पेनदा मंदा
5
1 मीवा लोप्पो बोरय्ते पेद्दाल्क मंतुर, ओरालेसिंगे ननागुडा पेद्दा मनकन, किरिस्तु बोगांचता तकलिपकुना गवाइतोन, ओर मल्सि वायानस्के ओना पेद्दातनमते कलियानोन आंदुन इंचि, नना आ पेद्दाल्कुंक वेहासेक मंतन. 2 मीवा जिम्मेदारिते मत्ता पेनदा मंदातुन पोस कीम्टु. इद कबळ बलमिते आयो गानि पेनदा इच्चा परकारम कुसिते कीम्टु, दोंगा कमाइताहाटीं आयो गानि मनसुनाल कीम्टु. 3 बोरय्ते मीवा जिम्मेदारिते मत्ता मंदातुन अदिकारम हूप्साकोंटा, ओरा मुन्ने उंदि उदाहरनलेसिं मंटु. 4 इल्हा मत्तिर इत्ते अंटुर्कन्ना पेद्दा कोहानोर किरिस्तु वायानेंके, मीकु बस्केने पेद्दातनम तक्को आयवद किरिटम दोर्कार.5 अल्हेने ए लेय्युर्कुनिटा! मिमेटगुडा पेद्दाल्क वेहताप ताकट, आनि वरोंक-वरोर सेवाताहाटीं सादा-सिंपल मंचि ताकट. बारित्ते,
“पेन गर्रा कियानोर्कुंक अड्डम तिरियंता,
गानि सादा-सिंपल मंचि ताकानोर्कुंक दया हींता.”a
6 पेन मीकुन इनकुत्ता वेला वातारिते पेद्दा कियाना इंचि मिमेट दाना बलमगला कय्दा हिळु सादा-सिंपल आसि मंटु. 7 पेन मीवा रंदि कींता, अदुनहाटीं मीवा रंदिं पूरा दानपोर्रो होळ्सीम्टु.
8 उसारते मंटु, जागर्तते मंटु! बारित्ते मीवा पगातद पेद्दा देय्यम बोन तिनकन इंचि सिंहमतालेसिं वरगेयसेके नालुं मूलां तिरियसेक मंता. 9 अदुनहाटीं मिमेट विस्वासमते गट्टिगा मंचि, दान्क विरोदम कीम्टु. बारित्ते दुनियाते मनानोर विस्वासुल्कगुडा इल्हेने तकलिप बोगांचेके मंतुर इद मीक एरपाटे मंता.
10 अन्नि तीरुकुना दया कियाना पेन मीकुन किरिस्तुना लोप्पो दाना बस्केने मारवसोंटा पेद्दातनमहाटीं केयता. मिमेट कोन्नि रोजकु तकलिपकु बोगांचतंका अदे पेन मीकुन दानलायक कींता, मीकु बलम हींता, निल्हांता. 11 दानादे ताकत युगा-युगाल्कुना दाका मन्निकांटि! आमेन!
आकिरता जोहर
12 विस्वासमगल्ला तम्मुर इंचि नना नम्मुता सिल्वानुसना कय्दे इद सिन्ना सिट्टि रासतन. इदे पेनदा निजम कृपा आंदु, इव्टे मिमेट गट्टिगा निल्सि मंटु, इंचि नना मीकु इद सिट्टिते रासि तेळियागोट्सि वेहासेक मंतन.