विस्वासुल्कुना मनमळ
4
1 बल्हा अय्ते किरिस्तु मेंदुल्ते मतस्के तकलिप बोगांचतोर, मिमेटगुडा ओना असोंटा मनसु इर्सि दान मीवा विसरेलेसिं वाळकुंटु. बारित्ते, बोरय्ते तकलिप बोगांचंतोर, ओर पापमतुन होळसिंतोर. 2 आनि ओर वायाना रोजकुने मेंदुल्ता इच्चांना परकारम आयो गानि पेनदा इच्चा परकारम पिस्संतोर. 3 मुन्ने निमे पेनदुन एरपाट कियवोरा इच्चाना परकारम बोगमतनम कियमळ, जोसते मनमळ, कल्लु उनमळ, पार्टिं कियमळ, रिम्मा आयमळ, नियमकु विरोदमते ताकमळ आनि बतक ओज्जुवव बोम्मन मोळ्कमळ इल्हा कियिंदिर इद वेल्लेने आता.4 इंदके मिमेट असोंटा पेद्दा बोगमतनाल्कुने ओरतोनि कलियसेके हिल्लिर इंचि ओर इचंत्रम आसेक मंतुर. अदुनहाटीं ओर मीकुन सिळांचेक मंतुर. 5 गानि हातोरा, पिस्तोरा न्यायम कियालय तयार मत्ता पेनदुक ओरा पिस्वरता लेक्का हियापींता. 6 मनकलोर्कुंक मेंदुललेसिं न्यायम आयाना, गानि आत्मा पेनदालेसिं पिस्साना इंचि बोरय्ते हासि मत्तुर, ओर्कगुडा बेसता कबुर वेहमळ जर्गता.
7 इंदके दुनियाते मननां अन्निटवुना आकिर रोजकु दग्गेरे एवतां. अदुनहाटीं मिमेट पारतना कियानेंके बेस विचारमते, तेल्विते मंटु. 8 अन्निंकन्ना पेद्दा पोल्ले बतल इत्ते, वरोंक-वरोर एक्को पावरम कीम्टु, अल्हा कीते वेल्लेने पापाल्कुन मापि किया परकिर. 9 बतले गुल्गाकोंटा वरोंक-वरोर हेळमितोरालेसिं बेस हूळकुंटु.
10 अंटुर्क वेरे-वेरे वरम दोर्कता, अदुनहाटीं वरोंक-वरोर सेवा कियालय पेनदा तीरतीराता कृपा दोर्कतोर बेसता दिवांजिनलेसिं अदुन वाळकुंटु. 11 बोन्क अय्ते पेनदा पोल्ले वेहाना वरम दोर्कता, ओर पेन वेहतापे वळ्कना. बोरय्ते सेवा कींतोर, ओर पेन हिय्यना बलमतेने कियाना. अन्नि पोल्लेने येसु किरिस्तुनाहेंदाल पेनदुके पेद्दातनम वायाना. पेद्दातनम आनि ताकत बस्केळ्ताहाटीं दानदे आंद. आमेन.
12-13 नावा पावरमतोरिटा! मीवा परिक्सा कियानाहाटीं मीवा पोर्रो तळमितसोंटा तकलिपकु वांतां, अस्के मिमेट “बस्केन जर्गवद जर्गना मंता” इंचि, परेसान आयमटु. गानि मोमोटगुडा किरिस्तुना दुक्कमते पोत्तु आतोम इंचि कुसिते मंटु. किरिस्तु मल्सि वासि ओना पेद्दातनमतुन हूपिस्तस्के मिमेट वेल्ले कूस आकिट. 14 मीकुन बोरन्ना गिंटा किरिस्तुना पोर्रोलता हेंदाल अपमानम कीते, मिमेट आसिर्वादम दोर्कतोरे आंदिर. बारित्ते पेनदा पेद्दातनमता आत्मा मीवा पोर्रो मंता. 15 गानि मीवा लोप्पोटोर बोरे आयिर, हव्कताहेंका, दोंगातनम कीताहेंका, तप्पुड कबळ कीताहेंका, वेरेतोरा कबळते कय वाटताहेंका दुक्कम बोगांचा मन्नि. 16 ओक्कला मीवा लोप्पो बोरन्ना किरिस्चन आताहाटीं तकलिपकु बोगांचनय्ते, ओर सिग्गु अर्रानायो, गानि किरिस्तुना पोर्रोल दोर्कताहाटीं पेनदुक पेद्दातनम हिय्यना. 17 बारित्ते न्यायम कियाना वेला एवता. पेन मनातोने न्यायम सुरु कींता अय्ते, बोरय्ते पेनदा बेसता कबुरतुन केंजुर ओरा गति बतल आयार?
18 ओक्कला सत्तेम मनकंके मुक्ति दोर्कुळ कस्टम आयानय्ते, दुस्टुल्क आनि पापिल्कुनद बतल आयार?
19 अदुनहाटीं बोरय्ते पेनदा इच्चा मत्ताप तकलिप अरसेके मंतुरो, ओर बेसता कबाह्क कीसेके, मनाकुन पुटिस्ता विस्वासमता लायकता पेनदुक ओरा आत्मानु अप्पाजेप्ना.