आराम दोर्कना जेगाते होळियमळ
4
1 आराम दोर्कना जेगाते होळियाना बारेमता पेन हीता पोल्ले, इदवेरदाकागुडा ताकसेके मंता. अद मना लोप्पोटाल बोनागटालन्ना तप्सोनामन्नि इंचि, मनम पेनदा वेर्रेते मंदकोम. 2 बारित्ते, ई आराम दोर्कना जेगा बारेमता बेसता कबुर इस्राएल लोकुल्कुंक एवताप मनकगुडा वेहमळ जर्गता. गानि ओर आ कबुरपोर्रो बरोसा इर्रा हिल्लुर, अदुनहाटीं ओर्कु दानद बतले पायदा आया हिल्ले. 3-4 आ आराम दोर्कना जेगाते, बरोसा कीतोरम मनम, तप्पाकोंटा होळियंतोम. बारित्ते एडोव रोजुना बारेमते,“आनि पेन अद कीता अन्नि कबाहकुनाल एडोव रोजुननाड आराम कीता,”
इंचि रासि मंता. अयना आ जेगातुन तयार कियाना कबळ, पेन दुनियातुन पुटिस्तस्केन पुरागा कीसि इर्ता. बारित्ते, बरोसा इर्रुवोरा बारेमते पेन होंगुने,
“ओर्कुन आराम दोर्कना जेगाते बस्केन होळिया हिय्योन,
“ओर्कुन आराम दोर्कना जेगाते बस्केन होळिया हिय्योन,”
इंचि इंकुंदि मल्का इत्ता. 6 दीनकन्ना मुन्ने मना पेद्दाल्क बेसता कबुर परकारम ताकुवाहेंका ओर आराम दोर्कना जेगाते होळिया पर्राहिल्लुर. अयना अद आराम दोर्कना जेगाते इच्चुर लोकुल्क इंदकेगुडा होळियाना मंता. 7 अदुनहाटीं, पेन उंदि रोजु इंकुंदि रोज तयार कीसि इरता, अदुन “इय्याला” इंचि इंतुर. पेद्दाल्क हर्रि तप्ता वेल्लेन वर्सांक, बल्हा अय्ते मुन्ने वेहताप,
“मिमेट इय्याला पेनदा पोल्ले केंजतस्के,
इय्याला पेन वेहतद मोमोट केंजोम इंचेके,
इस्राएल लोकुल्क बय्लि जेगातगा पेनदा पट्टु हूळालय बल्हा मुजोरिं कीतुरो,
अल्हा मिमेट मीवा मनसुकुने मुजोरिं कियमट,”b इंचि दाविदना भजन संहिता पुस्तकमते पेन वेहता.
8 आनि यहोसु मना पेद्दाल्कुन आराम कियाना जेगाते गिंटा ओसि मत्ते इंकुंदि रोजुना बारेमते पेन मर्रा वळकाकोनवळ. 9 अदुनहाटीं पेनदा लोकुल्क आराम कियाना रोजु इंका वायानदे मंताc. 10 बल्हा अय्ते पेन दाना कबाह्कुन महाचि एडोव रोजु आराम कीता, अल्हेन दाना आराम कियाना जेगाते होळियानोरगुडा ओरा कबाह्कुन महाचि आराम कियानुर.d 11 इस्राएल लोकुल्क पेनदा पोल्ले परकारम ताकुवाहेंका ओर नासडेम आतुर, गानि मनम ओरालेसीं आयाकोंटा, पेनदा पोल्ले परकारम ताकसेके अद जेगाते होळियाना इरगा कोसिस कियागोम.e 12 बारित्ते पेन वेहता ई पोल्ले, जीवा मत्तद आनि बलमगल्लद आंद, अद रोंडु बाजकुनाल करा-करा मनना कसेरकन्ना एक्को करा-करा मंता. अद बल्हा बोक्कानाल पूलगुन वेरे-वेरे कींता, अल्हेन आत्माताल जीवातुन वेरे कींता. इंका अद मनसुना विचाराल्कुन, अवुना उद्देसाल्कुना बारेमते बरोबर वेहा पर्रंता. 13 इद दुनियाते मनानव बतांगें पेनदा नदरताल मक्कीसि हिल्लें. मनम मना बारेमते लेक्का अप्पाजेप्ना पेनदा मुन्ने अन्निगुडा कुल्ला-कुल्ला मंतां.
येसु अंटोर्कन्ना पेद्दा पेर्मल
14 अंटोर्कन्ना पेद्दा पेर्मल, स्वर्गमते होत्ता पेनदा मर्रि येसु, मनातोनि मंतोर. अदुनहाटीं अंटोरा मुन्ने ओप्कुत्ता मना विस्वासमतुन मनम गट्टिगा पीसि मंदकोम. 15 मना पेद्दा पेर्मल येसु मना कमजोरिन, दुक्काल्कुन तेल्पिच्कुंतोर. बारित्ते मनालेसीं ओन्कुगुडा पापम कियाना अन्नि तीरकुना परिक्सां वातां. गानि ओर बस्केन पापमते अर्रा हिल्लोर. 16 अय्ते वट! गट्टिगा दैरनेम कीसि मनम पेनदा दयाता राजगद्दे दग्गेर्क दाकोम. दीनहेंदाल मनाकु अवसरम मत्तस्के, मना सहायमहाटीं ओना दया आनि कृपा दोर्कार.