पत्रुना मोदाटा सिट्टि
पत्रु विस्वासुल्कुंक जोहर कींतोर
1
1 नना पत्रुन, येसु किरिस्तुना प्रेरितुन आंदुन. रोम देसेमता पुंतुस, गालातिया, कपदोकिया, आसिया आनि बितुनिया राज्येल्कुने पैलांचि होंचि, पराया देसेमतोर आसि मत्ता लोकुल्कुंक नना इद सिट्टि रासेके मंतन. 2 पेन बाबाल मीकुन मुन्नेन पेरसि निलाहतोर. अदुनहाटिंगे, मिमेट येसु किरिस्तु वेहताप ताकागोम आनि ओना पोंगुता नेत्तुरते मीवा पापाल्क पायसि होनागोम इंचि पवित्र आत्माता हेंदाल मीकुन पवित्र कीतोर. पेनदा कृपा आनि सांति मीक इरगा दोर्किकांटि.बस्केळ्क पिस्साना आसे
3 मना सामि येसु किरिस्तुना पेनबाबांक दन्यवाद आयि! ओना वेल्ले दयाता हेंदाल मनाकुन पूना रीतुने पुटिचमळ जर्गता. अद बल्हा इत्ते, पेन बाबाल येसु सामिन हातोरा लोप्पोटाल मर्रा तेहाचि, मनाकु उंदि पिस्वरता आसे हीतोर. 4 इंका अद बस्केने नासडेम आयवद, तप्पु हिलवद आनि कर्गुवद असोंटा वारसान हक्क स्वर्गमते मीवाहाटीं इर्सि मंता. 5 आकिरि रोजकुने पेन अंटोर्कुंक हूपिच्चालय तयार कीसि इरता मुक्ति, मीकु दोर्कनाहाटीं मीवा विस्वासम परकारम पेन मीकुन दाना बलमते कापाळसि स्वर्गमते इरसंता. 6 अदुनहाटीं मिमेट इरगा कूस आम्टु. इंदके मीक गडसेमताहाटीं बच्चुंगो तीरुकुना परिक्सा सहन किया पींता. 7 नासडेम आयाना बंगारमतुन तळमिते करगागोटसि परिक्सा कींतुर. गानि आ बंगारमकन्ना बच्चोरो विल्वाता मीवा विस्वासमतुनगुडा परिक्सा एतमळ जर्गंता. येसु किरिस्तु मर्रा वातस्के, मीकुन मेच्चुकुंचि पेद्दातनम आनि कदर दोर्काना कारनम आयागोम. 8 मिमेट येसुन हूळाकुन्ना गानि पावरम कींतिट; इंदके ओर दिसाकुन्ना ओन विस्वासम कीसि, पोल्लेने वेहा पर्रोम अचोने वेल्ले आनि पेद्दातनमते निंडिस मत्ता कुसिते मंतिर. 9 इल्हा मीवा विस्वासमता पलम इंचि मिमेट मीवा आत्मांकु मुक्ति दोर्किचेके मंतिट.
10 मीक दोर्कना मत्ता कृपाता बारेमते बोर पेनदा कबुरतोर अय्ते बविस्यवानि कीसि मत्तोरो, ओर इदे मुक्तिते बारेमते पूसकीसेके आनि पह्कसेके मत्तुर. 11 किरिस्तु बल्हा तकलिप वासि हायनुर, दाना पजा बल्हा ओनकु स्वर्गमते कदर दोर्कार इंचि ओरा लोप्पो मनना किरिस्तुना आत्मा मुन्नेन वेहाचि मत्ता. गानि इव पोल्लें बोना बारेमते आनि बस्के आयनुं इंचि पेनदा कबुरतोर पह्कुंदुर. 12 इव पोल्लें ओरा पायदाताहाटीं आयों गानि मीवाहाटीं इंचि पेने ओर्क तेळियागोट्सि वेहचि हूपिस्ता. इदवेरादाका बदाय्ते बेसता कबुर वेहतुर, अद स्वर्गमताल लोहचीता पवित्र आत्माहेंदाले मीक वेहतुर. इव पोल्लेना बारेमते पेनदा दूतांगुडा बल्हा आंतानो इंचि हूळाना मनसु मंतां.
पवित्र आम्टु
13 अदुनहाटीं मिमेट बेसता बुद्दिते मंचि, हुसारते मंटु. येसु किरिस्तु मर्रा मल्सि वातस्के मीक दोर्कना कृपाताहाटीं पूरा आसेते मंटु. 14 येसु किरिस्तुना बारेमते मीक तेडियवस्के मीवा लोप्पो मत्ता कराब अल्वाटकुना जोलिक होनाकोंटा, पोल्ले वेहते केंजाना पिलाल्कुनालेसिं मंटु. 15 गानि बद पेनय्ते मीकुन केयता, अद पवित्र मंता. अल्हेने मिमेटगुडा मीवा ताकमळते अन्नि तीरुकुने पवित्र मंटु. 16 बारित्ते दर्मसास्त्रमते, “नना पवित्र मंतन इंचि मिमेटगुडा पवित्र आम्टु,” इल्हा पेन इंता.
17 हरेक मनकन सिन्ना-पेद्दा इन्नाकुंटा ओरा कबाह्कुन हूळसि न्यायम कियाना पेनदुन मिमेट गिंटा “बाबा” इंचि पारतना कीते, दुनियाते मतच्चोरजेम परायतोरम इंचि वेर्रेते ताकाटु. 18-19 मीवा तादो-बाबोलोरगाटाल ताकसि वाता एर्तम पिस्वरतुन, नासडेम आयाना एंडि-बंगारम इळबळिचा हिल्ले, गानि तप्पु हिल्वद, मर्का हिल्वद गोर्रे पोरिनसोंटा किरिस्तुना विल्वाता नेत्तुरता हेंदाल मिमेट इळबळतिर, इदु मीकु एरपाटे मंता. 20 बूमि पुट्टका मुन्नेन किरिस्तुन पेन पेरता, गानि मीवाहाटीं इव आकिर रोजकुने ई दुनियाते वातोर.
21 ओनहेंदाल मिमेट पेनदापोर्रो बरोसा कीतिर. पेन ओन हातोरा लोप्पोटाल मर्रा जीवाते तेहाचि, ओन्कु पेद्दातनम हीता. अदुनहाटीं मीवा आसे आनि विस्वासम पेनदापोर्रो मंता. 22 मिमेट सत्तेमता हर्रि ताकसि मीवा आत्मातुन पवित्र कीकुत्तिर. अदुनहाटीं मिमेट वरोंक-वरोर पावरम कीसेक मंतिट. अल्हेने इंदके मीवालेसिं विस्वासुल्क आतोर्कुन मिमेट पूरा मनसुनाल पावरम कीम्टु.
23 इंदके मिमेट पूना पिस्वरते पुटतिर, नासडेम आयाना पेडेतेंदाल आयो, गानि नासडेम आयवद, जीवाते मनानद, बस्केळ्क मनानद पेनदा पोल्लेतेंदाल पूना पिस्वरते पुटतिर. 24-25 दर्मसास्त्रम इल्हा वेहांता गदा,
“अंटोर मनकलोर जाडितालेसिं मंतुर,
ओरा अन्नि पेद्दातनाल्कु पुंगाह्कुनालेसिं मंतां.
जाडि वतंता,
पुंगाह्कु रालंतां.
गानि सामिना पोल्ले मात्रम युगायुगाल्क मनंता.” a
इदुने मीक बेसता कबुर इंचि वेहमळ जर्गता!