No Laamɗo hokkiri Muusaa baawɗe waɗude maandeeji kaayniiɗi
4
1 Muusaa jaabii Joomiraaɗo, wi'i:— Ndaar, ɓe njaɓataa haala am, ɓe kettindantaako kam. Ɓe mbi'an kam: Joomiraaɗo ɓanganaay ma fey?
2 Joomiraaɗo ƴami mo:
— Ɗume njogiɗaa e junngo maaɗa?
Muusaa jaabii, wi'i:
— Wo sawru.
3 Joomiraaɗo wi'i:
— Faɗɗu ndu e leydi.
— Foortu junngo maa nanngaa laccol mayri.
— Ɗum wo faa ɓe ngoonɗina, ɓe njaɓa wo miin Laamɗo Joomiraaɗo, Laamɗo maamiraaɓe maɓɓe Ibrahiima e Isiyaaku e Yaakuuba ɓangani ma.
6 Ndeen Joomiraaɗo wi'i: «Wattu junngo maa ley saaya maa, ndekaa ngo dow ɓernde maa.»
O watti ngo ley toon. Nde o wurtinnoo ngo fu, o tawi ngo seppinɗinii, ingo rawni far. 7 Joomiraaɗo wi'i mo:
— Yeccin ngo.
Muusaa yeccini ngo. Nde o wurtinnoo ngo fu, o tawi ngo wartii no ngo worrunoo.
8 Joomiraaɗo wi'i mo:
— Si ɓe koolaaki ma, ɓe njaɓaay maande arandeere ndeen fu, ɓe njaɓan ɗiɗaɓerde ndeen. 9 Ammaa si ɓe koolaaki maandeeji ɗiɗi ɗiin, ɓe kettindanaaki ma fu, ittaa ndiyam seeɗa ley maayo Nil, ndufaa ɗam dow leydi njoorndi. Ndiyam ɗam ittuɗaa e maayo de ndufuɗaa dow leydi ɗaam waylitoto ƴiiƴam.
10 Muusaa wi'i Joomiraaɗo:
— Yaa, Joomiraaɗo! Mi wanaa baawɗo haala. Abada miin maccuɗo maa, mi waawaay ɗum, gilla arande faa warde hannden ɗo kaaldataa e am ɗo. Miin wo mi tedduɗo ɗemngal, toni am du njaawaa haalde.
11 Joomiraaɗo wi'i mo:
— Moy hokki tagaaɗo hunnduko? Moy waawi muumɗinde naa faaɗinde neɗɗo? Moy du waawi yiinude naa moy waawi wumnude neɗɗo? Wanaa wo miin Joomiraaɗo naa? 12 Ndelle yahu. Miin miɗo wondi e hunnduko maaɗa. Mi tindinte ko kaalataa fuu.
13 Ndeen Muusaa wi'i:
— Yaafam Joomiraaɗo, nulu goɗɗo feereejo mo muuyɗaa.
14 Ndeen Joomiraaɗo ɓernani Muusaa, wi'i: Wanaa sakiike maa Haaruuna Lewinke oon na ɗoon naa? Miɗo anndi imo waawi haala. Inani imo wara faa o hawra e maaɗa. Nde o yi'i ma fu, ɓernde makko seyoto. 15 Kaalanaa mo haalaaji ɗi o jeyi haalde fuu. Miin miɗo wondi e hunnduko maa e hunnduko makko du. Mi tindinan on ko njeyɗon waɗude. 16 Katin du wo kanko haalata nokku maaɗa yeeso yimɓe ɓeen. O laatoto hunnduko maaɗa. Aan du, a daranto mo darnde Alla. 17 Wooɗi sawru ndu du, joga ndu, ngaɗiraa ndu golleeji kaayniiɗi.
No Muusaa soƴƴorii leydi Misira
18 Caggal ɗuum Muusaa soƴƴii to esum Yetiro, wi'i ɗum:
— Miɗo ŋaare, accu mi hoota to yimɓe am ley leydi Misira toon, mi ndaara yalla faa joonin iɓe mbuuri.
Yetiro wi'i:
— Yahu e jam.
19 Joomiraaɗo ɓeydi haaldude e Muusaa ley Madiyan toon, wi'i ɗum: Soƴƴa leydi Misira, sabo yimɓe filotonooɓe warde ma ɓeen fuu maayi.
20 Muusaa hooƴi deekum e ɓiɓɓe muuɗum worɓe waɗɗini ɗum'en araawa, soƴƴii leydi Misira. Muusaa ina tiigii sawru Laamɗo nduun e junngo muuɗum. 21 Joomiraaɗo wi'i katin Muusaa:
— Si a soƴƴake leydi Misira fu, ngaɗaa maandeeji kaayniiɗi ɗi ngattumi e junngo maa ɗiin fuu yeeso Fira'awna. Ammaa mi yoornan ɓernde makko faa o saloo yoppude yimɓe ɓeen ndilla. 22 Mbi'aa Fira'awna: «Inan ko Joomiraaɗo wi'i: Israa'iila kam woni ɓiyam afo. 23 Miɗo wi'e njoppaa ɓiyam oon yaha teddina kam. Ammaa si a salake yoppude mo o yaha fu, mi waran ɓiya gorko afo.»
24 Nder jahaangal maɓɓe, ɓe koɗi nokku gomma. Ley nokku ɗo ɓe koɗi ɗoon, Joomiraaɗo ɓattitii Muusaa, filii warude ɗum. 25 Sifoora hooƴi hayre welunde hono laɓi nii, haddi ɓiyum. O adi muru ngu o taƴi nguun, o faɗɗi e koyɗe Muusaa. O wi'i:
— Wo a goriiwo jiɗɗo rufude ƴiiƴam.*
26 Ndeen Joomiraaɗo yoppi Muusaa. Wo saabe taadagol ngool waɗi debbo oon wi'i: «Wo a goriiwo jiɗɗo rufude ƴiiƴam.»
27 Joomiraaɗo wi'i Haaruuna:
— Yahu to ladde yoornde, faa kawraa e Muusaa.
Haaruuna yehi hawri e Muusaa to waamnde Laamɗo, muccii ɗum. 28 Muusaa haalani Haaruuna haalaaji ɗi Joomiraaɗo hokki ɗum fuu e kabaaru maandeeji kaayniiɗi ɗi Joomiraaɗo yamiri ɗum waɗa. 29 Ndeen Muusaa e Haaruuna njehi noddi mawɓe yimɓe Israa'iila fuu kawrunduri ɗum'en. 30 Haaruuna haalani ɓe haalaaji ɗi Joomiraaɗo wi'i Muusaa fuu. Muusaa du waɗi maandeeji kaayniiɗi ɗiin yeeso yimɓe ɓeen. 31 Yimɓe ɓeen njaɓi, koolii. Ɓe paami Joomiraaɗo ina hakkilani ɓe kamɓe yimɓe Israa'iila, yi'ii du torraaji maɓɓe. Ɓe fuu ɓe ndikkinii, ɓe cujidi.