पेनदा लोकुल्क इत्ते जीवाते मनना बंडानसंटोर
2
1 मिमेट अय्ते पेन बच्चोर दया कियानद इंचि एरपाट कीतिट. अदुनहाटीं अन्नि तीरुकुना तप्पु कबाह्क, अन्नि तीरुकुना बोंकिचमळ, नळेह कियमळ, कळ्क पोतमळ, आनि अन्नि तीरुकुना अपमानम कियमळ इवुन होळसीम्टु. 2-3 इंदके पुटता पसिबाला बल्हा पाल उन्नालय तन्लाळंता अल्हेने मिमेट इंका बेसता पाललेसिं मनना पेनदा पोल्लेताहाटीं तन्लाळट. अल्हा तन्लाळते मिमेटु मुक्तिहाटीं पेनदा पोल्लेनुसार बेरस्सेके दांतिट.4 मिमेट जीवाते मंदना बंडातसोंटा किरिस्तुनगा वट, मनकलोर्क ओन हय्सा हिल्लुर गानि ओर पेनदा लोप्पो पेर्कुत्तोर आनि विल्वातोर आंदुर. 5 मिमेटगुडा जीवाते मंदना बंडानलेसिं पवित्र आत्माता लोन दोहाचेके मंतिट. येसु किरिस्तुनाहेंदाल पवित्र आत्माता बक्तितुन मोक्कु हीताप पेनदुक ओप्पनालायक मनालय, मिमेट पवित्र पेर्मालोरलेसिं निलाहतुर आंदिर. 6 बारित्ते दर्मसास्त्रमते पेन इल्हा इत्ता गदा:
“नना सिय्योनते सेंकुमूला बंडतसंटोन वरोन इरसेक मंतन,
ओन नना पेरतन, ओर वेल्ले विल्वातोर आंदुर
ओना पोर्रो बोरय्ते विस्वासम इर्रंतोर, ओर बस्केने सिग्गुना पाल आयोर.” a
7 अदुनहाटीं मिमेट विस्वासम कीतिर इंचि अद बंडा मीक विल्वातद, गानि बोरय्ते अदुन विस्वासम किय्युर, ओराहाटीं दर्मसास्त्रम इल्हा वेहता गदा:
बद बंडातुन दोहानोर बतक ओज्जो इत्तुर,
अदे बंडा इंदके सेंकु मूलाता मोदोल बंडा आता.b
8 इंका दर्मसास्त्रमते इल्हा मंता गदा:
“अद बंडा लोकुल्कुंक दलगांता,
इंका पर्पु बंडा ओर्कुन हिडारसंता.”c
बारित्ते, ओर पेनदा पोल्लेने ताकवाहेंके, बंडा दल्गसि हिडारंतुर. ओर हिडारनाहाटींगे इल्हा निल्हमळ जर्गता.
9 गानि मिमेट अय्ते पेन पेरकुत्ता वंसमतोर, राजुल्कुनसोंटा पेरमालोर्क, पवित्र राज्येमतोर, पेनदा लोकुल्क आंदिर. अदुनहाटीं मिमेट दाना अद्बूतामाता कबाह्कुन वेहाना इंचि मीकुन हीकळताल अद्बूतामाता वेल्गुने तत्ता.
10 “मुन्ने मिमेट पेनदा लोकुल्कगुडा मना हिल्लिर,
गानि इंदके मिमेट पेनदा लोकुल्क आतिर.
मुन्ने मी पोर्रो पेनदा दया मनाहिल्ले,
गानि इंदके मीवा पोर्रो पेनदा दया मंता.”
11 नावा पावरमतोरिटा, मिमेट वेरे देसेमतोर आनि वेरे नाटेनोर आसि मंतिर. अदुनहाटीं मी आत्माकु अड्डम मनानव दुनियातां अन्नि सेड्डा आसेनाल लक्कु मंटु इंचि विनंति कीसेक मंतन. 12 मिमेट विस्वासम हिल्वोरा नड्डुम मंतिट इंचि बेस ताकट. ओर मीकुन कराब लोकुल्क इंचि बदनाम किय्यिना गानि मीवा बेस कबाह्कुन हूळसि, पेन वायाना रोजुने ओर इंका पेनदा कदर कियानुर.
अदिकारम मत्तोर्कुना पोल्लें केंजना
13-14 मिमेट सामिनाहाटीं दुनियाते मनना अदिकारिल्कुना कय्दा हिळु मंटु. राजाल पेद्दोड इंचि ओना कय्दा हिळु मंटु. अदिकारिल्कुना पोल्ले केंजाटु, बारित्ते बेसता कबळ कीयनोर्कुंक मेच्चुकुनालय आनि कराब कीयनोर्कुंक सिक्सा हियालय ओर्कुन लोहमळ जर्गता.
15 बारित्ते, मीवां बेसता कबाह्कुन हूळसि, तेल्वि तक्को लोकुल्कुना तोड्डि बंद कियाना इंचि पेनदा इच्चा मंता. 16 मिमेट बोना कय्दा हिडु हिल्वाप मना परांतिट गानि “बोना कय्दा हिडु हिल्लोम” इंचि मीवा मनसुंक वाताप कराब कबाह्कुने ताकमट, पेनदा सेवकुल्कुनालेसिं ताकट. 17 अंटोरा कदर कियाना, मना दंटता विस्वासुल्कुन पावरम कियाना. पेनदुक वेरियसि ताकना, राजाना कदर इर्राना.
18 जीतागाह्कुनिटा, मिमेट मीवा मालकुंक पूरा कदर हीसेके ओरा कय्दा हिळु मंटु. सिराप बेसता गुनम आनि सादा सिंपल मत्तोरके आयो गानि कळ्क मनना मालकुनगा गुडा ओर वेहताप ताकट. 19 बारित्ते बोरे आयिर पेनदा लोप्पो ताकानेंके तप्पु हिलवा ओर देब्बां तिनना, तिप्पल्क अर्रिना गानि ओप्के पीसि मनानय्ते अद मेच्चुकुनना पोल्ले आंद. 20 निमे तप्पु कीसि देब्बां तित्तिन आनि ओप्के पीसि मत्तिन, अय्ते अव्टे नीकु बाता पायदा वाता? गानि निमे गिंटा बेसता कबाह्क कीसि देब्बां तिंचि ओप्के पीसि मनानय्ते, पेनदुक नच्चानोन आंदिन.
21 इदुनहाटिंगे मीकुन पेन केयता आनि किरिस्तु मीवाहाटीं तकलिप अरतोर, मिमेट इंका ओना अळगुने अळगु वाटसि ओना पजो तकलीप अर्सि ताकना इंचि उंदि उदाहरनलेसिं पेन मीकुन निल्हता.
22 “ओर बतले पापम किया हिल्लोर,
ओना तोड़दाल बस्केने बोंकिच्चना पोल्ले पेय्सा हिल्ले.”d
23 ओन तेरहिना गानि दानकु बदुल ओर बोने तेरहा हिल्लोर. ओन बच्चोनो तकलिप कीतुर गानि दानकु बदुल ओर बोर्कुने बेदरिचा हिल्लोर, दानकु बदुल सत्तेमते न्यायम कियाना पेनदुक ओनद-ओर अप्पाजेपतोर. 24 मनम पापाल्कुनाहाटीं हासि होंचि सत्तेमताहाटीं पिसागोम इंचि येसु ओना मेंदुल्तुन क्रुस पोर्रो हीतोर. ओर तित्ता देब्बाना हेंदाल मना बीमार्क बेस आतां. 25 मुन्ने मिमेटु हर्रि तप्ता गोर्रेनलेसिं आसि तिरियसेक मत्तिर. गानि इंदके मीवा जीवातुन कापाळसि कोहानोनगा मल्सि वातिर.