafat e kaananke Edom njehi to makko.
13 Elisey wi'i kaananke Israa'iila:
— Ɗume hawti en? Ɗume saabi de a yahataa ƴamowaa annabaaɓe bammaa e ɓe inna ma ɓeen?
Kaananke Israa'iila jaabii wi'i:
— Accu ɗuum! Sabo Joomiraaɗo waddii min ɗo, minen kaanankooɓe tato ɓee, faa watta min e juuɗe Mo'abinkooɓe.
14 Elisey wi'i:
— Mi hunorake Joomiraaɗo buurɗo, Jom Baawɗe mo ɗowtantoomi, si wanaa saabe Yehosafat kaananke Yahuuda mo njaagotoomi oon fu, mi ndaarataa ma sabo a heƴanaay kam faa'e. 15 Ammaa ngaddanee kam koɗoo hoddu.
— Inan ko Joomiraaɗo wi'i: Mbasee gaafi keewɗi ley naɗɗol joorngol ngol. 17 Joomiraaɗo wi'i on nji'ataa ƴoonde maa henndu, ammaa naɗɗol ngool heewan ndiyam faa njaron onon e daabaaji mooɗon fuu, 18 de ɗuum wo seeɗa yeeso Joomiraaɗo. Wooɗi du, o wattan Mo'abinkooɓe e juuɗe mooɗon. 19 On kalkan galluuje maɓɓe cemmbiɗinɗe e ɓurɗe teddude fuu. Coppon leɗɗe leydi maɓɓe dimooje, cukkon ilduɗe ndiyam maɓɓe fuu de kalkiron gese maɓɓe fuu kaaƴe ɗuuɗɗe.
20 Jaangoore majjum gilla subaka, wakkati waɗeede sadaka, ndiyam ƴuuri Edom heewi leydi ndiin fuu.
21 Tawi Mo'abinkooɓe nanii kaanankooɓe na ngara faa kaɓda e muɓɓen. Ndelle ɓe njaari jokolɓe hewtuɓe yaade konu e nayeeɓe fuu dow keerol leydi maɓɓe. 22 Subaka majjum, ɓe ummii de iɓe nji'a naange na ɗelka yeeso maɓɓe dow ndiyam. Diyeele ɗeen fuu na mbojji hono ƴiiƴam. 23 Ndeen ɓe mbi'i:
— Ɗum wo ƴiiƴam! Kaanankooɓe ɓeen coppondiri de mbarondiri. Joonin kaa en njaha kooƴowen jawdi maɓɓe!
24 Nde ɓe njottinoo hoɗorde Israa'iilankooɓe fu, ɓeen ummii naati e maɓɓe, tappi ɓe faa ɓe ndoggi. Ndeen Israa'iilankooɓe ndoggiri leydi Mo'ab, naati ndi kalki ɓe. 25 Ɓe kalki galluuje ɗeen. Mono e maɓɓe fuu e hayre muuɗum, iɓe paɗɗa faa ɓe kebbini gese ɗeen fuu kaaƴe. Ɓe cukki ilduɗe ndiyam ɗeen fuu de ɓe coppi leɗɗe dimooje fuu. Galluure Kir-Hareset tan heddinoo halkaaka. Ammaa kayre du, ɓe piilii nde iɓe piwlo iɓe paɗɗa nde kaaƴe.
26 Nde kaananke Mo'ab yi'unoo jaaltaama fu, wurtodii e konunkooɓe 700 tiigiiɓe kaafaaje faa feƴƴita konunkooɓe fiiliiɓe galluure ɓeen de yottoo kaananke Edom. Ammaa o waawaay. 27 Ndelle o hooƴi hammadiijo makko donoowo mo laamu, o waɗi ɗum sadaka buleteeɗo dow kokuwol galluure ndeen. Mettorgal manngal saamii dow Israa'iilankooɓe saabe majjum, de ndilli Mo'ab, njeccii kooti leydi muɓɓen.