No Laamɗo noddiri Muusaa
3
1 Muusaa ina duranno dammuuli esum Yetiro almaami Madiyan (noddirteeɗo Rewel oon). Nyannde gomma o yaari dammuuli ɗiin sera gorgal ladde yoornde. O yottii waamnde Laamɗo wi'eteende Horep. 2 Maleyka Joomiraaɗo ɓangani mo e ley leewngol yiite ley wuumoore. O haynii, o yi'i inan wuumoore ina huɓɓa ammaa jaawataa. 3 Muusaa wi'itii:— Mi ɓattitoto mi ndaara huunde haayniinde nde, ko waɗi wuumoore nde jaawataa.
4 Nde Laamɗo Joomiraaɗo yi'unoo o ooncake faa o ndaara fu, noddi mo ley wuumoore ndeen, wi'i:
— Muusaa! Muusaa!
O jaabii, o wi'i:
Inani kam.
5 Ndeen Laamɗo wi'i:
— Taa ɓattita ɗo. Ɓorta paɗe maa sabo nokku ɗo ndariɗaa ɗo wo ceniiɗo.
6 O wi'i katin:
— Miin woni Laamɗo baaba maaɗa, Laamɗo Ibrahiima e Isiyaaku e Yaakuuba.
Ndeen Muusaa suddi yeeso muuɗum sabo hulii ndaarude Laamɗo.
7 Joomiraaɗo wi'i:
— Goonga, mi yi'ii mettorgal yimɓe am ley Misira. Mi nanii bullaali maɓɓe saabe torrooɓe ɓe. Miɗo anndi torraaji maɓɓe. 8 Saabe ɗuum waɗi njippiimi faa mi danna yimɓe am e baawɗe Misirankooɓe, mi itta ɓe leydi Misira, mi yaara ɓe leydi lobbiri njaajundi, leydi ndi kosam e njuumndi ilata e muuɗum, nokkuure ɗo Kanaaninkooɓe e Hitiyankooɓe e Amorinkooɓe e Perisinkooɓe e Hewinkooɓe e Yebusinkooɓe njooɗii. 9 Inan bullaali Israa'iilankooɓe njottake kam. Katin du mi yi'ii ɓillaare nde Misirankooɓe ɓilli ɓe. 10 Wooɗi mi nulete to Fira'awna faa mburtinaa yimɓe am Israa'iilankooɓe ɓeen leydi Misira.
11 Ammaa Muusaa wi'i Laamɗo:
— Miin wo mi moy faa mi yaha to Fira'awna, mi wurtina Israa'iilankooɓe leydi Misira?
12 Laamɗo wi'i:
— Mi wondan e maaɗa. Inan maande holloore wo miin nuli ma. Nde mburtinɗaa yimɓe ɓeen Misira fu, on fuu on ngaran teddinon kam dow waamnde nde.
13 Ndeen Muusaa wi'i Laamɗo:
— Inan si mi yehii to yimɓe Israa'iila, mi wi'ii ɓe: «Laamɗo maamiraaɓe mooɗon nuli kam to mooɗon.» Si ɓe ƴamii kam noy woni innde maa, ɗume njaabotoomi ɓe?
14 Laamɗo wi'i Muusaa:
— Miin Woni Mo Ngonumi.
O wi'i katin:
— Inan ko mbi'ataa Israa'iilankooɓe: Inndirteeɗo Miin-Woni oon nuli kam to mooɗon.
15 Katin Laamɗo wi'i Muusaa:
— Inan ko mbi'ataa Israa'iilankooɓe: Wo Joomiraaɗo* Laamɗo maamiraaɓe mooɗon, Laamɗo Ibrahiima e Isiyaaku e Yaakuuba nuli kam to mooɗon. Ɗum woni innde am faa abada. Wo e mayre yimɓe jamaanuuji fuu mbaawri noddude kam. 16 Joonin yahu hawrunduroy mawɓe Israa'iilankooɓe mbi'aa ɗum'en: Wo Joomiraaɗo maamiraaɓe mooɗon, Laamɗo Ibrahiima e Isiyaaku e Yaakuuba ɓangani kam. O wi'i kam o yi'ii torraaji ɗi torreteɗon ley leydi Misira. 17 Ɗum saabii mbi'umi mi wurtinan on nder mettorgal mooɗon ley leydi Misira, mi yaara on leydi Kanaanankooɓe e Hitiyankooɓe e Amorinkooɓe e Perisinkooɓe e Hewinkooɓe e Yebusinkooɓe, ndiin woni leydi ndi kosam e njuumndi ilata e muuɗum. 18 Israa'iila'en kettindante. Ndeen njaada e mawɓe Israa'iila'en to kaananke Misira, mbi'on ɗum: Laamɗo Joomiraaɗo mo Ibraninkooɓe ɓanganii min. Miɗen ŋaare, hokku min laawol min njaha ley ladde yoornde kaddi balɗe tati faa min ngaɗana Laamɗo Joomiraaɗo amin kirsamaaji.
19 Ammaa miɗo anndi kaananke Misira jaɓataa njahon sanaa ndoolɗaa. 20 Ndelle mi foortan junngo am mi fiira Misira e maandeeji kaayniiɗi ɗi ngaɗammi ley muuɗum ɗiin fuu. Caggal ɗuum o yoppan on ndillon. 21 Mi waɗan yimɓe ɓe keɓa moƴƴere yeeso yimɓe Misira. Nde mburtiɗon fu, on mburtataako juuɗe ɓole. 22 Israa'iilanke debbo fuu yaha to Misiranke debbo gondo muuɗum, e to debbo janano tawaaɗo ley suudu oon, rookoo gineeji gaɗiraaɗi kaŋŋe e cardi e kaddule. Ɓornon ɗum fuu sukaaɓe mooɗon worɓe e rewɓe. Noon teetirton Misirankooɓe.