तीतुंक पौलुसना सिट्टि
पौलुस तीतुंक नमस्कारम वेहांतोर
1
1 नना पौलुस, पेनदा दासुन आनि येसु किरिस्तुना प्रेरित aआंदुन. पेन पेरता लोकुल्कुना विस्वासमतुन बेर्सागोटलय, ओर्क सत्तेमता बारेमते तेळियागोट्सि वेहालय नाकुन लोहमळ जर्गता. 2 ई सत्तेम, बस्केळ्क पिस्सना पिसवरता आसे पोर्रो निल्सि मंता. बस्केन आबद्दम वळ्कुवा पेन इदुन हींतन इंचि वेल्लेन मुन्ने पोल्ले हीसि मत्ता. 3 आनि बरोबर गावाले मत्ता वेलातेन पेन दाना पोल्लेन मनाकु वेहाचि हुपिस्ता. इदे बेसता कबुरतुन वेहनाहाटीं मनाकुन कापाळना पेन नाकु आदेस हीसि अप्पाजेप्ता. 4 विस्वासमते नावा समानम मनना नावा मर्रि तीतुंक इद सिट्टि नना रासेक मंतन. पेनबाबनहेंदाल आनि मनाकुन पिसागोटनोर किरिस्तु येसुनहेंदाल नीकु दया, सांति दोर्किकांटि.केरेतु दीबेते तीतु कियना कबाह्क
5 केरेतु दीबेते, बव कबाह्क अय्ते मय्सि मंतां, अव कबाह्कुन सुदरांचनाहाटीं आनि नना नीकु वेहता परकारम निमे हरेक सहरते पेद्दाल्कुन निल्हाना इंचि नीकुन नना अगा होळसि वातन. 6 निल्हाना पेद्दा मनकनपोर्रो बदे दोसेम मननायो, ओन्कु उंदे मुत्तो मनगोम. ओना मर्क-मियाह्क विस्वासुल्क आसि ओरापोर्रो मर्लाबळतव, ओर बोना पोल्ले केंजाकोंटा मनानोर आयामन्नि. 7 बारित्ते आ अदिकारि पेनदा कबाटुन मुन्ने ताकसानोर आंदुर. अदुनहाटीं ओनपोर्रो बदे दोसेम मननायो, ओर जिद्दि मनकल मनामन्नि, ओर बिराना होंगुंक वायानोर आयामन्नि, ओर कल्लु उनामन्नि, जगडाल्क किया मन्नि, तप्पुड कमाइ कियानोर आयामन्नि. 8 गानि आ अदिकारि हेडमितोन बेस हूळकुनानोर आयगोम, बेस कियमळतुन पावरम कियानोर आयगोम, मनसुना आसेन आपिस पीसि मनानोर आयगोम, ओर सादा-सिंपल मनागोम, पवित्र आनि सततुन आपकुंचि मनानोर आयगोम. 9 इंका ओन्कु कराहता सत्तेम पोल्लेतुन ओर विस्वासमते गट्टिगा पीसि मनगोम. अल्हा मत्तेने ओर लोकुल्कुंक सत्तेम पोल्लें वेहचि ओर्क कराह पर्रांतोर आनि एदुर वळकानोरा तोड्डीं मुच्चा पर्रांतोर.
10 बारित्ते विसेस कीसि कतना कीतोरव्टेटाल इच्चुर विस्वासुल्क मर्लाबळानोर, बतक ओज्जाकोन्ना वट्टिदे वळकानोर, दोका कियानोर वेल्लेन मंतुर. 11 ईरकुन वळ्काकोंटा कियमळे गावाले. बारित्ते ईर लोकुल्क, बव पोल्लें अय्ते कराहना आयनो, अव पोल्लें कराहचि तप्पुड कमाइ कियनाहाटीं अन्नि कुटुंबाल्कुनंता पाळ कींतुर. 12 केरेतु दीबेतोर वरोर ओरा कबुरतोरे, “केरेतु दीबेता लोकुल्क बस्केळ्क आबद्दम वळ्कंतुर, केडा जिवरासिनसंटोर, लंडु आनि तिंडितोरे,” इंचि वेहतोर. 13 ओर वेहता गवाइ निजमे आंद. अदुनहाटीं आबद्दम बोदातुन नम्मना विस्वासुल्कुंक गट्टिगा वेर्रे वेहा. अस्केन ओर सत्तेम विस्वासमते गट्टिपळांतुर. 14 आनि यहुदिल्कुना तयार कीता कतन पोर्रो विस्वासम इर्राकोंटा, सत्तेमताल तप्सोत्ता मनकलोरा बोदानाल लक्कु मनांतुर.
15 मनसु पवित्र मत्तोर्कुंक अन्नि वस्तुल्कु पवित्रे मनंतां, गानि हेळसोत्ता मनसु आनि पेनदापोर्रो विस्वासम हिल्वोर्क मात्रम बतले पवित्र मन्नो. ओरा मनसु, मनसु वेहता पोल्ले इव रोंडगुडा हेळसोंचि मनंतां. 16 पेन माकु एरपाटे इंचि ओर वेहांतुर, गानि ओरा कियना कबाह्क हूळते, ओर पेनदुन एरपाट किय्युर इत्तद दिस अर्रंता. बारित्ते ओर लोकुल्कुन हय्सुर, वेहता पोल्लेपोर्रो ताकुर आनि ओर असल बदे बेस कबळ कियनालायक हिल्लुर.