No Iliyaasa ƴeenciniraa kammu
2
1 Inan ko waɗi wakkati Joomiraaɗo ƴeencinannoo Iliyaasa kammu nder duluuru, tawi Iliyaasa e Elisey ndilliino Gilgal. 2 Ndeen Iliyaasa wi'i Elisey:— Keddoɗaa ɗo, sabo Joomiraaɗo nelii kam Baytila.
Elisey jaabii mo wi'i:
— Mi hunorake Joomiraaɗo buurɗo, mi hunorake yonki maa aan du, mi seedataa e maaɗa.
Ndeen ɓe njaadi Baytila.
3 Taalibaaɓe annabaaɓe wonnooɓe Baytila mburtii kawri e Elisey de mbi'i ɗum:
— Yalla aɗa anndi Joomiraaɗo hooƴan jooma hannden naa?
O jaabii ɓe o wi'i:
— Ayyo, miɗo anndi. Ndeƴƴinee.
4 Iliyaasa wi'i Elisey:
— Keddoɗaa ɗo, sabo Joomiraaɗo nelii kam Yeriko.
Elisey jaabii mo wi'i:
— Mi hunorake Joomiraaɗo buurɗo, mi hunorake yonki ma aan du, mi seedataa e maaɗa.
Ndeen ɓe njaadi Yeriko.
5 Taalibaaɓe annabaaɓe wonnooɓe Yeriko ngari mbi'i Elisey:
— Yalla aɗa anndi Joomiraaɗo hooƴan jooma hannden naa?
O jaabii ɓe o wi'i:
— Ayyo, miɗo anndi. Ndeƴƴinee.
6 Caggal ɗuum Iliyaasa wi'i mo:
— Keddoɗaa ɗo, sabo Joomiraaɗo nelii kam maayo Urdun.
Elisey jaabii mo wi'i:
— Mi hunorake Joomiraaɗo buurɗo, mi hunorake yonki ma aan du, mi seedataa e maaɗa.
Ɓe paltorii yeeso, 7 ɓe ndarowii daande Urdun. Taalibaaɓe annabaaɓe 50 du ndarowii to toowti e maɓɓe.
8 Ndeen Iliyaasa ɓortii saayo muuɗum, taggi ngo de fiyiri ndiyam ɗaam. Ɗam feccii pecce ɗiɗi. Ɓe peƴƴiti ɗam dow leydi njoorndi.
9 Nde ɓe peƴƴitinno ndeen, Iliyaasa wi'i Elisey:
— Ko kaajaɗaa mi waɗane fuu ŋaaroɗaa kam, fadde am e senndeede e maaɗa.
Elisey jaabii mo wi'i:
— Miɗo ŋaare hono ruuhu gonɗo e maaɗa oon, kile ɗiɗi.
10 Iliyaasa wi'i mo:
— A ŋaarake kam ko tiiɗi waɗude, ammaa si ni a yi'ii kam wakkati cenndeteemi e maaɗa fu, ɗum laatoto. Kaa si wanaa noon fu, ɗum laatataako.
11 Wakkati ɓe ngonnoo iɓe pilloo dow laawol ndeen, torkooru e pucci yiite njottii cenndi ɓe. Duluuru mawndu ɓanti Iliyaasa dow. 12 Nde Elisey yi'unoo ɗum fu, heddii na feekoo na wi'a:
— Baaba am! Baaba am! Aan laataninooɗo Israa'iila kaɓitirɗe e konunkooɓe!
Noon Iliyaasa lalliri e gite makko. Caggal ɗuum o seeki kaddule makko pecce ɗiɗi.
13 O hooƴi saayo Iliyaasa saamunoongo de o yeccii o darowii daande Urdun toon. 14 O ɓanti saayo ngoon o fiyiri ndiyam ɗaam de o wi'i:
— Toy Joomiraaɗo, Laamɗo Iliyaasa woni?
Ndeen ɗam feccii pecce ɗiɗi de o feƴƴiti.
15 Taalibaaɓe annabaaɓe wonnooɓe Yeriko ɓeen kaccii mo yeeso muɓɓen imo wara de mbi'i:
— Ruuhu Iliyaasa oon wartii e Elisey!
Ɓe kawri e makko ɓe kippii e leydi yeeso makko ɓe njowti mo.
16 Ndeen ɓe mbi'i mo:
— Hakkunde amin minen sukaaɓe maaɗa, na woodi worɓe 50 semmbiɗinɓe. Nelaa ɓe njaha ɓe pilanoye jooma. Na hasii Ruuhu Joomiraaɗo hooƴii mo yaari dow baamle maa ley naɗɗi.
Kaa Elisey jaɓaay ɓe njaha.
17 Ammaa ɓe keddii iɓe ŋaaroo mo faa ɗum yaaginii mo de o wi'i ɓe njaha. Ndeen ɓe neli worɓe 50 njaha pilowoo Iliyaasa. Ɓeen pilorii ɗum balɗe tati de nji'aay ɗum.
18 Ɓe njeccii ɓe ngarti to Elisey, tawi na heddi ley Yeriko. Ndeen kam du wi'i ɓe:
— Yalla mi haalanaayno on taa njahon naa?
No Elisey laaɓiniri ndiyam
19 Yimɓe Yeriko mbi'i Elisey:
— Baaba, a yi'ii no galluure ndee wooɗiri, ammaa ndiyam mayre wooɗaa. Leydi ndiin du wo mbaatundi, ndi rimataa faa'e.
20 O jaabii ɓe o wi'i:
— Ngaddanee kam taasawal kesal de ngatton lamɗam ley maggal.
Ɓe ngaddani mo. 21 O yehi o darowii dow ildude ndiyam ndeen de o rufi lamɗam ɗaam dow mayre de o wi'i:
— Inan ko Joomiraaɗo wi'i: Mi laaɓinii ndiyam ɗaam. Ɗam saabantaako fay gooto maayde wooɗi ɗam halkataa ndimu katin.
22 Ndiyam ɗaam laatii laaɓuɗam gilla ndeen faa warde hannden, fodde konngol burtiingol e hunnduko Elisey.
No jalnoriiɓe Elisey kalkiraa
23 Elisey dilli Yeriko yehi Baytila. Nde o yahannoo dow laawol ndeen, sukaaɓe worɓe mburtii galluure ndeen na njalnoroo mo na mbi'a:
— Ƴeenyu, ƴeenyu hey teeleende, ƴeenyu!
24 O yeeƴii, o ndaari ɓe de o huɗiri ɓe e innde Joomiraaɗo. Wakkati oon kujje ladde mawɗe ɗiɗi dewe* mburtii ley cukkuri ɗoon de ceeki sukaaɓe 42 hakkunde maɓɓe.
25 O dilli ɗoon, o yehi waamnde Karmel, caggal ɗuum o yeccii galluure Samariya.