अन्निट्कन्ना मंचि मुक्ति
2
1 अदुनहाटीं मनम केंजता सत्तेम पोल्लेनाल लक्कु आयामन्नि इंचि अवुनहेके मनम बेस लक्से हियगोम. 2 बारित्ते, पेनदा दूतानाहेंदाल वेहता पोल्ले सत्तेम इंचि रुजुव आताa, अस्के आ पोल्ले परकारम कबळ कियाका तप्पु कीतोर्कु आनि ताकुवोर्कु दग्गुता सिक्सा दोर्कता. 3 अय्ते इच्चोर पेद्दा मुक्तिता कबुरतेके लक्से इर्राकोंटे, वायाना सिक्साताल मनम बल्हा तप्पिच्कुना पर्रांतोम? इदुना बारेमते मोट्टा मोदाला सामे वेहतोर. अद कबुरतुन सामिनगटाल बोरय्ते केंजतुरो, ओर अद कबुरतुन मनाकु तेळियागोट्सि रुजुव कीतुर. 4 अचोने आयका पेनगुडा तीराता चिन्हां, रका-रकाल्कुना अद्बूतामाता कबाह्क, इचंत्रमायना कबाह्क आनि पवित्र आत्माता वराल्क दाना इच्चा परकारम दाना बक्तुल्कुंक हीसि, ई मुक्तिता बारेमते गवाइ हीसेके मत्ता. अय्ते इच्चोर पेद्दा मुक्तिताल मनम लक्कु आयानायो.मनकलोर्कुन पिसागोटालय येसु मनकना रूपमते मारियमळ
5 मुन्ने वायाना बद दुनियाता बारेमते मोमोट वेहचंतोम, आ दुनियातुन पेन दाना दूताना कय हिळु इर्रा हिल्ले. 6 इदुना बारेमते दर्मसास्त्रमते उंदगा बोरो वरोर गवाइ वेहासेक इल्हा इत्तोर:
“मनकल इत्ते असल बोर आंदुर, ओना बारेमते निमे इच्चोन विचारम कीसंतिन?
हिलाकोंटे निमे इच्चोर पिकिर कियनाहाटीं असल मनकना रूपमते पुटतोर बोर आंदुर?
7 निमे ओन पेनदा दूतांकन्ना गिचचो सिन्नगा कीतिन,
गानि निमे ओन्कु पेद्दातनम आनि कदर हीसि,
नीवा कय्दा कबाह्कुनपोर्रो ओन्कु अदिकारम हीतिन,
8 अन्निट्तुन ओना काल्कुनगा इरतिन.”b इंचि इत्तोर.
पेन अन्निटवुनपोर्रो ओन्कु अदिकारम हीता, ओना अदिकारमते हिलाकोंटा बतातुने होळसा हिल्ले. गानि इंदके अन्नि ओना अदिकारमते मत्ताप दिस्सेक हिल्ले. 9 अयना जेरासेपताहाटीं पेनदा दूतांकन्ना सिन्नागासि मत्ता येसुन मनम हूळसंतोम. पेनदा दयाहेंदाल अंटोर मनकलोराहाटीं ओर ओना जीवातुन हीसि हामुरता रुसि हूळतोर. हामुरतुन सहन कीताहाटीं पेन ओन्कु पेद्दातनम आनि कदरता किरिटम केराहता.
10 पेन अन्निटवुन सतताहाटीं कीता आनि सतागे अन्निटवुन ताकिच्चंता. आ पेन दाना महिमाता राज्येमते वेल्लेन मंदितुन सतता मर्क-मियाह्क कीसि तर्रानाहाटीं, दाना सतता मर्रि येसुन पेरता. मनाकु मुक्ति दोर्कगोम इंचि येसुन अद वेल्लेन तिप्पल्कुनतोनि ओन पुरागा कीता.
अंटोर्कुन तम्मुर-हेलड इनालय येसु सिग्गु अर्रोर
11 मनाकुन पवित्र कियानोर येसु आनि पवित्र आतोरम मनम, वरोर बाबाना पिलाल्कुमे आंदुम. अदुनहाटीं मनाकुन तम्मुह्क-हेलाह्क इंचि वेहालय येसु सिग्गु अर्रोर.
12 अदुनहाटीं, “नावा तम्मुह्कुंक-हेलाह्कुंक नीवा पोर्रोल वेहकन,
चर्चतोरा मुन्ने नना नीकुन तल्सकुनकन,”c
इंचि ओर पेनदुन इत्ता पोल्ले दर्मसास्त्रमते रासतद मंता.
13 मर्रा, “नना पेनदापोर्रो बरोसा इर्रांतन”d. अचोने आयका,
“इगे नना, नाकु पेन हीता पिलाल्कुनतोनि मंतन,”e इंचि दर्मसास्त्रमते रासतद मंता.
14-15 पेनदा पिलाल्क आता मनम, मेंदुल रूपमते मत्ताहाटीं येसुगुडा हरेक पोल्लेते मनालेहका आसि वातोर. मना पिस्वरंता हामुरता वेर्रे मनागा मत्ताहेंका देय्यमता अदिकारम मनापोर्रो मत्ता. गानि येसु ओना हामुरताहेंदाल, देय्यमता अदिकारमतुन नासडेम कीतोर. कीसि मनाकुन हामुरता वेर्रेताल इळबळिस्तोर. 16 येसु पेनदा दूतांक सहायम कियालय असले वाया हिल्लोर गानि अब्राहामुना वंसंमतोर्के सहायम कियालय वातोर.g f 17 इदुनाहाटींगें येसुंक अन्नि तीरकुने ओना तम्मुह्क-हेलाह्कुनलेसीं रूपम येतमळ अवसरम मत्ता. इल्हा रूपम येतते ओर पेनदा मुन्ने सेवा कियाना वरोर दयागल्लोड आनि बरोसालायक पेद्दा पेर्मल आंतोर. अस्केन ओर लोकुल्कुना पापाल्कुनाहाटीं मोक्कु हिय्या पर्रंतोर. 18 ओर कुद्दु परिक्साते अर्सि तिप्पल्क बोगांचि मंतोर, अदुनहाटीं इंदके बोरय्ते परिक्साते अर्सि तिप्पल्क बोगांचंतुरो, ओर्कु ओर सहायम किया पर्रंतोर.