मूसाल विस्वासमगल्ला दासुड, येसु विस्वासमगल्ला मर्रि
3
1 अदुनहाटीं, पवित्र विस्वासुल्कुनिटा! मुक्तिता पालिगाह्क आयालय पेन मीकुन केयता. येसुन पेन पेद्दा पेर्मल आनि प्रेरित आयालय लोहचीता इंचि मनम ओप्कुत्तोम, अय्ते ओना बारेमते मिमेट विचारम कीम्टु. 2 पेन दाना लोता लोप्पो मूसांक वेहता अन्नि कबाह्कुन ओर बरोसाते कीतोर, अल्हेने येसुंक पेन हीता अन्नि कबाह्कुन ओर बरोसाते कीतोर. 3-4 हरेक लोतुन दोहानोर बोरन्ना वरोर मनकल मनंतोर, गानि अन्निन कीतोर मात्रम पेने आंदु. बल्हा अय्ते लोतुकन्ना लोन दोहा वेहता मालकुंक एक्को कदर मनंता, अल्हेन येसुगुडा मूसांकन्ना एक्को कदरगल्लोड इंचि पोर्रोल तरकुत्तोर. 5 वायाना कालमते पेन बतल-बतल अय्ते कियाना मंतानो, अवुना गवाइ लोकुल्कुंक वेहनाहाटीं मूसाल, पेनदा पूरा लोतोरगा वरोर बरोसालायक सेवक आसि मत्तोर. 6 गानि पेनदा बरोसागल्ला मर्रि, किरिस्तु, पेनदा पूरा लोतोरा अदिकारि आसि मत्तोर. मनमगिंटा मना विस्वासम आनि आसेता बारेमते इरगा गट्टिगा मत्ते, मनमगुडा पेनदा लोतोरम आसि मनंतोम.पेनदा लोकुल्कुना आरामता बारेमते
7-8 अस्के पवित्र आत्मा दर्मसास्त्रमते इल्हा इंता:
“मिमेट इय्याला पेनदा पोल्लें केंजानय्ते,
पेन वेहतद मोमोट केंजोम इंचेके,
इस्राएल लोकुल्क बय्लि जेगातगा पेनदा पट्टु हूळालय बल्हा मुजोरिं कीतुरो,
अल्हा मिमेट मीवा मनसुकुने मुजोरिं कियमट.
9 अगा नल्पै वर्सनदाका नना कीता कबाह्कुन हूळसिगुडा,
मीवा पेद्दाल्क परमेर्का कीसि नावा पट्टु हूळतुर.
10 अदुनहाटीं नना आ पीळिता लोकुल्कुनपोर्रो होंग पीसि,
‘ईरा मनसु बस्केळ्क नहागटाल तप्सोंचि लक्कु मनंता,
ईर बस्केन नावा हरदुन एरपाट किया हिल्लुर,’
इंचि ओर्कुन इत्तन.
11 अदुनहाटीं नना होंगुने, ‘ओर्कुन आराम दोर्कना जेगाते बस्केन होळिया हिय्योन,’
इंचि ओट्टु तिंचि वेहतन.”a
इंचि इत्ता.
12 नावा दादालोर-अक्काह्कुनिटा, जेगर्ता! जीवाते मंदना पेन पोर्रोटा विस्वासमताल लक्कु कियागोट्टनसोंटा कराब, बरोसा हिलुवा मनसु, मीवा लोप्पो बोरागेन मनानायो. 13 गानि पापम मी लोप्पो वासि मीवा मनसु मुजोरि कियाकोंटा मननाहाटीं, “इय्याला” इनना वेला मनानेंकेने दररोज वरोंक-वरोर दैरनेम हीसेके मंटु. 14 बारित्ते, सुरुवने मनम इर्ता बरोसातुन मना पिस्वरता आकिरदाका गट्टिगा पीसि मत्तेन, मनम किरिस्तुना पालिगाह्क आंतोम. 15 दीनकन्ना मुन्ने दर्मसास्त्रमते वेहताप:
“मिमेट इय्याला पेनदा अल्किर केंजानय्ते,
पेन वेहतद मोमोट केंजोम इंचेके,
इस्राएल लोकुल्क बय्लि जेगातगा पेनदा पट्टु हूळालय बल्हा मुजोरिं कीतुरो,
अल्हा मिमेट मीवा मनसुकुने मुजोरिं कियमट.”b
16 पेनदा पोल्ले केंजसिगुडा दाना विरोदमते ताकतोर बोर आंदुर? मूसानतोनि कलियसि इजिप्त देसेमताल पलाते अर्ता आ अंटोर लोकुल्के गदा! 17 नल्पै वर्सनदाका पेन बोरा पोर्रो होंग पीसि मत्ता? पापम कीसि बय्लि जेगाते बोरा पीनगुल्क अय्ते अर्सि मत्तांगो, ओरा पोर्रेन आयोना? 18 “ओर्कुन आराम दोर्कना जेगाते बस्केन होळिया हिय्योन,” इंचि पेन बोरा बारेमते ओट्टु तित्ता? दाना पोल्ले परकारम बोरय्ते ताका हिल्लुरो, ओरा बारेमतेन गदा? 19 इल्हा ओर्कु विस्वासम हिलुवाहेंकेन, ओर आराम दोर्कना जेगाते होळिया पर्राहिल्लुर, इंचि मनाकु तेळियंता.