मुत्तो-मुय्दोना ताकमळ
3
1-2 अल्हेने मुत्तोह्कुनिटा, मिमेट मीवा मुय्दुरा कय्दा हिळु मंटु. ओक्कला ओर पेनदा पोल्लेते ताकाकोंटे, पोल्लेनतोनि आयाकुना मीवा पवित्र आनि सत्तेमते ताकानदुन हूळसि विस्वासमते वायानुर. 3 मीवा केल्कुन तीराता जेडां वाटमळ, बंगारमता नगां केरमळ, एक्को दराता कपळिं पोंडमळ इसोंटा पलाताल दिस्सना सिंगारम कियमट. 4 गानि दानकु बदुल मीवा मनसुना गुनम सादा-सिंपल, नासडेम आयवा सांत आत्माते सिंगारम कीम्टु. इसोंटद पेनदा मुन्ने बच्चोनो विल्वातद आंद. 5 एनकटा कालमते पेनदापोर्रो आसे इरानव पवित्रमाता मुर्ताह्कु अव बेसता गुनमते सिंगारिंचुंदुं आनि मुय्दोना पोल्लेते ताकुंदुं 6 बल्हा अय्ते अब्राहामुना मुत्तो साराल ओन मालक इंचि केयुंदुं, ओर वेहताप ताकुंदुं, अल्हेने मिमेटगुडा बेस ताकसेके बदे पोल्लेक वेरियाकुंटा मत्ते, अदुना मियाह्क आंतिर.7 अल्हेने मुय्दुर्कुनिटा! मीवा मुत्तोह्कुंकगुडा मीवच्चोने पेनदा कृपाता वारसान हक्क मंता. गानि अवुंक मीवालेसिं ताकत हिल्ले. अदुनहाटीं मिमेट मुत्तोह्कुन बेस आनि कदर हीसि पिस्सट. अस्के मीवा पारतनाकु बतले अड्डम वायो.
येसुनाहाटीं तकलिप अर्रना
8 आकिरते, मिमेट उंदि मनसुने, वरोंक-वरोर पावरम कियमळते, तादल-तम्मुनालेसिं जीवा कियमळते, इंकावरोनहाटीं जीवा नोयमळते, सादा-सिंपल मनमळते अंटुर उंदि आसि मंटु. 9 कराबता बदला कराबतोनि एतमट; तेर्हात्तोर इंचि तेर्हमट गानि ओर्क आसिर्वादम हींट. बारित्ते मीक आसिर्वादम दोर्काना इंचि पेन मीकुन केयता.
10 दर्मसास्त्रम वेहाताप,
बोरय्ते पिस्वर गावाले इंतोर,
बेसता रोजकु हूळंतन इंतोर,
ओर ओना नाल्केताल कराब पोल्लें
आनि ओना पेद्वीनाल आबद्दम पोल्ले वळ्कमळ आपा पींता.
11 ओर कराब कबाह्कुन होळसिसि बेसता कबाह्क कियाना,
ओर सांतितुन पह्काना आनि दान पीसि ताकाना.
12 बारित्ते सामिना नदर सत्तेमंतुल्कुना पोर्रो मनंता,
ओरा पारतनातुन केव्वु हीसि केंजंतोर,
गानि दुस्टुल्कुंक सामि विरोद कींतोर.a
13 मिमेट गिंटा बेस कियानाहाटींगे जोसने मत्ते, मीकुन बोर हेळाहनुर? 14 ओक्कला मिमेट गिंटा निति कबाह्क कियानेंके मीक कस्टाल्क वायिना, पेन मीक आसिर्वादम हिय्यार. ओर वेर्रहाते मिमेट वेरियमट, परेसान आयमट. 15 गानि मीवा मनसुने किरिस्तु मावा सामि इंचि ओनकु मान हीम्टु. मीवा येसुना पोर्रोटा आसेता बारेमते बोरन्ना मीकुन पूसकीते, मिमेट सादा-सिंपल आनि मान-मर्यादाते बस्केळ्क वेहालय तयार मंटु. 16 गानि मिमेट किरिस्तुना लोप्पो बेस पिसमळतुन हूळसि बोरय्ते मीवा अपमानम कींतुर, असंटोर्क मीवा ताकमळतुन हूळसि सिग्गु वायानाल मीवा मनसुन बेस इर्सि ताकट. 17 ओक्कला बेस कीताहाटींगे तकलिप बोगांचमळ पेनदा इच्चा मत्ते, कराब कबाह्क कीसि तकलिप बोगांचना दानकन्ना, इदे बेस.
18 बारित्ते अंटोरा पापाल्कुनाहाटीं किरिस्तु उंदे मल्का हातोर. मनाकुन पेनदागा ओयालय वरोर सत्तेमंतुड असत्तेमंतुनाहाटीं हातोर. मेंदुलताल ओन हव्कतुर गानि आत्माते ओन जीवाते तेहमळ जर्गता. 19 ओर हातोरा आत्मानगा होंचि, अव दोहचि वाटताप मत्ता आत्मांकु पेनदा कबुर वेहतोर. 20 एनकटा नोहाना कालमते डोंगा तयार कियानेंके लोकुल्क वायानुर इंचि पेन ओप्के पीसि एदुर हूळसेक मत्ता, गानि लोकुल्क पेनदा पोल्ले केंजा हिल्लुर. सिराप एन्मिदि लोकुल्क पेनदुन नमिसि आ कम्मुळता एताल पिस्तुर. 21 आ एताल पिस्तद आनवल इत्तेने बाप्तिस्मा आंद. बाप्तिस्मा एतमळ इत्ते मेंदुलता मुर्कि होनालय आयो गानि येसु किरिस्तु हासि तेदता हेंदाल मनाकुन पिसागोटसि, बेसता बुद्दिताहाटीं पेनदुन विनंति कियाना करार आंद. 22 इंदके येसु किरिस्तु स्वर्गमते होंचि पेन बाबाना तिना बाजुंक उद्तोर. अगा पेनदा दूतां, अदिकारकु, ताकतकु ओना कय हिळु मंतां.