Dewtere Kaanankooɓe Ɗiɗaɓerde
No Iliyaasa sapporii maayde kaananke Ahajiya
1
1 Caggal maayde Ahabi, Mo'ab muurtani Israa'iila.2 Tawi, Ahajiya ƴuwii e feneetere suudu muuɗum dowuuru wonndu Samariya saami de nawni nawnande mawnde. O neli woɓɓe njaha to Ba'al-Sebub, alla Ekoron, faa faamina mo yalla o daɗan nawnande makko ndeen naa o daɗataa.
3 Ndeen maleyka Joomiraaɗo haaldi e annabi Iliyaasa jeyaaɗo Tisibi, wi'i ɗum:
— Ummoɗaa, kawrowa e nelaaɓe kaananke Samariya ɓeen de ƴamaa ɓe yalla Israa'iila walaa Laamɗo mo lamndoo de iɓe njaha to Ba'al-Sebub, alla Ekoron oon naa? 4 Saabe majjum inan ko Joomiraaɗo wi'i: «Aan Ahajiya a ummataako dow leeso ngo pukkiɗaa ngoon. Tannyoraa a maayan.»
Nde Iliyaasa yottinnoo haala kaan fu, dilli. 5 Nelaaɓe ɓeen njeccii to kaananke muɓɓen. Kaananke oon ƴami ɓe wi'i:
— Ko saabii de njecciɗon?
6 Ɓe njaabii mo, ɓe mbi'i:
— Gorko gomma hawri e amin de wi'i min: «Njeccee to kaananke neluɗo on oon de mbi'on ɗum inan ko Joomiraaɗo wi'i: Yalla Israa'iila walaa Laamɗo de aɗa nela to Ba'al-Sebub, alla Ekoron naa? Saabe ɗuum aan Ahajiya a ummataako dow leeso ngo pukkiɗaa ngoon. Tannyoraa a maayan.»
7 Kaananke oon ƴami ɓe, wi'i:
— Noy gorko mo kawruɗon oon wa'i?
8 Ɓe njaabii mo ɓe mbi'i:
— Imo ɓornii kaddule gaɗiraaɗe leeɓi, wooɗi du imo haɓɓinii kaɓɓorgol nguru.
Kaananke jaabii wi'i:
— Oon jaati woni Iliyaasa jeyaaɗo Tisibi oon!
9 Ndeen kaananke Ahajiya neli hooreejo sordaasiiɓe, yaada e worɓe 50 to Iliyaasa. Tawi Iliyaasa na jooɗii faa dow waamnde. Hooreejo sordaasiiɓe oon yottii wi'i mo:
— Nelaaɗo Laamɗo, kaananke yamirii njippoɗaa!
10 Iliyaasa jaabii mo, wi'i:
— Si goonga wo mi Nelaaɗo Laamɗo fu, yiite ƴuura e kammu jippoo nyaame aan e yaadiraaɓe maaɗa 50 ɓeen fuu.
Wakkati oon yiite ƴuuri e kammu, nyaami mo, kanko e yaadiraaɓe makko 50 ɓeen fuu.
11 Kaananke neli hooreejo goɗɗo katin, yaada e worɓe 50. Oon du yehi to Iliyaasa faa dow waamnde toon, de wi'i ɗum:
— Nelaaɗo Laamɗo, inan ko kaananke wi'i: njippoɗaa law!
12 Iliyaasa jaabii ɓe, wi'i:
— Si goonga wo mi Nelaaɗo Laamɗo fu, yiite ƴuura e kammu, jippoo nyaame aan e yaadiraaɓe maaɗa 50 ɓeen fuu.
Ndeen yiite mannge ƴuuri e kammu, nyaami mo, kanko e yaadiraaɓe makko 50 ɓeen fuu.
13 Kaananke Ahajiya neli hooreejo sordaasiiɓe tataɓo, yaada e worɓe 50. Hooreejo oon du tawoy Iliyaasa faa dow waamnde toon. Nde o yottinoo fu, o hofii yeeso Iliyaasa, de o ŋaarii ɗum, o wi'i:
— Nelaaɗo Laamɗo, miɗo ŋaare, yonkiiji amin minen sukaaɓe maaɗa ɗiin laatoo korsuɗi e gite maaɗa. 14 Inan, yiite ƴuurunge e kammu halkii hooreeɓe sordaasiiɓe ɗiɗo e yaadiraaɓe muɓɓen fuu. Joonin le, miɗo ŋaare, yonki am laatoo ko horsi e gite maaɗa.
15 Ndeen maleyka Joomiraaɗo wi'i Iliyaasa:
— Njippodoɗaa e makko, taa hulu.
— Inan ko Joomiraaɗo wi'i: Aan kaananke a waɗii nelaaɓe njaha ƴamowa Ba'al-Sebub, alla Ekoron. Yalla Israa'iila walaa Laamɗo ŋaareteeɗo naa? Saabe ɗuum, a ummataako dow leeso ngo pukkiɗaa ngoon. Tannyoraa a maayan.
17 Kaananke maayiri hono no Joomiraaɗo wiirunoo e hunnduko Iliyaasa noon. Sakiike makko Yoram loomti mo laamii, sabo o walaano ɓiɗɗo gorko. Ɗum waɗii ley hitaande ɗiɗaɓerde laamu Yoram ɓii Yehosafat kaananke Yahuuda.
18 Kabaaru kaananke Ahajiya keddiiɗo e ko waɗi fuu na winndaa ley Dewtere Kabaaruuji Kaanankooɓe Israa'iila.